ޚަބަރު
33 އަަހަރުގެ ފިރިހެނަކު ގިނަ ޢަދަދެއްގެ ސައިކަލު ތަޅުދަނޑިތަކަކާއި އެކު ހައްޔަރުކޮށްފި!
ޕޮލިސް ހެޑްކުއާޓާސް. ފޮޓޯ: މިހާރު
33 އަހަރުގެ ފިރިހެނަކު ގިނަ ޢަދެދެއްގެ ސައިކަލު ތަޅުދަނޑިތަކަކާއި އެކު ހައްޔަރުކޮށްފިއެވެ.
މިމައްސަލައާއި ގުޅިގެން ދިވެހި ފުލުހުންގެ ޚިދުމަތުން ބުނެފައިވަނީ ވައްކަމުގެ ތުހުމަތުގައި 33 އަހަރުގެ ދިވެހި ފިރިހެނަކު ފުލުހުން ވަނީ ހައްޔަރުކޮށްފައި ކަމަށެވެ. އަދި މިމައްސަލާގައި ހައްޔަރު ކުރީ ހެންވޭރު ސަމަރ ގްރީންގެ އިބުރާހިމް ޒަކަރިއްޔާކަމަށް ފުލުހުން ވަނީ ބުނެފައެވެ.
މި މީހާ ހައްޔަރުކުރެވުނު އިރު އޭނާގެ އަތުން 7 ސައިކަލު ތަޅުދަނޑި ފެނިފައިވާ ކަމަށާއި، ސީންއަށް ދިޔަ ފުލުހުންގެ ހާދިސާ ރިޕޯޓް އަދި ފޮޓޯ ރިޕޯޓް ފުލުހުން ވަނީ ކޯޓަށް ހުށަހަޅައިފައި ކަމަށްވެސް ފުލުހުން ބުނެއެވެ.
ކްރިމިނަލް ކޯޓުން ނެރުނު ކޯޓް އަމުރުގައި ބުނެފައިވާ ގޮތުން، މި މީހާ ބަލައި ފާސްކުރިއިރު އޭނާ ލައިގެން ހުރި ފަޓުލޫނުގެ ވާތްފަރާތު ޖީބުން 7 ސައިކަލު ތަޅުދަނޑި ފެނިފައިވެއެވެ. މި ކަމާއި ގުޅިގެން އޭނާ ވަނީ ވައްކަމުގެ ތުހުމަތުގައި ހައްޔަރުކޮށްފައެވެ.
މި މައްސަލައިގައި ހައްޔަރުކުރެވުނު ފަރާތް ކޯޓަށް ހާޒިރުކުރުމުން، ކްރިމިނަލް ކޯޓުން ވަނީ އޭނާ 15 ދުވަހުގެ މުއްދަތަށް ބަންދުގައި ބެހެއްޓުމަށް އަމުރުކޮށްފައެވެ.
ފުލުހުންދަނީ މި މައްސަލަ އިތުރަށް ތަހުޤީޤު ކުރަމުން ކަމަށް ފުލުހުންވަނީ ބުނެފައެވެ.
