ހއ. ފިއްލަދޫ ޞިއްޙީ މަރުކަޒު އަޕްގްރޭޑް ކުރުމުގެ މަޝްރޫޢުގެ ބިންގާ އަޅައިފި

ހއ. ފިއްލަދޫގެ ޞިއްޙީ ޚިދުމަތްތައް ފުޅާކޮށް، ފެންވަރު ރަނގަޅު ކުރުމަށްޓަކައި ސަރުކާރުން ކުރިއަށްގެންދާ މުހިންމު މަޝްރޫޢެއް ކަމަށްވާ، އެ ރަށު ޞިއްޙީ މަރުކަޒު އަޕްގްރޭޑް ކުރުމުގެ މަޝްރޫޢުގެ ބިންގާ މިއަދު ރަސްމީކޮށް އަޅައިފިއެވެ.

ފިއްލަދޫގައި އިއްޔެ ބޭއްވި ޚާއްޞަ ރަސްމިއްޔާތެއްގައި މި މަޝްރޫޢުގެ ބިންގާ އަޅުއްވައިދެއްވީ، ރައްޔިތުންގެ މަޖިލީހުގެ ކެލާ ދާއިރާގެ މެންބަރު ޢަބްދުﷲ ޝަރީފެވެ. މި ރަސްމިއްޔާތުގައި ރޯޑު ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިންގ ޑިރެކްޓަރ އިބްރާހީމް ނާޡިމާއި، ހެލްތު ސަރވިސްގެ ސީނިއަރ އެޑްމިނިސްޓްރޭޓަރ މުޙައްމަދު ޖަމީލް ބައިވެރިވެވަޑައިގެންނެވިއެވެ. މީގެ އިތުރުން ފިއްލަދޫ ކައުންސިލްގެ ރައީސް ފަތުޙުﷲ ޙަސަންއާއި ކައުންސިލް މެންބަރު މުޙައްމަދު މޫސާވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.

މި މަޝްރޫޢުގެ ދަށުން ފިއްލަދޫ ޞިއްޙީ މަރުކަޒަށް ބޭނުންވާ އިމާރާތުގެ ޖާގަ އިތުރުކޮށް، ޒަމާނީ ވަސީލަތްތައް ޤާއިމުކުރުމަށް ވަނީ ހަމަޖެހިފައެވެ. މިއީ އެ ރަށުގެ ރައްޔިތުންނަށް ރަށުން ލިބޭ ޞިއްޙީ ޚިދުމަތްތައް އިތުރަށް ހަރުދަނާވެ، ލުއިފަސޭހަކަން ލިބިގެންދާނެ ކަމެކެވެ.

ހއ. ފިއްލަދޫ ސިއްހީ މަރުކަޒު އަޕްގްރޭޑް ކުރުމުގެ މަޝްރޫޢުގެ ބިންގާ މިއަދު ރަސްމީކޮށް އަޅައިފިއެވެ. މި މަޝްރޫޢުގެ ބިންގާ އަޅުއްވައިދެއްވީ ރައްޔިތުންގެ މަޖިލީހުގެ ކެލާ ދާއިރާގެ އިއްޒަތްތެރި މެންބަރު ޢަބްދުﷲ ޝަރީފެވެ. މި ރަސްމިއްޔާތުގައި ހެލްތް ސަރވިސްގެ ސީނިއަރ އެޑްމިނިސްޓްރޭޓަރ… pic.twitter.com/ji6XKpsf7n

— Road Development Corporation Ltd (@rdcmaldives) February 13, 2026

ޞިއްޙީ މަރުކަޒުގެ މަޝްރޫޢުގެ އިތުރުން، ފިއްލަދޫގެ މަގު ހެދުމުގެ އަމަލީ މަސައްކަތް ރަސްމީކޮށް ފެށުމުގެ ރަސްމިއްޔާތުވެސް ވަނީ މި ދަތުރުގެ ތެރެއިން އެ ރަށުގައި ބާއްވާފައެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ ތަރައްޤީއަށް ކުރިއަށްގެންދާ މުހިންމު މަސައްކަތްތަކުގެ ތެރޭގައި ހިމެނޭ ކަންކަމެވެ.