މޫސުމީ ބަދަލުތަކާއި ގުޅިގެން ދެހެއްޓެނިވިގޮތެއްގައި ފަރުތައް ހިމާޔަތް ކުރުމުށް ރާއްޖެއިން ކުރަމުންދާ މަސައްކަތްތައް ދައްކާލައިފި!

 މޫސުމަށް އަންނަ ބަދަލު ތަކާއި އެކު ދެމެހެއްޓެނިވިގޮތެއްގައި ފަރުތައް ހިމާޔަތްކޮށް ރައްކާތެރި ކުރުމުށް ރާއްޖެއިން ކުރަމުންދާ މަސައްކަތްތައް ހިއްސާ ކުރުމަށް އިވެންޓެއް ބާއްވައިފިއެވެ.

މިއިވެންޓަކީ ކޮޕް 29 ގެ ހަވާސާގައި ދިވެހިރާއްޖޭގެ މޫސުމީ ބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާއިން ބޭއްވި ސައިޑް އިވެންޓެއް ކަމަށް އެވުޒާރާއިން ބުނެފައިވެއެވެ. 

އެވުޒާރާއިން ބުނެފައިވަނީ މި ސައިޑް އިވެންޓު ފެށުމުގެ ރަސްމިއްޔާތުގައި ތިމާވެއްޓާއި ބެހޭ ވަޒީރު ޡާރިގް އިބްރާހިމް ވާހަކަފުޅު ދައްކަވަމުން ރާއްޖެއިން ފަރުތައް ހިމާޔަތްކޮށް ރައްކާތެރިކުރުމަށް ކުރަމުންގެންދާ މަސައްކަތްތަކަށް އަލިއަޅުވާލައިފައިވާ ކަމަށެވެ.

އެގޮތުން، ސައިންޓިފިކް ދިރާސާތަކާއި މުޖުތަމައުގެ ބައިވެރިވުމާއެކު ރާއްޖޭގެ ފަރުތައް ހިމާޔަތްކޮށް ރައްކާތެރިކުރުމަށް މަސައްކަތްކޮށް ކާމިޔާބީތައް ހޯދާފައިވާކަން ފާހަގަކުރެއްވިއެވެ. މީގެ އިތުރުން، ބައިނަލްއަޤްވާމީ ފެންވަރުގައި މި ފަދަ މައްސަލަތަކަށް ހައްލު ހޯދުމަށް ރާއްޖެއިން ވަކާލާތު ކުރަމުންދާކަން ފާހަގަކުރެއްވިއެވެ.

އަދި ފަރުތަކާއި ކަނޑުތައް ހިޔާމަތްކޮށް ރައްކާތެރިކުރުމަކީ ބައިނަލްއަޤްވާމީ ގޮތުން ގުޅިގެން ފިޔަވަޅު އަޅަންޖެހޭ މައްސަލައެއްކަމަށް ވަޒީރު ޠާރިޤް ފާހަގަކުރެއްވިއެވެ.

މި ސައިޑް އިވެންޓްގައި މުރަކަ ފަރުތައް ރައްކާތެރިކުރުމާއި، އިއާދަކުރުމާ ގުޅޭގޮތުން ޕްރެޒެންޓޭޝަންއެއް ވަނީ ހުށަހަޅާފައިއެވެ. އަދި ނިއުއީގެ ފަރާތުން، ފަރުތައް ހިމާތަތްކުރުމުގައި އެ ގައުމުގެ ތަޖުރިބާއާ ކުރަމުންދާ މަސައްކަތްތައް މި ސައިޑް އިވެންޓްގައި ހިއްސާކުރިކަމަށްވެސް ތިމާވެއްޓާއި ބެހޭ ވުޒާރާއިން ބުނެފައިވެއެވެ.