ޕިލަރ 7.2 ކޯ-ކްރިއޭޝަން ޑޭގެ ނަމުގައި މަސައްކަތު ބައްދަލުވުމެއް ބާއްވަނީ

ސަރުކާރުގެ އިދާރާތަކުގެ ޑިޖިޓަލް ޓްރާންސްފޯމޭޝަން އޮފިސަރުންނަށް ޚާއްޞަކޮށްގެން "ޕިލަރ 7.2 ކޯ-ކްރިއޭޝަން ޑޭ" ގެ ނަމުގައި މަސައްކަތު ބައްދަލުވުމެއް ބޭއްވުމަށް ނިންމައިފިއެވެ. މައިންޑްކޯއިން އިންތިޒާމުކޮށްގެން ކުރިއަށްގެންދާ މި ހަރަކާތް ބޭއްވުމަށް ހަމަޖެހިފައިވަނީ 16 ފެބްރުއަރީ 2026 ވާ ހޯމަ ދުވަހު މީރުމާ ހޯލުގައެވެ.

މި މަސައްކަތު ބައްދަލުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމަށް ސަރުކާރުން ތަންފީޛުކުރަމުންދާ ޑިޖިޓަލް ޓްރާންސްފޯމޭޝަން އެޖެންޑާ "މޯލްޑިވްސް 2.0" ގެ މަގުޗާޓުގެ ހަތްވަނަ ތަނބުގެ ދަށުން ބާއްވާ ބައްދަލުވުމެކެވެ. މީގެ މައިގަނޑު މަޤްޞަދަކީ ދައުލަތުގެ އިދާރާތަކުގެ މެދުގައި ޑިޖިޓަލް އަދި އޭ.އައި (AI) ޤާބިލުކަން އިތުރުކުރުމަށްޓަކައި މައިންޑްކޯ އާއި ގުޅިފައިވާ އެހެނިހެން އިދާރާތައް ގުޅިގެން މަސައްކަތް ކުރުމެވެ.

މި ބައްދަލުވުމަކީ ސަރުކާރުގެ ޚިދުމަތްތަކުގައި ޑިޖިޓަލް އަދި އޭ.އައި ޓެކްނޮލޮޖީގެ ބޭނުންކުރުމާއި ގުޅުންހުރި ހުނަރުތައް ހަރުދަނާކުރުމަށްޓަކައި އެކުލަވާލާ ޤައުމީ އޮނިގަނޑު ފަރުމާކޮށް، މުރާޖަޢާކުރުމަށް ބާއްވާ މުހިންމު ސެޝަނެކެވެ. "މޯލްޑިވްސް 2.0" ގެ ދަށުން ކަނޑައަޅާފައިވާ ޤައުމީ އިސްތިރާތީޖީ އަމާޒަށް ވާސިލްވުމަށްޓަކައި، މުއައްސަސާތަކުގެ ޑިޖިޓަލް ޤާބިލުކަން އިތުރުކުރާނެ ތަފްޞީލީ މަގުތައް އެންމެންގެ ބައިވެރިވުމާއެކު ބައްޓަންކުރަން މި ބައްދަލުވުމުން މަގުފަހިވެގެންދާނެއެވެ.

މައިންޑްކޯއިން މަޢުލޫމާތުދޭ ގޮތުގައި، ދައުލަތުގެ އިދާރާތަކުގެ ހިންގުމުގެ ނިޒާމަށް ގެނެވޭ އިންޤިލާބީ ބަދަލުތަކަކީ އެންމެންގެ ޝާމިލްވުން އޮތް އޮނިގަނޑެއްގެ ދަށުން ކުރިއަށްދާ ކަންކަމަށް ވާންޖެހެއެވެ. އަދި މި ބަދަލުތައް ބައްޓަންކުރަންވާނީ މި ދާއިރާގައި އިސްކޮށް މަސައްކަތްކުރައްވާ ފަންނީ ފަރާތްތަކުގެ ބައިވެރިވުމާއި ލަފާގެ މަތިން ކަމަށް އެ އިދާރާއިން ފާހަގަކުރެއެވެ.

މައިންޑްކޯގެ ރޯޑްމެޕްގެ ދަށުން ތިން މައިގަނޑު ތަނބެއްގެ ލަނޑުދަނޑިތައް ޙާޞިލުކުރުމަށް މި ބައްދަލުވުމުން ބާރުއަޅާނެއެވެ. އޭގެ ތެރޭގައި އެކި ދާއިރާތަކުގެ ޑިޖިޓަލް ޓްރާންސްފޯމޭޝަނަށް ބާރުއަޅާ 7 ވަނަ ތަނބާއި، ރައްޔިތުންނަށް އިސްކަންދޭ ޑިޖިޓަލް ޚިދުމަތްތަކަށް އަމާޒުކުރާ 6 ވަނަ ތަނބުގެ އިތުރުން، ޑިޖިޓަލް އިޤްތިޞާދާއި އައު އީޖާދުތަކަށް އަލިއަޅުވާލާ 8 ވަނަ ތަނބު ހިމެނެއެވެ.

މި މަސައްކަތުގެ ސަބަބުން ވަކިވަކި އިދާރާތަކުން ކުރާ މަސައްކަތްތަކުގެ ބަދަލުގައި، މުޅި ޤައުމަށް ފައިދާހުރި، ދެމެހެއްޓެނިވި ޑިޖިޓަލް އަދި އޭ.އައި ޤާބިލުކަމުގެ އޮނިގަނޑެއް އެކުލަވާލުމަށް މަގުފަހިވެގެންދާނެ ކަމަށް މައިންޑްކޯއިން އުންމީދު ކުރެއެވެ.