އަހަރެއްގެ ތެރޭގައި ރައީސް މުޢިއްޒު ގެނެސްދެއްވީ ތަރައްޤީއާއި ކުރިއެރުމާއި އުއްމީދުގެ އައު ދައުރެއް

ރައީސް ޑރ. މުޙައްމަދު މުޢިއްޒުގެ ވެރިކަމުގެ ދަށުން، އިޤްތިޞާދީ މިނިވަންކަމާއި ދެމެހެއްޓެނިވި ތަރައްޤީ ހާސިލުކުރުމަށް އަމާޒުކޮށްގެން ދިވެހިރާއްޖޭގައި ގިނަ މަޝްރޫޢުތަކެއް ކުރިއަށްދަނީ ހިންގަމުންނެވެ. ބޭރުގެ އެހީއަށް ބަރޯސާވުން މަދުކޮށް، ސަރުކާރުން މަސައްކަތްކުރަމުންދާއިރު، ހުރިހާ ދިވެހި ރައްޔިތުންނަށް ފާގަތި މުސްތަޤްބަލެއް ގެނެސްދޭނެކަމަށް ޑރ. މުޢިއްޒު ޤަބޫލުކުރައްވާ އެތައް މަޝްރޫޢުތަކެއްގެ މަގުޗާޓު ވަނީ އެކުލަވާލެވިފައެވެ. 

ހުވާކުރެއްވުމަށްފަހު މަޤާމާ ޙަވާލުވެވަޑައިގެން ޤައުމާ މުޚާޠަބު ކުރައްވައި ރައީސް ޑރ. މުޙައްމަދު މުޢިއްޒު ވިދާޅުވީ ރައްޔިތުންގެ އުންމީދުތަކާއި އެމަނިކުފާނު ސަރުކާރުގެ ވާޖިބުތައް އަދާކުރުމާއި ދެމެދުގައި ވަޅުގަނޑެއް އެބައޮތް ކަމަށެވެ. އަދި އެއީ ރާއްޖޭގެ އިޤްތިޞާދު ވެއްޓިފައިވާ ފުން އަނދަވަޅުކަމަށް ރައީސް ވިދާޅުވިއެވެ. ރައީސް ވެރިކަމާއި ޙަވާލުވެވަޑައިގެންނެވިއިރު ދައުލަތުގެ ދަރަނި 119 ބިލިޔަނަށް ވަނީ އަރާފައެވެ.

ދިވެހިރާއްޖޭގެ މާލީ ހަޔާތް ދުށް އެންމެ ބޮޑު ދަރަނިކަމުގައި ސިފަކުރައްވާ އެހެންނަމަވެސް އެކަންކަމުން އަރައިގަތުމަށް އަވަސް ފިޔަވަޅުތަކެއް އަޅުއްވާނެކަމުގެ ޔަގީންކަން ރައީސް މުޢިއްޒު ރައްޔިތުންނަށް ދެއްވިއެވެ. ޤައުމުދެކެ ލޯބިވާ ޤައުމުގެ މުސްތަޤްބަލު އިސްކުރާ ރައްޔިތުން ތަކެއްގެ ހައިސިއްޔަތުން އަޅުގަނޑުމެން ރައީސްއަށް ފުރުސަތުދީ ރައީސްއަށް އެއްބާރުލުން ދޭންޖެހެއެވެ.

ރައީސް މުޢިއްޒު ވަނީ އަމިއްލަ ފުދުންތެރިކަން ހުރި އިޤްތިޞާދެއް ހާސިލުކުރުމަށް އިސްކަންދެއްވާފައެވެ. ސަރުކާރުން ވަނީ އިޤްތިޞާދު ހަރުދަނާކޮށް، އިންފްލޭޝަން ކޮންޓްރޯލްކޮށް، މާލީ ރިސްކު ކުޑަކުރުމަށްޓަކައި ފައިސާ ޗާޕުކުރުން ހުއްޓާލާ ޤައުމަށް ގެއްލުންވެދާނެ ކޮންމެކަމަކަށް ނޫނެކޭ ބުނެފައެވެ. މިއީ ރައީސްގެ ހިކްމަތްތެރި ނިންމެވުމެކެވެ.

 މިފަދަ މާލީ އިންތިޒާމާއެކު، ބައިނަލްއަޤްވާމީ ބަންކަރިންގ ޚިދުމަތްތަކުގެ ޒަރީޢާއިން ބައިނަލްއަޤްވާމީ ވިޔަފާރީގައި ދިވެހިރާއްޖެ މުހިންމު ދައުރެއް އަދާކުރާ ޤައުމަކަށް ހެދުމުގެ މަސައްކަތް ވެސް ދަނީ ކުރިއަށެވެ.ބަންކަރިން ޚިދުމަތަކީ ރާއްޖޭގެ އިޤްތިޞާދު ސިންދަފާތުކޮށް، ދައުލަތަށް ލިބޭ އާމްދަނީ އިތުރުކުރުމަށް ސަރުކާރުން ފަށާފައިވާ މަސައްކަތެކެވެ. ބަންކަރިންގެ ޚިދުމަތް ދިނުމަށް އެސްޓީއޯއިން ވަނީ ގާތްގަނޑަކަށް 4000 ޓަނުގެ ތެޔޮ އުފުލޭ 2 ބޯޓުވެސް ރާއްޖެ ގެނެސްފައެވެ. މީގެ ކުރިން ޤައުމީ ޝިޕިންގް ކުންފުނި، އެމްއެސްއެސް އިން އޮޕަރޭޓް ކުރަމުން އަންނަ "ވައި.ސީ ބެރިއާރ"ބަންކަރިން ހިދުމަތް ހޯދުމަށް ދަތުރުކުރަނީ، އަވަށްޓެރި ލަންކާއަށެވެ. ރާއްޖެ ސަރަހައްދަކީ ދުވާލެއްގެ މައްޗަށް އެތައް ބޯޓެއް ދަތުރުކުރާ ސަރަހައްދަކަށް ވީނަމަވެސް މިސަރަހައްދުގައި ބަންކަރިން ޚިދުމަތް ދެނީ އަވަށްޓެރި ލަންކާ، އާއި އިންޑިއާއިންނެވެ.

ރާއްޖޭގެ އުފެއްދުންތެރިކަން ނުވަތަ ޖީޑީޕީއަކީ މިހާރު 6.5 ބިލިޔަން އެމެރިކާ ޑޮލަރެވެ. ނަމަވެސް ބަންކަރިންގެ ޚިދުމަތް ފެށުމުން އޭގެ ތެރެއަށް މުޅިން އަލަށް 400 މިލިޔަން ޑޮލަރު ވަންނާނެކަމަށް ސަރުކާރުން ލަފާކުރެއެވެ. މިއާއެކު 6 ބިލިޔަން ދިވެހި ރުފިޔާގެ މުޅިން އައު ސިނާއަތެއް މިދަނީ އުފެދިގެންނެވެ.

ދުނިޔޭގެ މެޕުގައި ރާއްޖެ އޮންނަ ސަރަޙައްދަކީ ކަނޑު ބޯޓުތައް އާއްމުކޮށް ދަތުރުކުރާ ހިސާބަކަށް ވުމާއިއެކު  ރާއްޖޭގައި ބަންކަރިންގެ ޚިދުމަތް ފެށިއްޖެނަމަ މިއީ އިޤްތިޞާދީގޮތުން ރާއްޖެއަށް އެތައް ކުރިއެރުމެއް ލިބޭނެ ކަމެކެވެ.

ބަންކަރިންގެ ހިދުމަތާ އެކު އިންޓަނޭޝަނަލް ކަސްޓަމަރުންނަށް، އިތުރު 14 ހިދުމަތްތަކެއް މި ސަރަޙައްދުން ފޯރު ކޮށްދޭން ފެށެނީއެވެ. މިކަމުގެ ސަބަބުން ސަރުކާރުގެ އެހެން ކުންފުނި ތަކަށާއި، އަމިއްލަ ކުންފުނި ތަކަށް އަދި އަމިއްލަ މީހުންނަށް ވެސް އާމްދަނީ ހޯދުމުގެ އިތުރު ފުރުސަތުތައް މިވަނީ ފަހިވެފައެވެ.

ފަތުރުވެރިކަން ކުރިއަރުވައި، އިންފްރާސްޓްރަކްޗަރ ވަރުގަދަކުރުމަށްޓަކައި، ރައީސް މުޢިއްޒުގެ ސަރުކާރުން ވަނީ ވެލާނާ އިންޓަރނޭޝަނަލް އެއަރޕޯޓް ފިނިހަކަ ސްޕީޑުގައި ދަނިކޮށް މަޝްރޫޢު ހަލުވި ކުރުމަށް ޙާއްސަ އިސްކަމެއް ދެއްވާފައެވެ.

އަޅުގަނޑުމެން ކުރިން ޓާގެޓުކުރިން މިއަހަރު ނިމެންވާއިރަށް މަސައްކަތް ނިންމޭތޯ، މިއަންނަ އަހަރުގެ މެދަކާއި ހަމައަށް ދާއިރު، ޖުލައިމަހާ ހަމައަށްދާންވާއިރަށް އެ ޓަރމިނަލްގެ މަސައްކަތްތަކާއި ގުޅިފައިވާ މަސައްކަތްތައް ނިންމާނަން

ރައީސް ވިދާޅުވިއެވެ.

ވީ.އައި.އޭގައި މިހާރު ބޭނުންކުރާ އިންޓަރނޭޝަނަލް ޓަރމިނަލަކީ އަހަރަކު 1.5 މިލިޔަން ފަސިންޖަރުންނަށް ޚިދުމަތް ދެވޭވަރުގެ ޓާރމިނަލެކެވެ. އެހެންނަމަވެސް އެންމެފަހުގެ ޒަމާނީ ވަސީލަތްތަކާއެކު އަލަށް ތަރައްޤީކުރާ 78 ހާސް އަކަ މީޓަރުގެ ޓަރމިނަލަކީ އަހަރަކު 7 މިލިޔަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ ޓަރމިނަލެކެވެ.ރާއްޖޭގެ އެންމެ ބޮޑު ވައިގެ ބަނދަރު ތަރައްޤީކުރުމުގެ ސަބަބުން ގުޅުންތައް ވަރުގަދަވެ، ފަތުރުވެރިކަމުގެ މަންޒިލެއްގެ ގޮތުގައި ދިވެހިރާއްޖޭގެ މަންޒަރު އިތުރަށް ފުޅާވެގެންދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

އައު ޕަސިންޖަރ ޓާރމިނަލް ތަރައްޤީ ކުރެވިގެންދާނީ އެންމެފަހުގެ ޒަމާނީ ވަޞީލަތްތަކާއެކުއެވެ. އެގޮތުން އެއިރޯ ބޯޑިން ބްރިޖްތަކާއި، އެންމެ ފަހުގެ ޒަމާނީ ބެގޭޖް ހޭންޑްލިން ސިސްޓަމްތައް ޓާރމިނަލްގައި ހުންނާނެއެވެ. އައު ޓާރމިނަލް އިމާރާތުގެ ސަބަބުން މިހާރު ހުރި ޓަރމިނަލަށް ދިމާވެފައިވާ ޖާގައިގެ ދަތިކަން ފިލުވައިދީ، އެފް އެންޑް ބީގެ ގިނަ އައުޓްލެޓްތަކާއި، ރީޓެއިލް ސްޕޭސްތަކާއި، ލައުންޖްތަކާއި އެހެނިހެން ޚިދުމަތްތައް ޤާއިމުކުރެވިގެންދާނެއެވެ .

ރާއްޖެ ޒިޔާރަތްކުރާ ފަތުރުވެރިންގެ އަދަދު އިތުރުކުރެވޭނެ ކަމަށް ބެލެވޭއިރު ރާއްޖޭގެ ވިޔަފާރިތަކަށް ފައިދާވެ، ދައުލަތުގެ އާމްދަނީ އިތުރުވެގެންދާނެއެވެ. ކުދި އަދި މެދުފަންތީގެ ވިޔަފާރިތަކަށް މިހާރަށް ވުރެން ފަހި ފުރުސަތު ހުޅުވޭނެއެވެ. މީގެ އިތުރުން، ރައީސް މުޢިއްޒުގެ ތަސައްވުރުގައި ވަނީ ޚާއްޞަ އިޤްތިޞާދީ ސަރަޙައްދުތަކެއް އުފައްދައި، އިތުރަށް ރާއްޖެ ތަރައްޤީކުރުމެވެ. މިކަމުގައި އަމާޒަކީ ފަތުރުވެރިކަން އިތުރަށް ކުރިއަރުވައި، ދިވެހިރާއްޖެއަކީ ބައިނަލްއަޤްވާމީ މާލީ މަރުކަޒަކަށް ހެދުމެވެ. މިއިސްނެންގެވުމުގެ ސަބަބުން އިޤްތިޞާދީ ބިންގާ ފުޅާވެ، ދެމެހެއްޓެނިވި އާމްދަނީގެ ވަސީލަތްތައް އުފެއްދޭނެ ކަމީ ޝައްކެއްވެސްއޮތް ކަމެއް ނޫނެވެ.

 ޒަމާނީ އިޤްތިޞާދީ ކުރިއެރުމުގައި ޓެކްނޮލޮޖީގެ މުހިންމުކަން ދެނެގަނެ، ސަރުކާރުން ވަނީ އީ-ވޮލެޓް ޚިދުމަތްތަކާއި، ޕޭޕާލް ފަދަ ބައިނަލްއަޤްވާމީ ޕްލެޓްފޯމްތައް ރާއްޖޭގައި ބޭނުންކުރެވޭނެ ގޮތް ހެދުމަށް ޤާނޫނީ އޮނިގަނޑު ހަރުދަނާކުރުމުގެ މަސައްކަތް ފަށާފައެވެ. ޑިޖިޓަލް އިންފްރާސްޓްރަކްޗަރއަށް ދެވޭ މި އަހަންމިއްޔަތުގެ ސަބަބުން ވިޔަފާރީގެ މުޢާމަލާތްތައް ފަސޭހަވެގެންދާނެއެވެ. ކުދި އަދި މެދު ފަންތީގެ ވިޔަފާރިތައް ބާރުވެރިވެ، ރަށްރަށުގައި މާލީ ޝާމިލުކަން އިތުރުވެގެންދާނެއެވެ.މިފަދަ ބަދަލުތަކަކީ ދެމެހެއްޓެނިވި ގޮތެއްގައި ޤައުމުގެ ތަރައްޤީއަށް ޙިއްސާކުރާނެ ކަންކަމެވެ.

 ތަރައްޤީގެ މުހިންމު މަޝްރޫޢު ތަކާއި އެކު ޑރ. މުޢިއްޒު ވަނީ މޫސުމަށް އަންނަ ބަދަލުތަކާ ކުރިމަތިލުމުގައި ދިވެހިރާއްޖޭގެ އަޒުމް އަލުން ދަމަހައްޓާނެކަން ޔަޤީންކޮށްދެއްވާފައެވެ. 2028 ވަނަ އަހަރާ ހަމައަށް ރާއްޖޭގައި ބޭނުންކުރާ ކަރަންޓުގެ 33 އިންސައްތަ އިއާދަކުރަނިވި ހަކަތައިން އުފެއްދުމުގެ އަމާޒު ކަނޑައަޅަ،ސަރުކާރުން ވަނީ ތިމާވެށި ރައްކާތެރިކުރުމުގައި ދިވެހިރާއްޖެއަކީ ދުނިޔޭގެ ފެންވަރުގައި އަޑުއުފުލާ ހިތްވަރުގަދަ ޤައުމަކަށް ހަދަން މަސައްކަތް ފަށާފައެވެ. 

 ކުރިމަގަށް ބަލާ އިރު ސަރުކާރުގެ އައު އަހަރަކާ ކުރިމަތިލާއިރު، ރައީސް ޑރ. މުޢިއްޒުގެ މަޝްރޫޢުތަކުގެ ސަބަބުން ދިވެހިރާއްޖެއަކީ ކުރިމަގަށް ވިސްނައި، ދެމެހެއްޓެނިވި ގޮތެއްގައި ކުރިއަރަމުންދާ ޤައުމަކަށް ވެގެންދާނެއެވެ. ސަބަބަކީ ރައީސް މުޢިއްޒުގެ ތަސައްވުރަކީ ވަގުތީ ހައްލުތަކަށް ވުރެން ދުރުރާސްތާ ތަސައްވުރުތަކަށް ވުމެވެ. އަމިއްލަ ފުދުންތެރިކަން ހާސިލުކުރުމާއި، އިންފްރާސްޓްރަކްޗަރ ތަރައްޤީކުރުމާއި، ޑިޖިޓަލް ޓެކްނޮލޮޖީ ތަޢާރަފުކުރުމުގެ އަމާޒުތަކާއެކު، ކުރިއަށް އޮތް އަހަރަކީ ކުރިއެރުމާއި ފުރުޞަތުތަކުގެ އަހަރަކަށް ވެގެންދާނެކަމަށް އުއްމީދުކުރެވެއެވެ. މި މަސައްކަތްތަކުގެ ތެރެއިން، ރައީސް މުޢިއްޒުގެ ސަރުކާރުން ދަނީ ދެމެހެއްޓެނިވި ތަރައްޤީގެ ނަމޫނާއެއް ދައްކުވައިދެމުންނެވެ. މިގޮތުން، ހުރިހާ ރައްޔިތުންނަށް މުއްސަނދި އަދި ހަމަހަމަ މުސްތަޤްބަލެއް ބިނާކުރުމަށް މަސައްކަތް ކުރަމުންދާކަމުގެ ހެކި ފެންނަންއޮތުމެވެ.