ރާއްޖޭގެ ވައި ނުރައްކާތެރި މިންވަރަށް ނުސާފުވެއްޖެ؛ ބޭރަށް ނުކުމެ އުޅުމުގައި ސަމާލުވުމަށް އިލްތިމާސްކޮށްފި

ދިވެހިރާއްޖޭގެ ހުރިހާ ހިސާބަކަށްވެސް ދުންފުނީގެ އަސަރު ފޯރައި، ވައި ނުރައްކާތެރި މިންވަރަށް ނުސާފުވެފައިވާ ކަމަށް މޫސުމާ ބެހޭ ޤައުމީ އިދާރާ (މެޓް އޮފީސް) އިން މިއަދު ހާމަކުރައްވައިފިއެވެ.

މެޓް އޮފީހުން ވިދާޅުވި ގޮތުގައި، ދުންފުނީގެ އަސަރު މުޅި ރާއްޖެއަށް ކުރަމުންދާއިރު، ޚާއްޞަކޮށް އުތުރާއި މެދުރާއްޖެތެރޭގެ ހިސާބުތަކަށް މިކަމުގެ އަސަރު ވަނީ ވަރަށް ބޮޑަށް ކޮށްފައެވެ. މިކަމުގެ ސަބަބުން ދުރުފެންނަ މިންވަރު (ވިޒިބިލިޓީ) 3 ކިލޯމީޓަރަށް ވުރެ ދަށްވެފައިވާ ކަމަށް ރިޕޯޓުތަކުން ދައްކައެވެ. ކުރިއަށް އޮތް 5 ދުވަހުވެސް ރާއްޖޭގެ ސަރަހައްދުގައި ދުންފުނި ހުންނާނެ ކަމަށް ލަފާކުރެވޭއިރު، އެންމެ ބޮޑަށް ވައި ނުސާފުވެފައިވާ ސަރަހައްދުތަކަކީ ކ. މާލެ، ކ. ވިލިނގިލި، ށ. ފުނަދޫ އަދި ދ. ކުޑަހުވަދޫއެވެ.

މިއީ ކޮންމެ އަހަރަކުވެސް އިރުވައި މޫސުމުގައި ރާއްޖޭގެ އުތުރުން އިންޑިއާ އާއި ހިމާލިޔާ ސަރަޙައްދުން އަންނަ ފުސްދުމުގެ ސަބަބުން ދިމާވާ މައްސަލައެކެވެ. ވައިގެ ސާފުކަން ހުރި މިންވަރު ބަލާ "އައިކިއު އެއާ" ގެ ތަފާސްހިސާބުތަކަށް ބަލާއިރު، ވައިގައި ހިމެނޭ "ފައިން ޕާޓިކިއުލޭޓް މެޓާ" (ޕީއެމް2.5) ގެ މިންވަރު މިހާރު ހުރީ ކޮންމެ ކިއުބިކް މީޓަރެއްގައި 12.16 މައިކްރޯ ގްރާމްގައެވެ. މިއީ ކުރީ ދުވަސްތަކާ އަޅާބަލާއިރު ވަރަށް ބޮޑު އިތުރުވުމެކެވެ.

Air quality across the Maldives has deteriorated, with particularly poor conditions observed in the northern and central regions. These conditions are expected to persist over the next five days.
Seafarers and those spending extended time outdoors are advised to take necessary… pic.twitter.com/qQd49eXIWH

— Maldives Meteorology (@MetMaldives) February 16, 2026

ވައި ނުސާފުވުމުގެ ސަބަބުން ދިމާވެދާނެ ޞިއްޙީ މައްސަލަތަކުން ރައްކާތެރިވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އިރުޝާދުތަކެއް ނެރެފައެވެ. މިގޮތުން ނޭވާލާ ނިޒާމާއި ފުއްޕާމޭގެ ބަލިތައް ހުންނަ މީހުންނާއި، ކުޑަކުދިންނާއި، އުމުރުން ދުވަސްވީ މީހުންގެ އިތުރުން މާބަނޑު މީހުން މިކަމަށް ޚާއްޞަ ސަމާލުކަމެއް ދިނުމަށް ވަނީ އެދިވަޑައިގެންފައެވެ.

ދުންފުނީގެ ސަބަބުން ކުރިމަތިވެދާނެ ބައެއް ޞިއްޙީ މައްސަލަތައް:

• ލޯ، ނޭފަތް، ކަރުތެރެ އަދި ހަންގަނޑު ހިރުވުން
  
• ބޮލުގައި ރިއްސުމާއި ބޯ އެނބުރުން
  
• ކެއްސުމާއި ނޭވާލާން އުނދަގޫވުން
  
• ނޭވާހިއްލުމާއި ހިތުގެ ބަލިތައް ހުންނަ މީހުންގެ ބަލި ހާލަތު ގޯސްވުން

އެޗްޕީއޭ އިން އިލްތިމާސްކުރައްވަނީ ވައި ނުސާފު މި ދުވަސްވަރު ކޮންމެހެން ބޭރަށް ނުކުންނަން ޖެހިއްޖެ ހާލަތެއްގައި ނޫނީ ބޭރަށް ނުނިކުތުމަށާއި، ބޭރަށް ނުކުންނަ ނަމަ މާސްކު އެޅުމަށެވެ.

Air Pollution | FAQs Get answers to common questions and learn how air pollution affects your health.#AirPollution #AirQuality #PublicHealth
#HealthforAll pic.twitter.com/LAJ1X7mGys

— Health Protection Agency (@HPA_MV) February 16, 2026