ފުލުހުންގެ އެންމެ މުހިންމު މަސްޢޫލިއްޔަތަކީ މުޖުތަމަޢުގެ ޢާންމު މަސްލަޙަތު ނެގެހެއްޓުން: އޭސީޕީ

ފުލުހުންގެ އެންމެ މުހިންމު މަސްޢޫލިއްޔަތަކީ މުޖުތަމަޢުގެ ޢާންމު މަސްލަޙަތު ނަގަހައްޓައި، ދެމެހެއްޓުންކަމަށް އެސިސްޓަންޓް ކޮމިޝަނަރު އޮފް ޕޮލިސް އަޙްމަދު އަބްދުއްރަޙްމާން ވިދާޅުވެއްޖެއެވެ.

އޭސީޕީ މިފަދައިން ވިދާޅުވީ 51 ވަނަ ޕަބްލިކް އޯޑަރ ޓްރޭނިންގ ކޯސް ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ. ދ. ވާނީގައި ހުންނަ ކެމްޕަހުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވާ ވާހަކަ ދައްކަވަމުން އޭސީޕީ ވިދާޅުވީ، މުޖުތަމަޢުގެ ޢާންމު މަސްލަޙަތު ނަގަހައްޓައި، ދެމެހެއްޓުމަކީ ފުލުހުންނާ ހަވާލުކުރެވިފައިވާ އެންމެ މުހިންމު އެއް މަސްއޫލިއްޔަތު ކަމަށެވެ. އަދި އެކަމަށްޓަކައި ހަމައެކަނި ޖިސްމާނީ ޤާބިލުކަމާއި ހުނަރުތައް އެނގުމުގެ އިތުރުން، އަޚުލާޤީ މިންގަނޑުތަކަށް ބޯލެނބުމާއި، އިންސާނާގެ ވިސްނުމުގެ ބޭނުން ހެޔޮގޮތުގައި ހިފުމަކީ މުހިންމު ކަމެއްކަން އޭސީޕީ ފާހަގަކުރެއްވިއެވެ.

މީގެ އިތުރުން އޭސީޕީ ވަނީ، ގުޅިގެން މަސައްކަތްކުރުމުގެ ރޫޙާއި މުޖުތަމަޢަށް އިޙްތިރާމުކުރުމަކީ ކޮންމެހެން ބޭނުންތެރި ކަމެއް ކަމަށްވެސް ވިދާޅުވެފައެވެ. ހަަމަ އެއާއެކު، ޢާންމުންގެ ސަލާމަތާއި ރައްކާތެރިކަން ކަށަވަރުކުރުމަށާއި ފުލުހުންގެ ޚިދުމަތުގެ ފެންވަރު މަތިކުރުމަށްޓަކައި، ތަމްރީނުގެ ބައިވެރިންނާއި މުދައްރިބުން ކުރެއްވި ބުރަ މަސައްކަތާއި ބެހެއްޓެވި ފަންނީ ޤާބިލުކަން ފާހަގަކުރައްވައި އޭސީޕީ ވަނީ ޝުކުރު އަދާކުރައްވާފައެވެ.

މިދިޔަ ޖަނަވަރީ މަހުގެ 18 އިން މި މަހުގެ 15 ވަނަ ދުވަހުގެ ނިޔަލަށް ދ. ވާނީ ކެމްޕަހުގައި ކުރިއަށް ގެންދިޔަ މި ކޯހުން އެއްވަނަ ހޯދީ ކޮންސްޓަބަލް ޢަބްދުލް ޙަސީބްއެވެ.

މި ކޯހުގައި ބައިވެރިވި 69 ފުލުހުން ވެސް ކޯހުގެ މިންގަނޑަށް ފާސްވެފައިވާކަމަށް ފުލުހުންގެ ޚިދުމަތުން ވިދާޅުވިއެވެ.