ރައްޔިތުންގެ އުންމީދުތައް ހާސިލުކުރުމުގެ މަގުގައި: ރައީސް މުޢިއްޒު ސަރުކާރުގެ ފުރަތަމަ އަހަރު

ކުޑައެއް ބޮޑެއް، ސިޔާސީ ކުލައެއް ތަފާތު ނުކޮށް، ހަމަހަމަ ކަމާއެކު ރަށްތަކާ، ރައްޔިތުންނަށް މިއަދު ޚިދުމަތް ލިބެއެވެ. އަމާންވެށްޓެއް ޤާއިމުވެ، ހަމަޖެހިލައިގެން، ދިރިއުޅުމާމެދު ވިސްނާނެ މާހައުލެއް މިއަދު ވަނީ ލިބިފައެވެ. އެތައް ގުނައަކުން ރާއްޖެ އަމާން ވެއްޖެ ކަމުގެ  އިޙުސާސް މުޖުތަމަޢުގާ މިހާރު ކުރެވެއެވެ. އިންޑިއާ ސިފައިން ރާއްޖެގައި ޤާއިމްވެ ތިބިތިބުމާ އެކު އިވެމުންދިޔަ ޝަކުވާތަކާއި ބަހުސްތަކުގެ އަޑު ކެނޑިއްޖެއެވެ. ހަމައެހެންމެ ރާއްޖެއަށާއި ރާއްޖޭގެ ރައްޔިތުންނަށް ރައްކާތެރިކަން ކަށަވަރުކޮށްދެއްވުމަށް ސިފައިންނާއި ފުލުހުންގެ ޤާބިލުކަން އިތުރުކުރުމަށް ރައީސް މަސައްކަތްޕުޅު ފައްޓަވާ ނަތީޖާ ދެއްކެވިއެވެ. އެއްވެސް ސަރުކާރަކަށް މިހާތަނަށް ޙައްލު ނުކުރެވުނު ބިދޭސީންގެ މައްސަލަ ޙައްލު ކޮށްދެއްވާ ޤަވާޢިދާ ޚިލާފަށް އުޅޭއެތައް ހާސް ބިދޭސީންނެއް ވަނީ އަނބުރާ ޤައުމަށް ފޮނުވާލާފައެވެ.

އިންޑިއާ ސިފައިން ފޮނުވާލުން

ރައީސް މުޢިއްޒުގެ ވެރިކަން ފެށުމާ ހަމައަށް ގިނަ ރައްޔިތުންގެ އެންމެ ބޮޑު ޝަކުވާއަކަށް ވެފައި އޮތީ އިންޑިއާ ސިފައިން ރާއްޖޭގައި ތިބި މައްސަލައެވެ. ރާއްޖޭގައި އިންޑިއާގެ ޖުމްލަ 77 ސިފައިންގެ މީހުން ޤާއިމުވެ ތިބިކަން ސަރުކާރުން ހާމަކުރެއްވިއެވެ.

ރައީސުލްޖުމްހޫރިއްޔާ ކަމުގެ ހުވާކުރެއްވުމަށްފަހު، އެ މަސްއޫލިއްޔަތާ ހަވާލުވެވަޑައިގެން ރައީސް މުއިއްޒު އެންމެ ފުރަތަމަ ފެއްޓެވި މަސައްކަތްޕުޅަކީ ދިވެހި ރައްޔިތުން ބޭނުންވާ ގޮތަށް އަދި އެމަނިކުފާނު ވަޢުދުވެވަޑައިގެންފައިވާ ގޮތަށް ރާއްޖޭގައި ޤާއިމުވެގެން ތިބި ބޭރުގެ ސިފައިން އަނބުރާ ފޮނުވާލުމުގެ މަސައްކަތްޕުޅެވެ.

ރައީސް އިންޑިއާ ސަރުކާރާ އެކު ބައްދަލުކުރައްވާ އެ ޤައުމުގެ ސިފައިން ރާއްޖޭގެ ފަސްގަނޑުގައި ޤާއިމުވެ ތިބެން ދިވެހި ރައްޔިތުން ބޭނުން ނުވާ ކަމަށް ދެންނެވިއެވެ.

ރާއްޖޭގައި އެއްވެސް ޤައުމެއްގެ ސިފައިންނަށް ޤާއިމުވެ ނުތިބެވޭނެ ކަމަށާއި ރާއްޖޭގައި ޤާއިމުވެތިބި އިންޑިއާ ސިފައިން އަނބުރާ ފޮނުވާލައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވައުދުވެވަޑައިގެންނެވިއެވެ. އަދި މިދިޔަ އަހަރުގެ ނޮވެންބަރު މަހު ވެރިކަމާ ޙަވާލުވެވަޑައިގަތުމަކާއެކު އެމަނިކުފާނު ވަނީ އިންޑިއާ ސަރުކާރާ ގުޅިގެން އެ މަސައްކަތް ފައްޓަވާފައެވެ. މި ކަން ސަރުކާރުން ކަށަވަރުކޮށްދެއްވިއެވެ. ހަމައެހެންމެ އިންޑިއާގެ ފޮރިން މިނިސްޓްރީގެ ތަރުޖަމާނު ރަންދީރް ޖެއިސްވާލް ވެސް ވަނީ މި ކަން ބޭރުގެ ނޫސްތަކަށް ކަށަވަރުކޮށްދީފައެވެ.

ދިވެހި ގައުމަށް ޓަކައި އިޚުލާޞްތެރިކަމާއި ޙިކުމަތްތެރިކަމާ އެކު ދިވެހިން އެއްވެސް ނުރައްކަލަކަށް ވައްޓައިނުލައި ރައީސް ކުރެއްވި އެ މަސައްކަތްޕުޅަށް ޝުކުރު ޙައްޤެވެ. ސިފައިން ފޮނުވާލެއްވުމަށް ފަހު ޤައުމުގެ މިނިވަންކަމާއި ސިޔާދަތާއި އިސްތިޤުލާލުގެ ޙިމާޔަތުގައި ދިވެހި ޤައުމީ ސިފައިންގެ ޤާބިލިއްޔަތު އިތުރުކުރުމުގެ މަސައްކަތްޕުޅު ރައީސް ފެއްޓެވި އެވެ.

ރައީސުލްޖުމްހޫރިއްޔާ މިކަމާ ގުޅިގެން  ދެއްކެވި ވާހަކަފުޅުގައި، އެއްވެސް ޤައުމަކާ ހަތުރުވެރިކަމެއް ނުބާއްވަވާނެ ކަމަށް އެމަނިކުފާނު މީގެ ކުރިންވެސް ވިދާޅުވަމުން ގެންދެވިކަން ފާހަގަ ކުރައްވައި، ދިވެހިރާއްޖޭގެ މިނިވަންކަމާއި ސިޔާދަތުގެ ރަތްރޮނގު ފުޅާކޮށް ދަންމަވާނެކަމަށާއި އެރޮނގު ހުރަސްކޮށް ދިއުމަށް އެއްވެސް ޤައުމަކަށް ފުރުޞަތު ނޯންނާނެ ވާހަކަ ތަކުރާރު ކުރެއްވިއެވެ.

މީގެއިތުރުން އެއްގަމާއި، ކަނޑާއި، ވައިގެމަގުންވެސް ޤައުމު ދިފާޢުކުރެވޭނެ ޒަމާނީ ޢަސްކަރީ ޤާބިލުކަން ދިވެހިރާއްޖޭގައި ވަރުގަދަކުރަން ޖެހޭކަމަށާއި އަދި އެކަން ކުރަން ފަށާފައިވާކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.

ރާއްޖޭގެ ކަނޑުން ގެއްލުނު ބައި އަނބުރާ ހޯދުން

ދިވެހިރާއްޖޭގެ ކަނޑުގެ ސަރަޙައްދުން ގެއްލުނު ބައި އަނބުރާ ހޯދުމަށްޓަކައި، ބައިނަލްއަޤްވާމީ ހަމަތަކުގެ މަތީން އަލުން އެދި، ވަކާލާތު ކުރެވޭނެ ގޮތްތައް ހޯދައި ދިރާސާކުރުމުގެ މަސައްކަތް، ތަޖުރިބާކާރުންގެ ޓީމަކުން ހަލުވިކަމާއެކު ރައީސުލްޖުމްހޫރިއްޔާ ކުރިއަށް ގެންދެވިއެވެ. ޖުމްހޫރީ ދުވަހާ ގުޅިގެން ދަރުބާރުގޭގައި ބޭއްވި ޖަލްސާގައި ރައީސް ޑރ. މުޙައްމަދު މުޢިއްޒު ވިދާޅުވީ ރާއްޖޭގެ ކަނޑުން ބައެއް ގެއްލުވައިލީ ރޯމާ ދުވާލު ރާއްޖޭގެ ކަނޑައެޅިފައިވާ ދުސްތޫރުގެ ނިޒާމާ ހިލާފަށް ކަމަށެވެ. އަދި ރާއްޖޭގެ ކަނޑުން ބައެއް ދޫކޮށްލީ ރައްޔިތުންގެ މަޖިލީހުގެ ވެސް ބަހެއް ވެސް ނެތި ކަމަށް ރައީސް ވިދާޅުވި އެވެ.

އެކަން ކޮށްފައިވާގޮތުން އެކަން ޙައްލުކުރުމުގައި ބުރަ މަސައްކަތްތަކެއް ސަރުކާރުން ކުރަން ޖެހުނެވެ .އެގޮތުން އެޓާނީ ޖެނެރަލް އޮފީހުގެ މުވައްޒަފެއް ދާއިމީކޮށް އދ. ގައި މި ސަރުކާރު ފެށުނު ދުވަހުން ފެށިގެން ބަހައްޓާފައި ހުންނާނެ ކަމަށާއި އަދި އެކަމާ ގުޅޭ އެކިއެކި މަސައްކަތް ކުރަމުންދާ ކަމަށް އެމަނިކުފާނު ވިދާޅުވި އެވެ.

އެ ތަނަކީ އަޅުގަނޑުމެންގެ ރަސްރަސްކަލުންގެ ފެންނާންހުރި ލިޔެކިއުންތަކެއް ހުރުމާއެކުގައި އެހެން ގައުމަކަށް ވުރެ ރާއްޖެއަށް މާއައުލާކަން ބޮޑު ދިވެހިރާއްޖޭގެ ތަނެއްގެ ގޮތުގައި ވެސް ބެލިދާނެ ކަމަށް ތާރީޚީ ގޮތުން ފެންނަން ހުރުމާއެކު އެކަން ފާހަގަކޮށް އަޅުގަނޑުމެން ވާނީ ސިޓީ ފޮނުވާފައި

ރައީސް މުޢިއްޒު

ކުރީގެ ސަރުކާރުން ރާއްޖޭގެ އުތުރުގެ ކަނޑުން ގެއްލުވާލާފައިވާ ބައި ހޯއްދަވައިދެއްވުމަށް ރައީސް މުޢިއްޒު ހިތްވަރާ އެކު މަސައްކަތް ކޮށްދެއްވިއެވެ.

ދިވެހިރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ސަރަޙައްދުން ބައެއް ގެއްލޭ ގޮތަށް އިންޓަރނޭޝަނަލް ޓްރައިބުނަލް ފޮރ ދަ ލޯ އޮފް ދަ ސީ (އިޓްލޮސް)އިން ކޮށްފައިވާ ޙުކުމް އިސްތިޢުނާފުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ހަފްތާ-14 މަގުޗާޓުގައި މިނިވަންކަމާއި ސިޔާދަތުގެ ދާއިރާއިން ކުރެއްވުމަށް ކަނޑައަޅުއްވާފައިވާ މުހިންމު މަސައްކަތެކެވެ. އިޓްލޮސްއަށް މައްސަލަ ހުށަހެޅުމަށްޓަކައި ކަނޑައަޅާފައިވާ ޚާއްޞަ ކޮމިޓީގެ މަސައްކަތުގެ ދަށުން އެ މައްސަލައާ ގުޅުންހުރި ލިޔެކިޔުންތައް ރިވިއު ކުރަމުންދާކަން ސަރުކާރުން ވަނީ ހާމަކުރައްވާފައެވެ.

ރާއްޖޭގެ އަސްކަރިއްޔާގެ ޤާބިލުކަން އިތުރުކުރުން

ރައީސުލްޖުމްހޫރިއްޔާގެ ރިޔާސީ ބަޔާނުގައި، ޤައުމު ދިފާޢުކުރެވޭނެ ޒަމާނީ ޢަސްކަރީ ޤާބިލުކަން އެއްގަމާއި، ކަނޑާއި، ވައިގެމަގުން ވަރުގަދަކުރުމުގެ ތެރެއިން، ރާއްޖޭގެ 900،000 އަކަކިލޯމީޓަރުގެ ބޮޑު އެކްސްކްލޫޒިވް އިކޮނޮމިކް ޒޯން 24 ގަޑިއިރު ހުއްޓުމެއް ނެތި ބެލެހެއްޓޭނެ ޤާބިލްކަން ވަރަށް އަވަހަށް ދިވެހި އަސްކަރިއްޔާގައި ޤާއިމް ކުރެވިގެންދާނެ ކަމުގައި އެމަނިކުފާނު ވިދާޅުވިއެވެ..

ރައީސުލްޖުމްހޫރިއްޔާގެ ވާހަކަފުޅުގައި، ޤައުމުގެ ކަންކަން ހިންގުމުގައި އެމަނިކުފާނު ހިފަހައްޓަވާނެ އެންމެ މައިގަނޑު އުޞޫލަކީ، ދިވެހީންނަށާއި ދިވެހި ޤައުމަށް އިސްކަން ދިނުން، ނުވަތަ 'ޕްރޯ މޯލްޑިވްސް' ގެ ސިޔާސަތުކަން ތަކުރާރު ކުރެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

 ބިދޭސީންގެ މައްސަލަ

ރާއްޖޭގައި މަސައްކަތް ކުރާ ބިދޭސީންގެ މުސާރައިން ތިން ޕަސަންޓްގެ ރެމިޓެންސް ޓެކްސް ނަގަން ތާއީދު ކުރިޔަސް ޤަވާޢިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރެވޭނެ ސަރުކާރެއް ނެތް ކަމަށް ރައްޔިތުންގެ މަޖިލީހުގައި ބައެއް މެމްބަރުންވެސް މީގެ އަހަރުތަކެއް ކުރިން ފާހަގަ ކުރެއްވިއެވެ. ގިނަދުވަސްވީއިރުވެސް ޙައްލެއް ލިބިފައިނުވާ އެންމެ ބޮޑު އެއްމަސަލައިގެ ގޮތުގައި ނުޤަވާޢިދުން ރާއްޖޭގައި ދިރިއުޅޭ ބިދޭސީންގެ މައްސަލަ ހިމެނެއެވެ. ކަންމަތީ ފިހާރަތަކުގައިވެސް މަސްދޯނި ތަކުގައިވެސް އަދި ބޯކޮށާ ތަންތަނާއި ހޮޓާ ހޮޓާލުގައިވެސް ބިދޭސީންނެވެ. އެންމެ ކުޑަމިނުން މީރު ހެދިކާއެއްވެސް ދިވެހީނަށް ކާން ލިބެމުންއައީ ބިދޭސީން ހެދީމައެވެ. ރާއްޖޭގެ ވަޒަންވެރިވުމާއި އިނދެވަރިކުރުމުގައި ވެސް ބޭރު މީހުންގެ ނުފޫޒު އޮތީ އަތްނުފޯރާހާ މައްޗަށް ގޮސްފައިއެވެ. މާލޭގެ ބާޒާރުމަތީގެ ފިހާރަތަކަށް ބެލިޔަސް، ދިވެހިންގެ ނަމުގައި އެ ތަންތަން ނަގާފައި ބޭރު މީހުންނާ ޙަވާލުކޮށްގެން، ބޭރު މީހުން ކުރާ ވިޔަފާރިތައް ދިޔައީ އިތުރުވަމުންނެވެ. ހިއުމަން ޓްރެފިކިންގެ މައްސަލައާއި މަނީ ލޯންޑަރިންގެ މައްސަލަ އިންތިހާއަށް އޮތީ ގިނަވެފައެވެ. މިއީ ޤައުމީ ކަމެއްގެ ގޮތުގައި ދެކިގެން މި މައްސަލައަށް ޙައްލެއް ހޯދަން މިހާތަނަށް މީގެ ކުރީގެ އެއްވެސް ސަރުކާރަކުން ގަދައަޅާ މަސައްކަތް ކުރިތަނެއް ނުފެނެއެވެ. ނަމަވެސް ރައީސް މުޢިއްޒުގެ ސަރުކާރުން ތަފާތެވެ.

ރާއްޖެއަށް ބިދޭސީން ގެންނަ ކުންފުނިތައް ނުވަތަ އެޖެންސީތައް އެކަށީގެންވާ ގޮތެއްގައި ހަރަކާތްތެރިކުރުވަން އޮތީ ޖެހިފައެވެ. ބިދޭސީން ފިލައިގެން ގޮސް، ޤަވާޢިދާ ޚިލާފަށް އުޅެމުން ދަނީ އެ އެޖެންސީތަކަށް ބިދޭސީން ބެލެހެއްޓޭނެ ރަނގަޅު ނިޒާމެއް ނެތުމުންނެވެ.

މި ސަރުކާރަށް އެއް އަހަރު ވާންވާއިރަށް ޤަވާޢިދާ ޚިލާފަށް އުޅޭ 5،000 ބިދޭސީން ފޮނުވައިލެވޭނެ ކަމަށް ކޮންޓްރޯލާ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަހީދު ވިދާޅުވިއެވެ. އިމިގްރޭޝަންގެ ކޮންޓްރޯލާ ޝަމްއާން ވަހީދު ވިދާޅުވީ އެއް އަހަރު ދުވަހުގެ ޓާގެޓުގެ ގޮތުގައި ކަނޑައަޅާފައިވާ 5000 ބިދޭސީން ފުރުވާލުމަށް ކުރިއަށް ގެންދެވޭ މަސައްކަތް ތަކުގެ ދަށުން ނޮވެންބަރު މަހުގެ 21 ވަނަ ދުވަހާއި ހަމައަށް 4،361 ބިދޭސީއަކު ވަނީ ފުރުވާލާފައެވެ. މި 4،361 ބިދޭސީންނަކީ ޤަވާޢިދާ ޚިލާފުވެގެން އިމިގްރޭޝަނުގެ ބެލުމުގެދަށަށް ގެންދެވި ފުރުވާލާފައިވާ ފަރާތްތަކެވެ.

އިންޑިއާއަށް ކުރެއްވި ދަތުރުފުޅު

ރާއްޖެއާއި އެހެން ޤައުމުތަކާ ދޭތެރޭގައި އޮންނާނީ ކޮންކަހަލަ ގުޅުމެއްކަން، ޚާރިޖީ ސިޔާސަތު އޮންނާނީ ކިހިނެއްކަން، އެންމެ ފުރަތަމަ، ރިޔާސީ އިންތިޚާބުގެ ކެމްޕެއިން ފަށަން ބޭއްވި، މެނިފެސްޓޯ ލޯންޗް ޖަލްސާގައި ރައީސް އިޢުލާނު ކުރެއްވެވިއެވެ. އެ ސިޔާސަތު އެއީ، ރައީސް އަބަދުވެސް ކުރިއަށް ގެންދާނެ ސިޔާސަތުކަމުގައި ވިދާޅުވިއެވެ. އެއީ، ދިވެހި ރައްޔިތުން އިސްކުރުމުގެ ސިޔާސަތެވެ. ދިވެހި ޤައުމު އިސްކުރުމުގެ ސިޔާސަތު. ރައީސް އެރޭ ވިދާޅުވެފައިވަނީ ދިވެހި ރައްޔިތުންނަށް، ދިވެހި ޤައުމަށް ފަހިވާގޮތަށް، ކަންކަން ހަމަޖެހިގެންދާ ގޮތަށް، ނޫނީ ރައްޔިތުންގެ ކަންކަމަށް، ކަންކަން ފަހިކުރެވޭގޮތަށް، އެހީތެރިކަންދޭ ހުރިހާ ޤައުމަކާ އެކީގައި ގާތް ގުޅުން ބާއްވާނެކަމަށެވެ.

މި ދަތުރަކީ އިރާދަކުރެއްވީތީ ވަރަށް ކާމިޔާބު ދަތުރެއް. ކާމިޔާބޭ އަޅުގަނޑު މިހެން މި ދަންނަވާ ސަބަބަކީ، އަޅުގަނޑު ކަނޑައެޅި މަޤްޞަދު ހާސިލުވާތީ. ދިވެހި ރައްޔިތުންނަށް ކަންކަން ފަހިވެގެންދާ ގޮތަށް، ދިވެހި ރައްޔިތުންގެ ޙައްޤުގައި، ރައްޔިތުންނަށް މުހިންމު ކަންތައްތަކަކަށް މަސައްކަތްތަކެއް ފެށި، މަގު ހުޅުވިގެންދިޔައިމާ  

ރައީސް މުޢިއްޒު

އިންޑިއާއަކީ އަޅުގަނޑުމެންނާ ވަރަށް ގާތް ގުޅުމެއް އޮތް ޤައުމެއްކަމުގައިވާ ޒަމާންވީ އެތައް ޤަރުނެއްގެ ގާތް ގުޅުމެއް އޮތް ޤައުމެކެވެ. ޑިޕްލޮމެޓިކް ގުޅުން ޤާއިމުވިތާ މި އަންނަ އަހަރަށް 60 އަހަރު ވާނެއެވެ. މި ދިޔަ 59 އަހަރުގެ ތެރޭގައި، އެކި ކަންކަމުގައި އަޅުގަނޑުމެންގެ ޤައުމަށް އިންޑިއާއިން ވަނީ އެތައްގޮތަކުން އެހީތެރިވެފައެވެ. ރާއްޖެއަށް ދިމާވި ކޮންމެ ބޮޑު ކަމެއްގައި ކޮންމެ ޙާލަތެއްގައި އެހީތެރިކަން ބޭނުންވި ކޮންމެ ވަގުތެއްގައި، އެންމެ ފުރަތަމަ އިސްކަންދިން އެއް ޤައުމަކަށް ވާނީ، އަދި ބައެއްފަހަރު އެންމެ ފުރަތަމަ އިސްކަން ދިން ޤައުމަކަށްވެސް ވަނީ އިންޑިއާއެވެ.

އެހެންކަމުން، ރާއްޖެއަށް، އަޅުގަނޑުމެންގެ ޤައުމަށް، އަޅުގަނޑުމެންގެ ރައްޔިތުންނަށް އެކި ކަންކަމުގައި، އެންމެ ފަހިވާނެގޮތަށް ކަންކަން ބައްޓަން ކުރުމުގައި، ދެ ޤައުމުގެ ގުޅުން ވަރުގަދަވެގެން ދިޔުމަކީ، އަދި އަބަދުވެސް އެގޮތުގައި އޮތުމަކީ، ރައްޔިތުންގެ ޙައްޤުގައި ރައީސް އިޢުލާނު ކުރެއްވި ސިޔާސަތުގެ ދަށުން ކުރިއަށްދާނެ، އަދި މިކަން އޮންނަންވާނެގޮތް ކަމަށް ރައީސް ދެކެވަޑައިގަތެވެ.

އިންޑިއާ ދަތުރުފުޅުން ދިވެހި ޤައުމުގެ ޙާލަތު ރަނގަޅުކޮށްދެއްވުމަށް ރައީސް މުޢިއްޒު ކުރެއްވި މަސައްކަތް ޕުޅުގެ ނަތީޖާ ވަރަށް ވެސް ފޮންޏެވެ. އިންޑިއާ ސަރުކާރުންވަނީ  400 މިލިޔަން ޑޮލަރުގެ ކަރަންސީ ސްވޮޕް އެއްބަސްވުމަކާއި، އިތުރު އެހީގެ ގޮތުގައި 30 ބިލިޔަން އިންޑިއާ ރުޕީޒް އާއި، ޓީ-ބިލް ރޯލްއޯވަރގެ ގޮތުގައި މާލީ އެހީތެރިކަން ދެއްވާފައެވެ.

އަދި ރާއްޖެ އާއި އިންޑިއާ އާ ދެމެދު މިނިވަން ވިޔަފާރީގެ އެއްބަސްވުމެއް ޤާއިމުކުރެވި، އެ އެއްބަސްވުމުގެ އެހީގައި ދެ ޤައުމަށް ހުރި އިޤްތިޞާދީ ފުރުޞަތުތަކުގެ ފުރިހަމަ ބޭނުން ހިފައި، ރާއްޖޭގެ ފަތުރުވެރިކަމާއި ތަރައްޤީގެ އެކި ދާއިރާތަކަށް އިންޑިއާއިން ކުރާ އިންވެސްޓްމަންޓް އިތުރުކުރެވޭނޭ މަގުވެސް ވަނީ ފަހިކޮށްދެއްވާފައެވެ.

 ޒަމާނުއްސުރެ ރާއްޖޭގައި ވެރިކަން ކުރަމުން އައި ސަރުކާރުތަކުގެ ޕޮލިސީއަކީ ހިލޭ އެހީ ހޯދުމެވެ. ރައްޔިތުންނަށް ވިސްނައިދެމުން އައީ މިއީ ކުޑަ، ނިކަމެތި ޤައުމެއްގެ ގޮތުގަ އެވެ. އަމިއްލައަށް ކަމެއް ނުކުރެވޭނެ، އަމިއްލައަށް ދިފާޢު ނުވެވޭނެ ޤައުމެއްގެ ގޮތުގަ އެވެ. ނަމަވެސް މިކަން ބަދަލުކޮށްދެއްވީ މިއަދުގެ ރައީސް ޑޮކްޓަރ މުޢިއްޒުއެވެ.

 ދިވެހީންގެ އަމިއްލަ ފައިސާއިން، ދިވެހީން އޮޕަރޭޓު ކުރާ ގޮތަށް، ތުރުކީއިން އަސްކަރީ ޑްރޯންތަކެއް ގެނައުމުން ގިނަބަޔަކަށް ހައިރާންކަން ލިބުނެވެ. ކުރިން ހީވެފައި އޮތީ، ޚާއްޞަކޮށް އަސްކަރީ މިފަދަ ބޮޑެތި އުޅަނދުތައް ގަނެ އޮޕަރޭޓު ކުރަން ދިވެހިންގެ ޤާބިލިއްޔަތު ތަން ނުދޭ ކަމަށެވެ. ނަމަވެސް އެވިސްނުންވެސް ބަދަލުކުރެއްވީ ރައީސް ޑޮކްޓަރ މުޢިއްޒުއެވެ.

ޑްރޯން އަދި އެހެނިހެން ވަސީލަތްތައް ގެނެސްގެން ސިފައިން ކުރިއެރުމަކީ ދިވެހީން އެދޭގޮތްކަން ސޯޝަލް މީޑިއާގައި މީހުން ފާޅުކޮށްފައިވާ ބައެއް ޚިޔާލުތަކުން ހާމވެގެންދިޔައެވެ. ޑްރޯން ގެނެސް ރާއްޖެއަށް މިވަނީ އިންޤިލާބީ ބަދަލެއް ގެނެސްދެއްވާފައެވެ. ސިފައިންނަށް މުޅިން އާ ފެށުމަކަށެވެ. އަމިއްލަ ފައިމައްޗަށް ތެދުވަން މުހިންމު ފުރުޞަތެއް ރައީސް ފަހިކޮށްދެއްވިއެވެ.

އެއްގަމާއި ކަނޑާއި ވައިގެ މަގުން ރާއްޖެ ދިފާޢުކޮށް ރައްކާތެރިކުރުމަށާއި ޙާލުގައި ޖެހޭ މީހުންނަށް އެހީތެރިވުމަށް ކުރާ މަސައްކަތްތަކަށް ބޭނުންވާ ޒަމާނީ "ޕްލެޓްފޯމްތަކާއި ވަސީލަތްތައް" އެމްއެންޑީއެފްއަށް އަންނަނީ ހޯއްދަވާދެއްވަމުންނެވެ.

މިއިން ކޮންމެ ކަމަކީ ވެސް ޤައުމެއް އެންމެ ފުރިހަމަ ގޮތުގައި ޤައުމުގެ މިނިވަންކަމާއި ސިޔާދަތު ދެމެހެއްޓުމަށް މުހިންމު ކަންކަމެވެ. މިކަންކަން އިޞްލާޙު ކުރެވި ހަމަ މަގަށް ނޭޅުވޭނަމަ ޤައުމެއް ފުރިހަމައެއް ނުވާނެއެވެ. މިއިން ކޮންމެ ކަމެއްވެސް މިސަރުކާރަށް އެއްއަހަރު ހަމަ ނުވަނީ ރައީސް މުޢިއްޒު މިވަނީ ފައްޓަވާ އެކަން ރަނުން ރަނަށް ނިންމަވާދެއްވާފައެވެ.