ރާއްޖޭގެ ތަރައްޤީގައި ޑީބީއެމްގެ ދައުރު ބޮޑު: ސީއީއޯ ނޮއެލް ގްރެގަރ

ތަރައްޤީވެފައިވާ ޤައުމަކަށްވުމަށް ރާއްޖެއިން ކުރާ ދަތުރުގައި ޑިވެލޮޕްމަންޓް ބޭންކު އޮފް މޯލްޑިވްސް (ޑީބީއެމް) އިން މުހިންމު ދައުރެއް އަދާކުރާނެކަމަށް އެ ބޭންކުގެ ސީއީއޯ ނޮއެލް ގްރެގަރ ޕެޓަރސަން-ޖޯންސް ވިދާޅުވެއްޖެއެވެ.

ޑީބީއެމް ރަސްމީކޮށް އިފްތިތާޙުކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސީއީއޯ ވިދާޅުވީ، ދިވެހިރާއްޖޭގެ އިޤްތިޞާދު އައު އުސްމިންތަކަކަށް ގެންދިޔުމުގައި ޑީބީއެމްއިން މުހިންމު ދައުރެއް އަދާކުރާނެ ކަމަށެވެ.

"ރާއްޖެއަށް މާލީ ދަތިތަކާއި ޢިމާރާތްކުރުމުގެ ދާއިރާގައި އިންވެސްޓްމަންޓް މަދުވުންފަދަ ދަތިތައް ދިމާވޭ. އަދި ރާއްޖޭގެ ދަރަނިވެސް ވަރަށް ބޮޑު. އެހެންނަމަވެސް ޑިވެލޮޕްމަންޓް ބޭންކާއެކު މާލީ ޙާލަތު ރަނގަޅުކޮށް، މަޝްރޫޢުތަކަށް އިންވެސްޓަރުން ހޯދައިދީ ޢިމާރާތްކުރުމުގެ ދާއިރާ ފުޅާކުރެވޭނެ،" ނޮއެލް ގްރެގަރ ވިދާޅުވިއެވެ.

2040 ވަނަ އަހަރު އަންނައިރު ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަޞައްވުރަށް ވާޞިލްވުމުގައި ޑީބީއެމްއިން މުހިންމު ދައުރެއް އަދާކުރާނެ ކަމަށް ސީއީއޯ ފާހަގަކުރެއްވިއެވެ.

"ޑީބީއެމްއިން ރާއްޖޭގައި ހިންގާ ތަރައްޤީގެ މަޝްރޫޢުތަކަށް އިންވެސްޓްމަންޓް ހޯދައިދިނުމުގައި މުހިންމު ދައުރެއް އަދާކުރާނެ. އަދި މިތަނުން ކުދި އަދި މެދު ފަންތީގެ ވިޔަފާރިތަކަށްވެސް ބޮޑު އެހީތެރިކަމެއް ފޯރުކޮށްދޭނެ،" ސީއީއޯ ވިދާޅުވިއެވެ.

ސަރުކާރުން ވިދާޅުވާ ގޮތުގައި ޑީބީއެމްއަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމުގެ ބޭނުމުގައި އުފެއްދެވި ބޭންކެކެވެ.