ރާާއްޖޭގެ އިޤްތިޞާދު ހަރުދަނާކުރުމަށް މިސަރުކާރުން ބޮޑެތި މަސައްކަތްތަކެއް ކުރެވިއްޖެ: ވަޒީރު ސަޢީދު

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެފައިވަނީ ރާއްޖޭގެ އިޤްތިޞާދު ހަރުދަނާ ކުރުމަށް މީގެ ކުރީގެ އެއްވެސް ސަރުކާރުން މަސައްކަތްކޮށްފައިނުވާ މިންވަރަށް ވޭތުވެދިޔަ އެއް އަހަރު ދުވަހު މަސައްކަތްކޮށްފައިވާ ކަމަށެވެ. މި ވާހަކަ ވަޒީރު ދައްކަވާފައިވަނީ އިއްޔެ ބޭއްވުނު ޑިވެލޮޕްމެންޓް ބޭންކް އޮފް މޯލްޑިވްސް އިފްތިތާޙްކުރުމުގެ ރަސްމިއްޔާތުގައެވެ.

ވަޒީރު ސަޢީދު ވިދާޅުވި ގޮތުގައި ނިމިގެންދިޔަ ސަރުކާރުން މުޅި އިޤްތިޞާދު ފުނޑާލުމަށްފަހު، އަލަށް އަންނަ ވެރިއަކަށް ޤައުމު ނަގައި ކޮޅަށް ޖެހުމަކީ ފަސޭހަކަމަކަށް ނުވާވަރަށް ކަންކަން ކޮށްފައިވެއެވެ. ނަމަވެސް، މިދިޔަ އެއް އަހަރުގެ ތެރޭގައި އިޤްތިޞާދު ހަރުދަނާ ކުރުމަށް މުހިންމު ފިޔަވަޅުތަކެއް އަޅާފައިވާކަމަށް ވަޒީރު ފާހަގަކުރެއްވިއެވެ.

އޭގެ ތެރޭގައި ބޭރު ފައިސާގެ ދަތިކަން ހައްލުކުރުމަށް ބަދަލުތަކެއް ގެނައުމާއި، ދިގު ޒަމާންތަކެއް ވަންދެން ކުރިއަށް ގެންދިޔަ ނާކާމިޔާބު އަދި ދެމެހެއްޓެނިވި ނޫން ސަބްސިޑީތައް ހައްލުކުރުމާއި، ސިޔާސީ ގޮތުން ޚަރަދު ބޮޑު ހަރަދުތައް ރޭޝަނަލައިޒް ކުރުމުގެ މަސައްކަތްތައް ހިމެނެއެވެ.

ޑިވެލޮޕްމަންޓް ބޭންކް އޮފް މޯލްޑިވްސްއަކީ ރާއްޖޭގައި ފުރަތަމަ ފަހަރަށް ޤާއިމުކުރާ ޑިވެލޮޕްމެންޓް ބޭންކެއް ކަމަށާއި، މިއީ ރައީސް ޑރ. މުޙައްމަދު މުޢިއްޒުގެ ދުރުވިސްނޭ ސިޔާސަތުގެ ދަށުން އިޤްތިޞާދު ސިންދަފާތު ކުރުމަށް ކުރެވޭ މުހިންމު މަސައްކަތެއްކަމަށް ވަޒީރު ސަޢީދު ވިދާޅުވިއެވެ. މި ބޭންކަކީ އިންފްރާސްޓްރަކްޗަރ މަޝްރޫޢުތަކަށް ފައިނޭންސް ދިނުމާއި، އަމިއްލަ ވިޔަފާރިތަކަށް އެހީތެރިވުމާއި، އިޤްތިޞާދީ ކުރިއެރުމަށް އަދި ދެމެހެއްޓެނިވި ގޮތެއްގައި ކުރިއަށް ގެންދިއުމުގައި މުހިންމު ދައުރެއް އަދާކުރާނެ ބޭންކެއްކަމަށްވެސް ވަޒީރު ފާހަގަކުރެއްވިއެވެ.

މީގެ އިތުރުން، މާލީ ދާއިރާ ފުޅާކޮށް، ފަހި މާހައުލެއް ޤާއިމް ކުރުމަށް ފައިނޭންޝަލް ސެންޓަރާ ގުޅޭ ޤާނޫނެއް ކުރިއަށް އޮތް ދެތިން ހަފްތާ ތެރޭގައި މަޖިލީހަށް ފޮނުވާނެ ކަމަށް ވަޒީރު ސަޢީދު ހާމަކުރެއްވިއެވެ. އަދި އިންޓަރނޭޝަނަލް ފައިނޭންޝަލް ސެންޓަރު ހެދުމަށް ޤަޠަރު ފައިނޭންޝަލް ސެންޓަރާއި ދުބާއީ ފައިނޭންޝަލް ސެންޓަރާއި އަބޫދާބީ ގްލޯބަލް މާކެޓުގެ އެހީތެރިކަން ލިބޭނެކަމަށްވެސް ވަޒީރު ސަޢީދު ވިދާޅުވިއެވެ.

ވަޒީރު ސަޢީދު އިތުރަށް ވިދާޅުވި ގޮތުގައި، ޑިވެލޮޕްމަންޓް ބޭންކަކީ ކާމިޔާބު ބޭންކަކަށް ހެދުމަށްޓަކައި މުހިއްމު މަސައްކަތްތަކެއް ކުރަން ޖެހޭނެއެވެ. އަދި މި ބޭންކާއެކު އެހެން މާލީ ޚިދުމަތްތައް ފުޅާ ކުރުމަށްވެސް އެހީތެރިވާނެ ކަމަށް ވިދާޅުވިއެވެ. މީގެ ތެރޭގައި އިންވެސްޓްމެންޓް ބޭންކިންގ، ހޯލްސޭލް ބޭންކިންގ، އެސެޓް މެނޭޖްމެންޓް ކުންފުނިތައް، ހެޖް ފަންޑުތައް، މެރިޓައިމް އިންޝުއަރެންސް ސަރވިސަސް އަދި އިސްލާމިކް ފައިނޭންސް ފަދަ ޚިދުމަތްތައް ފެށުމަށް އެހީތެރިވެދޭނެ ކަމަށް ވަޒީރު ސަޢީދު ވިދާޅުވިއެވެ.

މި ރަސްމިއްޔާތުގައި ވަޒީރު ސަޢީދު ދެއްކެވި ވާހަކަފުޅުން އެނގިގެންދިޔައީ، ރާއްޖޭގެ އިޤްތިޞާދު ހަރުދަނާކޮށް ކުރިއެރުވުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާކަމެވެ. ޚާއްޞަކޮށް ޑިވެލޮޕްމަންޓް ބޭންކް އޮފް މޯލްޑިވްސް ޤާއިމުކުރުމަކީ އިޤްތިޞާދީ ގޮތުން ރާއްޖެއަށް ލިބިިބިގެންދާނެ ވަރަށް ބޮޑު ކުރިއެރުމެއް ކަމަށް ވަޒީރު ސަޢީދު ފާހަގަކުރެއްވިއެވެ.