ޗާގޯސްއަށް ނިސްބަތްވާ ހަތަރު މީހަކު މޮރިޝަސްއާ ޗާގޯސް ހަވާލުކުރުމަށް ރަށުން ފޭބުމަށް ދެކޮޅު ހަދައިފި

އިނގިރޭސިވިލާތުން ޗާގޯސް ޖަޒީރާ (ފޯޅަވަހި) މޮރިޝަސްއާ ހަވާލުކުރުމަށް ނިންމާފައިވާ ނިންމުމާ ދެކޮޅު ހެދުމުގެ ގޮތުން، އެ ރަށްތަކަށް ނިސްބަތްވާ ހަތަރު މީހަކު އެނބުރި ރަށަށް ގޮސް އެތަނުން ފޭބުމަށް ދެކޮޅު ހަދައިފިއެވެ.

މިދިޔަ ހޯމަ ދުވަހު، ޗާގޯސްގެ އަސްލު ވަޒަންވެރިންގެ ތެރެއިން ހަތަރު މީހަކު ވަނީ އިނގިރޭސިވިލާތުގެ ކޮންޒަވޭޓިވް ޕާޓީގެ ކުރީގެ މެންބަރެއް ކަމަށްވާ އެޑަމް ހޮލޮވޭއާއެކު، ޕެރޯސް ބަންހޯސްގެ ކޮއިން އައިލެންޑަށް ގޮސްފައެވެ. މި މީހުން އެ ރަށުން ބޭލުމަށްޓަކައި ބުދަ ދުވަހު އިނގިރޭސި ކަނޑުގެ ސިފައިންގެ ޕެޓްރޯލް ޓީމަކުން މަސައްކަތް ކުރި ނަމަވެސް، އެ މީހުން ވަނީ އެ ރަށުން ފޭބުމަށް އިންކާރުކޮށްފައެވެ.

މި ހަރަކާތުގައި އިސްކޮށް އުޅޭ، ޗާގޯސްގެ  "ގަވަރމަންޓް-އިން-އެގްޒައިލް" ގެ ފަސްޓް މިނިސްޓަރ މިސްލީ މެންޑަރިން ބުނީ، އިނގިރޭސިވިލާތުން އެމީހުންގެ ވަޒަން މޮރިޝަސްއާ ހަވާލުކުރަން ނިންމި ނިންމުމާ ދެކޮޅު ހެދުމުގެ ގޮތުން އެ ރަށުގައި މަޑުކުރާނެ ކަމަށެވެ. އޭނާ ބުނި ގޮތުގައި އެމީހުން ބޭނުންވަނީ ޗާގޯސްއަކީ އިނގިރޭސިވިލާތުގެ ބައެއްގެ ގޮތުގައި ބޭއްވުމަށާއި، ދުނިޔޭގައި ތިބި އެ ރަށްތަކުގެ އަސްލު 322 ވަޒަންވެރިންނަށް އެނބުރި އާދެވޭނެ ގޮތްވުމަށެވެ.

ފޭސްބުކް މެދުވެރިކޮށް އާންމުކުރި ވީޑިއޯއެއްގައި މެންޑަރިން ވަނީ އިނގިރޭސި ބޮޑުވަޒީރު ކިއަރ ސްޓާމަރަށާއި މޮރިޝަސް ސަރުކާރަށް ގޮންޖަހައި، އެމީހުން އެ ރަށުން ބޭރުކޮށްލުމަށް ދަންނަވާފައެވެ. އޭނާ ބުނީ އެމީހުންނަށް ގާނޫނީ ވަކީލުންގެ އެހީތެރިކަން ލިބެމުންދާ ކަމަށެވެ. މެންޑަރިންއާއެކު މި ދަތުރުގައި އޭނާގެ އުމުރުން 72 އަހަރުގެ ބައްޕަ މިޝޭލް މެންޑަރިން ވެސް ބައިވެރިވެއެވެ. މިޝޭލްއަކީ އުމުރުން 14 އަހަރުގައި އެ ރަށުން މަޖުބޫރުން ބޭރުކޮށްލެވުނު މީހެކެވެ.

މިކަމާ ގުޅިގެން މޮރިޝަސްގެ ޖަސްޓިސް މިނިސްޓަރު ގަވިން ގްލޯވާ ވިދާޅުވީ، މިއީ އިނގިރޭސި ޕާލަމެންޓުގައި މި އެއްބަސްވުމާ މެދު ބަހުސްކުރުމަށް ހަމަޖެހިފައި ވަނިކޮށް، ސަމާލުކަން ހޯދުމަށް ހިންގާ "ޕަބްލިސިޓީ ސްޓަންޓެއް" ކަމަށެވެ. އަދި މޮރިޝަސް ސަރުކާރުން އޮތީ ޗާގޯސްގެ ރައްޔިތުންނަށް އެނބުރި ވަޒަނަށް އާދެވޭނެ މަގު ވީހާވެސް އަވަހަކަށް ފަހިކޮށްދިނުމަށް އިޚްލާޞްތެރިކަމާއެކު ތައްޔާރަށް ކަމަށްވެސް އޭނާ ވިދާޅުވިއެވެ.

ޗާގޯސްގެ މި މައްސަލައަކީ 1960 ގެ އަހަރުތަކުގައި މޮރިޝަސްއަށް މިނިވަންކަން ދިންއިރު އިނގިރޭސިވިލާތުން އެ ޖަޒީރާތައް ވަކިކޮށް، އެމެރިކާގެ އަސްކަރީ މަރުކަޒެއް ހެދުމަށްޓަކައި އެތަނުގެ ވަޒަންވެރިން ބޭރުކޮށްލި ހިސާބުން ފެށިގެން އުފެދިފައިވާ މައްސަލައެކެވެ. މިދިޔަ މޭ މަހު އިނގިރޭސިވިލާތުން ވަނީ ޑިއޭގޯ ގާސިއާގައި އޮތް އަސްކަރީ މަރުކަޒު ދަމަހައްޓާ ގޮތަށް، އެހެން ރަށްތަކުގެ ސިޔާދަތީ ބާރު މޮރިޝަސްއާ ހަވާލުކުރުމަށް އެއްބަސްވެފައެވެ. މިއީ އިންސާނީ ހައްގުތަކަށް މަސައްކަތްކުރާ ޖަމާއަތްތަކުންނާއި އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްގެ ފާޑުކިޔުންތައް ވެސް އަމާޒުވެފައިވާ އެއްބަސްވުމެކެވެ.