ރާއްޖޭގެ ފުރަތަމަ އިންވެސްޓްމަންޓް ބޭންކް ރައީސް މުޢިއްޒު އިފްތިތާޙުކޮށްދެއްވައިފި

ރާއްޖޭގެ ފުރަތަމަ އިންވެސްޓްމަންޓް ބޭންކް ރައީސް މުޢިއްޒު އިފްތިތާޙުކޮށްދެއްވައިފިއެވެ.

ތަރައްޤީގެ މަޝްރޫޢުތަކަށް ބޭނުންވާ ފައިސާ ފަހިކޮށްދިނުމަށް އަމާޒުކޮށްގެން އުފައްދާފައިވާ "ޑިވެލޮޕްމަންޓް ބޭންކް އޮފް މޯލްޑިވްސް" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިފްތިތާޙުކޮށްދެއްވައިފިއެވެ. މިއީ ރާއްޖޭގައި ފުރަތަމަ ފަހަރަށް ޤާއިމުކުރެވުނު އިންވެސްޓްމަންޓް ބޭންކެވެ.

ރައީސް މުޢިއްޒުގެ ރިޔާސީ ވަޢުދެއްގެ ގޮތުގައި އުފެއްދެވި މި ބޭންކުގެ މައިގަނޑު މަޤްޞަދަކީ ކުޑަ އިންޓްރެސްޓް ރޭޓެއްގައި ތަރައްޤީގެ މުހިންމު މަޝްރޫޢުތަކަށާއި އަމިއްލަ ބޮޑެތި އިންވެސްޓްމަންޓްތަކަށް ލޯނު ލިބޭނެ މަގު ތަނަވަސްކޮށްދިނުމެވެ. މޯލްޑިވްސް ޑިވެލޮޕްމަންޓް ބޭންކް ލިމިޓެޑްގެ ނަމުގައި މި ބޭންކް އުފެއްދެވީ މިއަހަރުގެ މެއި 16 ވަނަ ދުވަހުއެވެ.

ބޭންކުގެ ބޯޑަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން 3 މެންބަރުން އޮގަސްޓު 21 ވަނަ ދުވަހު އައްޔަންކުރިއެވެ. އަދި އޮގަސްޓު 26 ވަނަ ދުވަހު އަރޫނީ ގޫނަތިލަކަ ބޭންކުގެ ޗެއަރޕަރސަންކަމަށާއި ނޮއެލް ގްރެގަރ ޕެޓަރސަން-ޖޯންސް ސީއީއޯކަމަށް އައްޔަންކުރެވުނެވެ.

އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެފައިވަނީ މި ބޭންކަކީ ދިވެހިރާއްޖެއާއި ބައިނަލްއަޤްވާމީ މާލީ އިދާރާތަކާއި އިންވެސްޓަރުންނާ ގުޅިގެން ތަރައްޤީގެ މަޝްރޫޢުތަކަށް ބޭނުންވާ ފައިސާ ރާއްޖެއަށް ފަހިކުރުމުގެ ބައިވެރިއަކަށް ވާނެ ކަމަށެވެ. އަދި ހަމައެކަނި ދަރަނީގެ ގޮތުގައި ނޫން ގޮތްގޮތުންވެސް މާލީ އަދި ފަންނީ އެހީތެރިކަން ފޯރުކޮށްދޭނެ ކަމަށް ވަޒީރު ވިދާޅުވިއެވެ.

މި ބޭންކުގެ މައިގަނޑު މަޤްޞަދުތަކުގެ ތެރޭގައި ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުން ހިމެނެއެވެ. އަދި ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމަކީވެސް މި ބޭންކުގެ އަމާޒެކެވެ.