ރާއްޖޭގެ ކަނޑުގެ ސަރަހައްދުގައި ގަވާއިދާ ޚިލާފަށް ދުއްވަމުންދިޔަ ބޯޓެއް ޑްރޯންގެ އެހީގައި ކޯސްޓްގާޑުގެ ބެލުމުގެ ދަށަށް

ރާއްޖޭގެ ކަނޑުގެ ސަރަހައްދުގައި ގަވާއިދާ ޚިލާފަށް ދުއްވަމުންދިޔަ ބޭރު ޤައުމެއްގެ ބޯޓެއް ދިވެހި ސިފައިންގެ ކޯސްޓްގާޑުގެ ބެލުމުގެ ދަށަށް ގެނެސްފިއެވެ. މި ބޯޓު ހިފެހެއްޓީ ދިވެހިރާއްޖޭގެ ޤައުމީ ދިފާޢީ ބާރުން (އެމްއެންޑީއެފް) ހިންގި ޚާއްޞަ އޮޕަރޭޝަނެއްގައެވެ.

އެމްއެންޑީއެފްއެފްއިން ބުނި ގޮތުގައި، މި އޮޕަރޭޝަން ހިންގީ އެމްއެންޑީއެފް އެއަރ ކޯރގެ ޑްރޯން ބޭނުންކޮށްގެންނާއި އެމްއެންޑީއެފް ކޯސްޓްގާޑު ގުޅިގެންނެވެ. މި އޮޕަރޭޝަނަކީ ރާއްޖޭގެ އުތުރުގެ ސަރަހައްދު ބެލެހެއްޓުމަށް ހިންގި އޮޕަރޭޝަނެކެވެ. ޤާނޫނާ ޚިލާފަށް ރާއްޖޭގެ ސަރަޙައްދުގައި އުޅެނިކޮށް މި ބޯޓު ފެނުނީ ޑްރޯނުން ކަމަށް ދިފާޢީ ބާރުން ބުންޏެވެ.

މި އޮޕަރޭޝަން ކާމިޔާބުވުމުގައި މުހިންމު ދައުރެއް އަދާކޮށްފައިވަނީ އެމްއެންޑީއެފް އެއަރކޯއިންނެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަހުން އިފްތިތާޙްކުރެއްވި ދިވެހިރާއްޖޭގެ ޤައުމީ ދިފާޢީ ބާރުގެ އައު ގޮތްޕެކެވެ. އެއަރކޯއާއެކު 24 ގަޑިއިރު ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ޤާބިލުކަން ދިފާޢީ ބާރަށް ލިބިފައިވެއެވެ.

އެއަރކޯގައި ބޭނުންކުރަނީ އަންމޭންޑް އޭރިއަލް ވެހިކަލް (ޔޫއޭވީ) ތަކެކެވެ. މި ޔޫއޭވީތަކަކީ 220 ކިލޯމީޓަރުގެ ބާރުމިނުގައި މެދުނުކެނޑި 20 ގަޑިއިރު ދުއްވުމުގެ ޤާބިލްކަން ލިބިފައިވާ އުޅަނދުތަކެކެވެ. އަދި ރޭގަނޑު އަނދިރީގައިވެސް ސަރޗް އެންޑް ރެސްކިއު އޮޕަރޭޝަންތައް ހިންގުމުގެ ޤާބިލުކަން މި އުޅަނދުތަކަށް ލިބިފައިވެއެވެ.

މި އައު ޓެކްނޮލޮޖީ ތަޢާރަފުވުމުގެ ކުރިން، ރާއްޖޭގެ ކަނޑުގެ ސަރަހައްދު ސިފައިން ބަލަހައްޓަމުންދިޔައީ ބޮޑެތި ދަތިތަކާއެކު، ހަމައެކަނި ކޯސްޓުގާޑު ކަނޑުގެ އުޅަނދުތައް ބޭނުންކޮށްގެންނެވެ. އެހެންކަމުން، މި އައު ޓެކްނޮލޮޖީ ތަޢާރަފުވުމާއެކު ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ޤާބިލުކަން އިތުރުވެގެން ގޮސްފައިވާކަން ފާހަގަކުރެވެއެވެ.

އަދި ކޯސްޓްގާޑުން މި ބޯޓް އިންޓަރސެޕްޓް ކުރުމަށްފަހު މިހާރު ވަނީ ކޯސްޓްގާޑްގެ ބެލުމުގެ ދަށަށް ގެނެވިފަ. pic.twitter.com/SK32QtLbUi

— Maldives National Defence Force (@MNDF_Official) November 16, 2024