ސްޓެލްކޯގެ އެމްޑީ ރައީސް މުޢިއްޒަށް މަރުހަބާ ދަންނަވައިފި

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިންގ ޑިރެކްޓަރ ހުސެއިން ފަހުމީ ކުރެއްވި އެކްސް ޕޯސްޓެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް މަރުހަބާ ދަންނަވައި، އެމަނިކުފާނުގެ ވެރިކަމުގެ ފުރަތަމަ އަހަރު ފުރުމާ ގުޅިގެން ތަހުނިޔާ ދަންނަވައިފިއެވެ.

ފަހުމީ ޕޯސްޓްގައި ބަޔާންކުރެއްވި ގޮތުގައި ރައީސް މުޢިއްޒު ވެރިކަމާ ހަވާލުވެވަޑައިގަތީ ދިވެހި ރައްޔިތުންގެ ފުރިހަމަ ތާއީދާއެކު، ޤައުމާއި ރައްޔިތުންގެ ޙައްޤުގައި ކުރައްވަންޖެހޭ ކޮންމެ ކަމެއް ފަސްޖެހިވަޑައިނުގެން ކުރައްވާނެކަމުގެ ޔަޤީންކަން ދެއްވަމުންނެވެ. އަދި އެ ދުވަހު ކުރެއްވި ހުވަޔާއި ދެއްވި ޔަޤީންކަމާ އެއްގޮތަށް، އެތެރެއާއި ބޭރުގެ ނުފޫޒުތަކަށް ބެއްލެވުމެއްނެތި، ދިވެހިރާއްޖެއަކީ އަރަނިވެރި، ތިޔާގި އަދި މާލީ ބުރަތަކަށް ވިލުންވެރި ޤައުމަކަށް ހެއްދެވުމަށް ރައީސް އަޅުއްވަމުން ގެންދަވާ ހިތްވަރުގަދަ ފިޔަވަޅުތަކުން އެކަނިވެސް، ޤައުމާއި ރައްޔިތުންދެކެ އެމަނިކުފާނުގެ ހިތްޕުޅުގައި އޮތް ލޯބި ހާމަވާމަވެގެންދާކަމަށް ފަހުމީ ފާހަގަކުރެއްވިއެވެ.

މީގެއިތުރުން، ޞިއްޙީގޮތުން ދުޅަހެޔޮ މުޖުތަމަޢުއެއް ބިނާކުރުމަށް ނިންމަވަންޖެހޭ ނިންމެވުންތައް ނިންމަވައި، އެކަންކަން ތަންފީޛު ކުރައްވަމުން ގެންދަވާ ހަލުވިކަމާއި، ރައްޔިތުންގެ ލާބަޔާއި މަންފާއަށް ނިންމަވަންޖެހޭ ކޮންމެ ނިންމެވުމެއް އޭގެ އެންމެ ފުރިހަމަ ގޮތުގައި ނިންމަވައި، ތަންފީޛުކުރެއްވުމުގައި ގެންގުޅުއްވާ ހަރުދަނާ ސިޔާސަތުތަކާމެދު، ދިވެހި ޤައުމު ދެކެ ލޯބިވާ ރައްޔިތެއްގެ ހައިސިއްޔަތުން ފަޚުރުވެރިވާކަމަށް ފަހުމީ ވިދާޅުވިއެވެ.

ފަހުމީ އިތުރަށް ވިދާޅުވީ މިއީ ހަމައެކަނި ސަރުކާރަށް އަހަރު ފުރުނު ދުވަހެއް ނޫންކަމަށާއި، މިއީ ރައްޔިތުންގެ އުއްމީދުތަކާއި އާ ކާމިޔާބީތަކުގެ ފެށުމުގެ އަހަރު ފުރުންކަމަށެވެ. އަދި ސަރުކާރުން ދިވެހި ރައްޔިތުންނަށް ދެއްކީ އޯގާތެރިކަމާއި ހިތްވަރުގަދަކަމުގެ ނަމޫނާކަމަށް ފާހަގަކުރެއްވިއެވެ.

ދިވެހި ރައްޔިތުންގެ ފުރިހަމަ ތާއީދާއެކު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމުގެ ހުވާ ކުރައްވައި، ޤައުމުގެ ހުންގާނާ ހަވާލުވެވަޑައިގަތީ ޤައުމާއި ރައްޔިތުންގެ ޙައްޤުގައި ކުރައްވަންޖެހޭ ކޮންމެ ކަމެއް ފަސްޖެހިވަޑައިނުގެން ކުރައްވާނެކަމުގެ ޔަޤީންކަން ދެއްވަމުން. އެ… pic.twitter.com/OFAHpwEp8g

— Hussain Fahmy (@HussainFahmy09) November 17, 2024