އެމެރިކާގެ ފިއްތުންތަކަށް އީރާނުން ބޯނުލަނބާނެ ކަމަށް ރައީސް ޕެޒެޝްކިއަން ވިދާޅުވެއްޖެ

އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެމެރިކާއިން ކުރިމަތިކުރަމުންދާ ފިއްތުންތަކަށް އެ ގައުމުން ބޯނުލަނބާނެ ކަމަށް އީރާނުގެ ރައީސް މަސްއޫދު ޕެޒެޝްކިއަން ވިދާޅުވެއްޖެއެވެ. ރައީސް ޕެޒެޝްކިއަން މިހެން ވިދާޅުވީ، އީރާނާއެކު އެއްބަސްވުމަކަށް އައުމަށް މަޖުބޫރުކުރުވުމުގެ ގޮތުން އެ ގައުމަށް ހަމަލާދިނުމަށް ވިސްނަމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވާ ދަނޑިވަޅެއްގައެވެ.

އީރާނުގެ ޕެރަލިމްޕިކް ޓީމުގެ މެންބަރުންނަށް އިހުތިރާމް އަދާކުރުމަށް ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ޕެޒެޝްކިއަން ވިދާޅުވީ، ދުނިޔޭގެ ބާރުތަކުން އީރާނަށް ބިރުދައްކައި ބޯލަނބުވަން މަސައްކަތް ކުރަމުންދާ ކަމަށެވެ. "އަޅުގަނޑުމެން މި ކުރިމަތިވާ އެއްވެސް ދަތިކަމަކަށް ބޯނުލަނބާނަން،" އޭނާ ވިދާޅުވިއެވެ. އަދި ދުނިޔޭގެ ބާރުތަކުން ފިނޑިކަމާއެކު އީރާނުގެ ބޯ ތިރިކުރުވަން މަސައްކަތް ކުރި ނަމަވެސް، އެކަން ކާމިޔާބު ނުވާނެ ކަމަށް އޭނާ ވިދާޅުވިއެވެ.

މި ދަނޑިވަޅަކީ ގަލްފް ސަރަހައްދުގައި އެމެރިކާގެ އަސްކަރީ ބާރު ގަދަކުރަމުންދާ ވަގުތެކެވެ. އެގޮތުން އެމެރިކާއިން ވަނީ ދެ އެއާކްރާފްޓް ކެރިއަރާއި ގިނަ އަދަދެއްގެ ޖެޓްތައް އެ ސަރަހައްދަށް ފޮނުވާފައެވެ. މިއީ 2003 ވަނަ އަހަރު އިރާގަށް އެރި ފަހުން އެމެރިކާއިން އެ ސަރަހައްދުގައި އެންމެ ބޮޑަށް ވައިގެ ބާރު ވަރުގަދަކުރި ފަހަރެވެ. މިހާރުވެސް 120 އަށްވުރެ ގިނަ މަތިންދާބޯޓު އެ ސަރަހައްދަށް ފޮނުވާފައިވާއިރު، ދުނިޔޭގެ އެންމެ ބޮޑު އެއާކްރާފްޓް ކެރިއަރު 'ޔޫއެސްއެސް ޖެރަލްޑް އާރް ފޯޑް' ވެސް ދަނީ އެ ސަރަހައްދަށް ދަތުރުކުރަމުންނެވެ.

އީރާނާއި އެމެރިކާއާ ދެމެދު ނިއުކްލިއާ ވާހަކަތައް މި މަހުގެ ކުރީކޮޅު އޮމާންގައި ފަށާފައިވާއިރު، މިދިޔަ ހަފުތާގައި ސްވިޒަލޭންޑްގައި ވަނީ ދެވަނަ ބުރެއް ބާއްވާފައެވެ. އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވި ގޮތުގައި، ޑިޕްލޮމެޓިކް ހައްލެއް މިހާރު އޮތީ ވަރަށް ގާތުގައެވެ. އަދި ކުރިއަށް އޮތް ދެތިން ދުވަހެއްގެ ތެރޭގައި އެއްބަސްވުމުގެ ދެލިކޮޕީއެއް ފައިނަލްކޮށް އެމެރިކާއަށް ފޮނުވުމަށް އީރާނުން ދަނީ ތައްޔާރުވަމުންނެވެ.

ނަމަވެސް، އީރާނުގެ އާންމު ރައްޔިތުންގެ މެދުގައި ހަނގުރާމައެއް ފެށިދާނެ ކަމުގެ ބިރުވެރިކަން ވަނީ އުފެދިފައެވެ. ތެހެރާންގައި ދިރިއުޅޭ ބައެއް ރައްޔިތުން ބުނާ ގޮތުގައި، އެމެރިކާއިން ބޭނުންވަނީ އީރާނުން އަމާންދިނުމަށެވެ. އެހެންނަމަވެސް، އަނެއްބަޔަކު ގަބޫލުކުރާ ގޮތުގައި އެމެރިކާއަށް އީރާނުގެ މައްޗަށް ގަދަވެގަނެވޭނެ ފަދަ އަސްކަރީ ބާރެއް ނެތެވެ.

މިދިޔަ އަހަރުވެސް މިފަދަ ވާހަކަތަކެއް ދެ ގައުމުގެ ދެމެދުގައި ކުރިއަށްދިޔަ ނަމަވެސް، އިޒްރޭލުން އީރާނަށް ދިން ހަމަލާތަކާ ގުޅިގެން އެ މަސައްކަތް ވަނީ ހުއްޓިފައެވެ. އޭރު އެމެރިކާއިން ވަނީ އީރާނުގެ ތިން ނިއުކްލިއާ ސައިޓަކަށް ބޮން އަޅާފައެވެ. މިހާރު އުފެދިފައިވާ ނުތަނަވަސްކަމާއެކު، އީރާނުން ވަނީ އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީ، ތެޔޮ އެކްސްޕޯޓް ކުރުމަށް މުހިންމު މަގަކަށްވާ ހޯރްމުޒް ކަނޑުއޮޅި ބަންދުކޮށްފާނެ ކަމުގެ އިންޒާރުވެސް ދީފައެވެ.