އިންޑިއާގެ މަދްޔަޕްރަދޭޝްގައި ކޮންމެ ދުވަހަކު 130 އަންހެނުން ގެއްލޭކަން ހާމަވެއްޖެ

އިންޑިއާގެ މަދްޔަޕްރަދޭޝް ސްޓޭޓުން ކޮންމެ ދުވަހަކު އެވްރެޖްކޮށް 130 އަންހެނުންނާއި އަންހެން ކުދިން ގެއްލޭކަމުގެ ބިރުވެރި ތަފާސްހިސާބުތަކެއް އެ ގައުމުގެ އެސެމްބްލީއަށް ހުށަހަޅައިފިއެވެ.

މި ހިސާބުތައް ހާމަވެފައިވަނީ ކޮންގްރެސްގެ އެމް.އެލް.އޭ ވިކްރަންތު ބޫރިއާ ކުރެއްވި ސުވާލަކަށް ޖަވާބު ދެއްވަމުން، އެ ސްޓޭޓްގެ ޗީފް މިނިސްޓަރު މޯހަން ޔާދަވް ދެއްވި ލިޔުމުން ދެއްވި ޖަވާބަކުންނެވެ. އެ ޖަވާބުގައިވާ ގޮތުން 2020 ވަނަ އަހަރުން ފެށިގެން 2026 ވަނަ އަހަރުގެ ޖެނުއަރީ 28 އާ ހަމައަށް ޖުމްލަ 274,311 އަންހެނުންނާއި އަންހެން ކުދިން ގެއްލިފައިވާ ކަމަށް ރިޕޯޓްކޮށްފައިވެއެވެ.

ތަފާސްހިސާބުތަކަށް ބަލާއިރު، ކޮންމެ އަހަރަކު ގާތްގަނޑަކަށް 45,000 އަންހެނުން ގެއްލޭއިރު، މިއީ ކޮންމެ މަހަކު 3,700 މީހުންނެވެ. ސަރުކާރުން ހާމަކުރި ގޮތުގައި މީގެ ތެރެއިން 235,977 މީހުން ފެނިފައިވީ ނަމަވެސް، 68,334 އަންހެނުން އަދިވެސް ވަނީ ނުފެނިއެވެ. މިއީ އެތައް ހާސް އާއިލާއެއްގެ ކަންބޮޑުވުމާއި އިންތިޒާރާ ގުޅިފައިވާ ބޮޑު މައްސަލައެކެވެ.

ގެއްލޭ މީހުންގެ އަދަދު އަހަރުން އަހަރަށް އިތުރުވަމުންދާކަންވެސް މި ރިޕޯޓުން ހާމަވެއެވެ. އެގޮތުން 2020 ވަނަ އަހަރު 30,000 އަށް ވުރެ ގިނަ އަންހެނުން ގެއްލުނުއިރު، 2023 ވަނަ އަހަރު މި އަދަދު ވަނީ 40,000 އަށް ވުރެ މައްޗަށް އަރާފައެވެ. އަދި 2026 ވަނަ އަހަރުގެ ފުރަތަމަ މަދު ހަފުތާތަކުގެ ތެރޭގައި އެކަނިވެސް 1,000 އަށް ވުރެ ގިނަ އަންހެނުން ގެއްލިފައިވާ ކަމަށް ރިޕޯޓްކޮށްފައިވެއެވެ.

މި މައްސަލަ އެންމެ ބޮޑަށް ފާހަގަކުރެވެނީ އިންދޯރް، ބޯޕާލް، ގުވަލިއޯ އަދި އުޖައިން ފަދަ ބޮޑެތި ސިޓީތަކުގައެވެ. މިފަދަ ގިނަ ހާދިސާތަކުގެ ފަހަތުގައި އިންސާނީ ވަގުފާރި ކުރާ ނެޓްވޯކްތަކާއި، މަޖުބޫރުން ކުރުވާ ކައިވެނިތަކުގެ އިތުރުން ނިޒާމީ ބަލިކަށިކަން ހިމެނޭ ކަމަށް ކަމާބެހޭ ފަރާތްތަކުން ތުހުމަތު ކުރެއެވެ.

މިކަމާ ގުޅޭގޮތުން ވާހަކަ ދައްކަވަމުން އެމް.އެލް.އޭ ވިކްރަންތު ބޫރިއާ ވިދާޅުވީ، މިއީ ހަމައެކަނި އަމާންކަމުގެ މައްސަލައެއް ނޫން ކަމަށާއި، މިއީ އިންސާނީ ބޮޑު ކާރިސާއެއް ކަމަށެވެ. އަދި މިއީ ނިޒާމު ފެއިލްވުން ކަމަށް ސިފަކުރައްވައި، މިކަމުގައި ޒިންމާދާރުކުރުވުމާއި ދެފުށް ފެންނަ ނިޒާމެއް ބޭނުންވާ ކަމަށް އޭނާ ވިދާޅުވިއެވެ.

ސަރުކާރުން މި ހިސާބުތައް ކަށަވަރުކޮށްދިން ނަމަވެސް، ނުފެނި ތިބި މީހުން ހޯދުމަށް އާ ސްޓްރެޓެޖީއެއް މިހާތަނަށް އިއުލާނުކޮށްފައެއް ނުވެއެވެ.