ރޮނާލްޑޯ ފުޑްބޯޅަ ކުޅުން ހުއްޓާލާކަމުގެ އިޝާރާތެއް ދީފި

 ކްރިސްޓިއާނޯ ރޮނާލްޑޯ ވަނީ ކުރިއަށް އޮތް އަހަރެއް ނުވަތަ ދެ އަހަރު ދުވަހުގެ ތެރޭގައި ފުޓްބޯޅަ ކުޅުން ހުއްޓާލާނެކަމުގެ އިޝާރާތެއް ދީފިއެވެ. މި ވާހަކަ ރޮނާލްޑޯ ދެއްކީ ޔުއެފާ ނޭޝަންސް ލީގުގައި ޕޮލެންޑް އަތުން 1-5 އިން ޕޯޗުގަލް މޮޅުވި މެޗަށްފަހު ނޫސްވެރިންނަށް ދިން އިންޓަވިއުއެއްގައެވެ.

ރޮނާލްޑޯ ބުނީ، "ރިޓަޔާކުރުމުގެ ޕްލޭން؟ އެކަން ކުރަންޖެހޭ ހާލަތު ދިމާވުމުން އަހަރެއް ނުވަތަ ދެ އަހަރުގެ ތެރޭގައި ކުޅުން ހުއްޓާލާނަން. ކަނޑައެޅިގެން ބުނާކަށް ނޭނގޭ." މީގެ އިތުރުން، ފުޓްބޯޅަ ކުޅުން ހުއްޓާލިނަމަވެސް ކޯޗެއްގެ ގޮތުގައި މަސައްކަތްނުކުރާނެ ކަމުގެ ޔަގީންކަން ވެސް ރޮނާލްޑޯ ދިނެވެ.

މިވަގުތު ސައުދީ ޕްރޯ ލީގުގައި އަލް ނަސްރު އަށް ކުޅެމުން އަންނަ ރޮނާލްޑޯ އަށް އަންނަ އަހަރުގެ ފެބުރުއަރީ މަހުގެ ތެރޭގައި 40 އަހަރުފުރޭނެއެވެ. ނަމަވެސް، އުމުރުން ދުވަސްވެފައިވީނަމަވެސް ބައިނަލްއަގުވާމީ ފުޓްބޯޅައިގައި އަދިވެސް ރޮނާލްޑޯ އަންނަނީ ގިނަ ގޯލްތަކެއް ޖަހަމުންނެވެ. އެންމެ ފަހުން ޕޮލެންޑާ ދެކޮޅަށް ކުޅުނު މެޗުގައި ވެސް ރޮނާލްޑޯ ވަނީ ދެ ލަނޑުޖަހައިފައެވެ.

ރޮނާލްޑޯ އިތުރަށް ބުނީ، އީ، އޭނާގެ ހިތްހަމަޖެހުމަށްޓަކައި ފުޓްބޯޅަ ކުޅުން ކުރިއަށްގެންދާނެ ކަމަށާއި، އަދި އޭނާގެ މޯޓިވޭޓްވެފައި ހުންނަހާ ހިނދަކު ކުޅުން ހުއްޓާލުމުގެ ވިސްނުމެއް ނުގެންގުޅޭ ކަމަށެވެ. އަދި، އެކަމުގައި ކުރިއަށްދާން ބޭނުންނުވާކަމަށް ފެނިއްޖެނަމަ ރިޓަޔާކުރާނެ ކަމަށް ވެސް ރޮނާލްޑޯ ބުންޏެވެ.

ނޭޝަންސް ލީގުގައި ޕޯޗުގަލް ދެން ކުޅޭ މެޗުގައި އަންނަ އަންގާރަ ދުވަހު ނިކުންނާނީ ކްރޮއޭޝިއާއާ ދެކޮޅަށެވެ. ނަމަވެސް، ރޮނާލްޑޯ އަށް އަރާމުކުރުމުގެ ފުރުޞަތު ދީފައިވުމުން އެ މެޗުގައި ބައިވެރިނުވެ، އޭނާ އެނބުރި ކްލަބާ ގުޅޭނެއެވެ.