މަސްތުވާ ތަކެއްޗާއިއެކު ބެންކޮކުން ދިވެއްސެއް ހަައްޔަރުކޮށްފި

ޕްރޮޓީން ސަޕްލިމެންޓް ދަޅެއްގައި ފޮރުވާފައި ހުރި ތިން ކިލޯގެ މަސްތުވާތަކެއްޗާއެކު ދިވެހި ރައްޔިތަކު ބެންކޮކުން ހައްޔަރުކޮށްފިއެވެ. މި މައްސަލައާ ގުޅޭ ގޮތުން ބެންކޮކްގެ ނޫސްތަކުން ދީފައިވާ މަޢުލޫމާތުގައިވާ ގޮތުން، އެ މީހާ ހައްޔަރުކޮށްފައިވަނީ އިނގިރޭސިވިލާތުން ފޮނުވި ޕެކޭޖެއްގައި ހުރި މެފެޑްރޮން ޕެކޭޖު ކޫރިއާ ފެސިލިޓީއަކުން ނަގަން އުޅެނިކޮށެވެ.

ތައިލެންޑުގެ ނާކޮޓިކްސް ކޮންޓްރޯލް ބޯޑް (އޯއެންސީބީ) ގެ އޮފީހުގެ ސެކްރެޓަރީ ޖެނެރަލް ޕަނޫރަތު ލަކްބޫން ވިދާޅުވި ގޮތުގައި، މިދިޔަ ޖޫން މަހު ވެސް ޕޮލެންޑުން ކޮފީ ކެޕްސޫލްތަކެއްގައި ފޮރުވާފައި ހުރި 840 ގްރާމްގެ މެފެޑްރޯނާ އެކު ރަޝިއާ މީހަކު ހައްޔަރުކޮށްފައިވެއެވެ.

ހައްޔަރުކުރެވުނު ދިވެހި ރައްޔިތާގެ ނަން އަދި ހާމަކޮށްފައެއް ނުވެއެވެ. އޯއެންސީބީން މަޢުލޫމާތު ދީފައިވާ ގޮތުގައި، ނަން ހާމަ ނުކުރީ މަސްތުވާތަކެތީގެ ނެޓްވޯކާ ގުޅުން ހުރި އެހެން މީހުން ދެނެގަތުމުގެ ތަޙުޤީޤު އަދިވެސް ކުރިއަށްދާތީއެވެ.

ތައިލެންޑުގެ ފުލުހުން މި މައްސަލައިގެ ތަޙުޤީޤުގައި އެމްޑީއެމްއޭ، އެކްސްޓަސީ، ކޮކެއިން، ކެޓަމިން އަދި ޝައްކުކުރެވޭ އެހެން ބައެއް ތަކެތި ވެސް ހޯދާފައިވެއެވެ. މީގެ ތެރޭގައި އަލަށް ފެންނަމުން އަންނަ މަސްތުވާތަކެތީގެ ބާވަތްތައް ވެސް ހިމެނެއެވެ. މި ބާވަތްތަކަކީ މިހާރަކަށް އައިސް އަތުލައިގަންނަ މަސްތުވާތަކެތީގެ ތެރޭގައި އިތުރުވަމުން އަންނަ ބާވަތްތަކެކެވެ.

މި މައްސަލައާ ގުޅޭ އިތުރު ތަފްސީލު ލިބުމުން އަންގާނެ ކަމަށް ތައިލެންޑުގެ އިދާރާތަކުން ބުނެފައިވެއެވެ.