ބްލޫސްކައި އެޕް ބޭނުންކުރާ މީހުންގެ އަދަދު އެއް މިލިއަނަށް އިތުރުވެއްޖެ

ޑިޖިޓަލް ޕްލެޓްފޯމްތަކުގެ މެދުގައި ވާދަވެރިކަން އިތުރުވަމުންދާ ދަނޑިވަޅެއްގައި، ބްލޫސްކައި އެޕްގެ ބޭނުންކުރާ މީހުންގެ އަދަދު ފާއިތުވި ހަފްތާގައި 700،000 އަށް ވުރެ ގިނައިން އިތުރުވެއްޖެއެވެ. މިހާރު ޖުމްލަ 14.5 މިލިއަނަށް ވުރެ ގިނަ މީހުން ބްލޫސްކައި ބޭނުންކުރާ ކަމަށް އެ ކުންފުނީގެ ޗީފް އޮޕަރޭޓިންގ އޮފިސަރ ރޯސް ވަންގ ވަނީ ދަ ވާޖަށް ކަށަވަރުކޮށްދީފައެވެ.

އެޕް ބޭނުންކުރާ މީހުންގެ ތެރެއިން ގިނަ މީހުންނަކީ އެމެރިކާގެ ރައްޔިތުން ކަމަށް ވަންގ ވިދާޅުވިއެވެ. މިވަގުތު އެމެރިކާގެ އެޕް ސްޓޯގައި ހިލޭ ޑައުންލޯޑް ކުރެވޭ އިޖްތިމާޢީ ވިއުގަތަކުގެ ތެރެއިން ދެވަނައަށް އެންމެ މަޤްބޫލު އެޕަކީ ބްލޫސްކައިއެވެ. އެންމެ މަޤްބޫލު އެޕަކީ މެޓާގެ "ތްރެޑްސް" އެވެ.

ނަމަވެސް، ތްރެޑްސް ބޭނުންކުރާ މީހުން ވަނީ އެ އެޕްގައި ހުރި ބައެއް މައްސަލަތަކާ މެދު ކަންބޮޑުވުން ފާޅުކޮށްފައެވެ. މީގެ ތެރޭގައި އެންގޭޖްމަންޓް ބޭޓް، މޮޑަރޭޝަން މައްސަލަތަކާއި ދޮގު މަޢުލޫމާތު ފެތުރުން ހިމެނެއެވެ. އަދި ގިނަ ބަޔަކު ނުރުހޭ "ފޯ ޔޫ" ފީޑް ދާއިމީކޮށް ނުފެންނަ ގޮތް ހެދެން ނެތުމަކީވެސް ކަންބޮޑުވާ ކަމެކެވެ.

އެމެރިކާގެ ރިޔާސީ އިންތިޚާބާ ގުޅިގެން ބްލޫސްކައި ބޭނުންކުރާ މީހުންގެ އަދަދު އިތުރުވެފައިވާ ކަމަށް ބެލެވެއެވެ. އެގޮތުން އެކްސް (ކުރީގެ ޓްވިޓަރ) ގެ ވެރިފަރާތް އީލޮން މަސްކްގެ ބާރު ނުހިނގާ ޕްލެޓްފޯމެއް ބޭނުންކުރަން ބޭނުންވާ މީހުންނާއި، އެކްސްގައި ނަފްރަތުގެ ބަސް އިތުރުވުމާ ގުޅިގެން އެހެން ޕްލެޓްފޯމަކަށް ބަދަލުވާން ބޭނުންވާ މީހުން ބްލޫސްކައިއަށް އަންނަމުންދާ ކަމަށް ލަފާކުރެވެއެވެ.

ބްލޫސްކައި އެޕްގައި އަލަށް ތަޢާރަފުކޮށްފައިވާ ފީޗަރތަކުގެ ތެރޭގައި ޕިން ކުރެވޭ ޕޯސްޓްތަކާއި، ވީޑިއޯ ޕޯސްޓް ކުރުމާއި، އަދި ޑައިރެކްޓް މެސެޖް ފޮނުވުން ހިމެނެއެވެ. މީގެ އިތުރުން ބޭނުންކުރާ މީހުންނަށް އަމިއްލައަށް ފީޑްތައް ހަދައި، އެ ފީޑްތަކަށް ސަބްސްކްރައިބް ވުމުގެ ފުރުޞަތު ލިބިދެއެވެ.