ދަރަނީގެ ގޮތުގައި އެޑިއުކޭޝަން މިނިސްޓްރީން 250 މިލިއަން ރުފިޔާ ދައްކައިފި

އެޑިޔުކޭޝަން މިނިސްޓްރީން ކުންފުނިތަކަށާއި އާންމު ފަރުދުންނަށް ދޭން ޖެހޭ ފައިސާގެ ތެރެއިން 250 މިލިއަން ރުފިޔާ މިހާރު ދައްކާފައިވާ ކަމަށް މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.

މިދިޔަ އަންގާރަ ދުވަހު "މިހާރު" އަށް ދެއްވި އިންޓަވިއުއެއްގައި މިނިސްޓަރު ވިދާޅުވި ގޮތުގައި މި ސަރުކާރު ވެރިކަމާ ހަވާލުވިއިރު، އެޑިއުކޭޝަން މިނިސްޓްރީން އެކި ފަރާތްތަކަށް 287 މިލިއަން ރުފިޔާ ދައްކަން ޖެހިފައި އޮތެވެ. މިއީ 2019 އިން 2023 އާ ދެމެދުގެ ބިލްގެ ބިލްތަކަށް ދައްކަންޖެހޭ ފައިސާއެވެ.

މި އަހަރު ވަނީ އޭގެ ތެރެއިން 250 މިލިއަން ދައްކައި ނިންމާފައި. މިހާރު ބާކީ ނުދެއްކި އޮތީ 37 މިލިއަން. އެންމެ ބޮޑު ގޮންޖެހުމަކަށްވީ އެ ފައިސާ ދައްކަމުން، މަސައްކަތްތައް ކުރިއަށް ގެންދިއުން

އިސްމާއިލް ވިދާޅުވި އެވެ.

ބާކީ އޮތް 37 މިލިއަން ރުފިޔާއަކީ މިނިސްޓްރީން ބަލަންޖެހޭ ކަންކަން ބެލުމަށް ފަހު ދޫކުރަން ހުރި ފައިސާ ކަމަށް ވެސް މިނިސްޓަރު ވިދާޅުވި އެވެ.

އެހެންނަމަވެސް، ކުރީ ސަރުކާރުގެ އެޑިއުކޭޝަން މިނިސްޓަރު ޑރ. އައިޝަތު އަލީ ހުންނެވިއިރު މާލެ ސަރަހައްދުގެ ސްކޫލެއް އަވަހަށް ނިންމަން 16 މިލިއަން ރުފިޔާއަށް ކޮންޓްރެކްޓަރާ ހަވާލުކުރި ކަމުގެ ލިޔެކިޔުންތައް ފެންނަން ނެތް މައްސަލައެއް ވެސް ވަނީ ފެންމަތިވެފައެވެ. މި މައްސަލައާ ގުޅިގެން އައިޝަތު އަލީގެ ރަސްމީ އީމެއިލްތައް ޑިލީޓް ކުރެއްވި ކަމަށް ތުހުމަތު ކުރެވޭ މައްސަލައެއް މިދިޔަ ޖުލައި މަހު މިނިސްޓްރީން ވަނީ ފުލުހުންނަށް ހުށަހަޅައިފައެވެ.

މި މައްސަލައާ ގުޅޭގޮތުން އައިޝަތު އަލީ ވިދާޅުވެފައިވަނީ ވެރިކަން ނިމުނު ދުވަހު ރަސްމީ އީމެއިލް އެކައުންޓް ވާނީ ޑިއެކްޓިވޭޓް ކުރައްވާފައި ކަމަށެވެ.