ހެންވޭރު ގެއަކުން ވައްކަން ކުރި ދެމީހަކު ހައްޔަރުކޮށްފި

މާލެ ސިޓީ ހެންވޭރު ގެއަކުން ވައްކަން ކުރި ދިވެހި ދެފިރިހެނަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން މިމައްސަލައާއި ގުޅޭ ގޮތުން ބުނެފައިވަނީ 14 ނޮވެންބަރު 2024 ގައި ހެންވޭރު ގެއަކުން ވައްކަން ކުރި މައްސަލަ އެއް ފުލުހަށް ރިޕޯޓުކޮށްފައިވާ ކަމަށެވެ. 

އަދި މިމައްސަލައިގެ ތުހުމަތުގައި ހ.ސަމަރގްރީން އިބްރާހިމް ޒަކަރިއްޔާ އަދި ސ.ހިތަދޫ ކުރިބޯށިގޭ މުޙައްމަދު ޒަރީރް ހައްޔަރުކޮށްފައިވާ ކަމަށް ފުލުހުން ބުނެފައިވެއެވެ. 

މީގެއިތުރުން މިދެމީހުން އެގެއިން ވަގަށް ނެގި ކަމަށް ތުހުމަތު ކުރެވޭ ކަރަންޓު ސާމާނު ގެއެެއްގެ ތެރޭގައި ފޮރުވާފައި ހުއްޓައި ފުލުހުން ހޯދައިފައިވާ ކަމަށްވެސް ފުލުހުން ވަނީ ބުނެފައެވެ.

ފުލުހުން ހޯދައިފައިވާ ތަކެތީގެ ތެރޭގައި ޓެބްލެޓްތަކަކާއި، ލެޕްޓޮޕްތަކަކާއި މޮބައިލް ފޯނުތަކެއްގެ އިތުރުން އެހެނިހެން ތަކެތިވެސް ހިމެނޭކަމަށް ފުލުހުން ވަނީ ބުނެފައެވެ. 

ފުލުހުން އިތުރަށް ބުނެފައިވަނީ މިމައްސަލައާއި ގުޅިގެން ހައްޔަރުކުރި ދެމީހުންގެ ބަންދާއިމެދު ގޮތެއް ނިންމަން ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ވަނީ އަމުރުކޮށްފައިވާ ކަމަށެވެ. 

ހަމަމިއާއި އެކު އިބްރާހިމް ޒަކަރިއްޔާ ކޯޓަށް ހާޒިރުކޮށްފައިވަނީ އިއްޔެ ކަމަށާއި މުޙައްމަދު ޒަރީރް ކޯޓަށް ހާޒިރުކުރީ މިއަދު ކަމަށެވެ. އަދި މިމައްސަލަ އިތުރަށް ތަހުޤީޤު ކުރަމުންދާ ކަމަށްވެސް ފުލުހުން ވަނީ ބުނެފައެވެ.