ނޫސްވެރިކަމުގެ ބިލާއި ގުޅިގެން ނޫސްވެރިންގެ ހުރި ކަންބޮޑުވުންތަކަށް ޙައްލެއް ހޯދަދޭނަން

ބޮރޯޑްކޮމް އާއި މޯލްޑިވްސް މީޑިއާ ކައުންސިލް އުވާލައި މީޑިއާ އެންޑް ބްރޮޑްކާސްޓިންގ ކޮމިޝަންގެ ނަމުގައި އައު ކޮމިޝަނެއް އުފެއްދުމަށް ރައްޔިތުންގެ މަޖިލީހަށް ހުށައަޅައިފައިވާ ބިލާއި ގުޅިގެން ނޫސްވެރިންގެ ހުރި ކަންބޮޑުވުންތަކަށް ޙައްލެއް ހޯއްދަވައިދެއްވާނެ ކަމަށް ބަންޑާރަނައިބު އަޙްމަދު އުޝާމް ވިދާޅުވެއްޖެއެވެ. 

ބަންޑާރަނައިބު އުޝާމް މިހެން ވިދާޅުވީ މޯލްޑިވްސް ޖާނަލިސްޓު އެސޯސިއޭޝަންގެ މެމްބަރުންނާއި ބައްދަލުކުރައްވައި ދެއްކެވި ވާހަކަފުޅުގައެވެ. 

ރައްޔިތުންގެ މަޖިލީހަށް ސަރުކާރުގެ ފަރާތުން ހުށައަޅައިފައިވާ މަޖިލީހަށް މޯލްޑިވްސް މީޑިއާ އެންޑް ބްރޯޑްކާސްޓިންގ ބިލާ ގުޅޭ ގޮތުން ނޫސްވެރިންގެ ހުރި ޝަކުވާތައް ބަންޑާރަނައިބު އަޑުއައްސަވާފައިވާ ބަންޑާރަނައިބުގެ އޮފީހުން ވަނީ ބުނެފައެވެ.

މި ބައްދަލުވުމުގައި ބަންޑާރަނައިބުގެ އިތުރުން، ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވަޒީރު އިބްރާހީމް ވަޙީދާއި، މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން އިބްރާހީމް ޚަލީލް ބައިވެރިވެވަޑައިގެންނެވިއެވެ.

ދިވެހި ބައެއް ނޫސްވެރިން ބަންޑާރަ ނައިބާ ބައްދަލުކުރައްވަނީ. ފޮޓޯ: ބަންޑާރަ ނައިބުގެ އޮފީސް

މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލައި މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި އައު ކޮމިޝަނެއް އުފެއްދުމަށް ރައްޔިތުންގެ މަޖިލީހަށް ބިލް ހުށަހެޅުއްވީ ތުޅާދޫ ދާއިރާގެ މެންބަރު ޢަބްދުލްޙަންނާން ޢަބޫބަކުރެވެ. ބިލު ހުށަހެޅުއްވި ސަބަބެއްކަމަށް ބަޔާންކުރައްވާފައިވަނީ ނޫސް މަޖައްލާ ރަޖިސްޓްރީކުރުމަށް ލުއި ފަސޭހަ އަދި ހަރުދަނާ މިންގަނޑުތަކެއް ކަނޑައަޅައި، ބްރޯޑްކާސްޓިން ދާއިރާވެސް ހިމެނޭހެން މީޑިއާގެ ކަންކަން ތަންފީޒުކުރުމަށް ވަކި މުއައްސަސާއެއް ހެދުމެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ޤާނޫނުގެ ނަމުގައި މަޖިލީހަށް ހުށަހަޅުއްވާފައިވާ މި ބިލުގައިވާގޮތުން ބިލު ޤާނޫނަކަށްވުމުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި ކޮމިޝަނެއް އުފެދިގެންދާނެއެވެ. އެ ކޮމިޝަން ވެގެންދާނީ މިނިވަން ޤާނޫނީ ޝަހުސަކަށް ކަމަށް ބިލުގައި ވަނީ ބަޔާންކޮށްފައެވެ.

އެކޮމިޝަނުން މީޑިއާގެ މިނިވަންކަން އެންމެ ފުޅާދާއިރާއެއްގައި ކުރިއަރުވައި ތަރައްގީކުރަންޖެހޭއިރު ޒިންމާދާރުކަމާއެކު ހަރަކާތްތެރިވާ މީޑިއާތައް ރާއްޖޭގައި ޤާއިމުކުރަން ޖެހޭނެއެވެ.

މި ބިލު ޤާނޫނަކަށްވުމާއެކު މިހާރު ހިންގަމުންދާ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އުވޭނެއެވެ. އަދި އެ ދެ ކޮމިޝަނުގެ މިހާރުގެ މަސްއޫލިއްޔަތުތަކާއި އިމާރާތްތަކާއި ބިމާއި މުދަލާއި ފައިސާ އާއި ވަސީލަތްތައްތަކާއި މުވައްޒަފުން އަލަށް އުފެދޭ މީޑިއާ އެންޑް ބްރޯޑްކާސްޓިން ކޮމިޝަނަށް ބަދަލުވާނެއެވެ.

އަލަށް އުފެދޭ މީޑިއާ އެންޑް ބްރޯޑްކާސްޓިން ކޮމިޝަނުގައި 7 މެންބަރުން ތިއްބަވާނެއެވެ. އޭގެތެރެއިން 4 މެންބަރުން މަޖިލީހުގެ ރުހުމާއެކު ރައީސުލްޖުމްހޫރިއްޔާ އައްޔަން ކުރައްވާއިރު 3 މެންބަރުން އިންތިޚާބު ކުރާނީ މީޑިއާތަކުންނެވެ.

ކޮމިޝަނުގެ ރައީސާއި ނައިބު ރައީސް އައްޔަން ކުރައްވާނީ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ. މި ކޮމިޝަނަށް މެންބަރުން އައްޔަންކުރައްވާނީ 5 އަހަރުގެ ދައުރަކަށެވެ.

ބިލުގައި ބަޔާންކޮށްފައިވާ ގޮތުން މީޑިއާ އެންޑް ބްރޯޑްކާސްޓިން ކޮމިޝަން އުފެދިގެން އެ ކޮމިޝަނަށް މެންބަރުން އައްޔަން ކުރެވެންދެން ކޮމިޝަން ހިންގާނީ ސިވިލް ސަރވިސް ކޮމިޝަނުން އެކުލަވާލާ 5 މެންބަރުންގެ ވަގުތީ ކޮމިޓީއަކުންނެވެ.