ޚަބަރު
ސިޓީތަކާއި ބެހޭ ވުޒާރާގެ ފާއިތުވި އަހަރުގެ ކާމިޔާބީތައް ފާހަގަކޮށް "ދުވެލި" ފޮތް ނެރެފި
ސިޓީތަކާ ބެހޭ ވަޒީރު އާދަމް ޝަރީފް ޢުމަރު. ފޮޓޯ: ވުޒާރާ
ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާގެ ފާއިތުވި އަހަރުގެ ކާމިޔާބީތައް ފާހަގަކޮށް އެކުލަވައިލި ފޮތް "ދުވެލި" ނެރެފިއެވެ.
މި ފޮތް ނެރެދެއްވީ ސަރުކާރަަށް އެއް އަހަރު ފާހަގަކުރުމަށް، މިއަދު ހެދުނު އެވުޒާރާގައި ބޭއްވުނު ރަސްމިއްޔާތެއްގައި ވަޒީރު އާދަމް ޝަރީފް ޢުމަރު އެވެ.
"ދުވެލި" ފޮތަކީ އެވުޒާރާއިން ވޭތުވެ ދިޔަ އެއް އަހަރު ކުރި މަސައްކަތްތަކަށް އަލި އަޅުވާލައްވައި ސަރުކާރުގެ ކާމިޔާބީ ފާހަގަކޮށް ސިޓީތަކާ ބެހޭ ވުޒާރާއިން ނެރުނު ފޮތެއް ކަަމަށް އެވުޒާރާއިން ވަނީ ބުނެފައެވެ. މި ފޮތް އެކުލަވައިލުމުގައި ވުޒާރާގެ ހީވާގި މުވައްޒަފުން ކޮށްދެއްވި ބުރަ މަސައްކަތް ފާހަގަކުރައްވައި އެ ބޭފުޅުންނަށް ވަޒީރު އާދަމް ޝަރީފް ވަނީ ޝުކުރު އަދާ ކުރައްވާފައެވެ.
ވަޒީރު ފާހަގަކުރެއްވި ގޮތުގައި "ދުވެލި" މި ފޮތަކީ ސަރުކާރުން ކުރިއަށް ގެންދާ މުހިންމު މަސައްކަތްތަކާ ގުޅޭ މަޢުލޫމާތު ހިމެނޭ ފޮތެކެވެ. މިއަދުން ފެށިގެން މި ފޮތުގެ ލިންކު ވުޒާރާގެ ވެބްސައިޓުން ފެންނަން ހުންނާނެއެވެ. އަދި މީގެ އިތުރަށް ފޮތް ޕްރިންޓްކުރުމަށް ފަހު ސަރުކާރުގެ އެންމެހައި މުއައްސަސާތަކާއި، ކުންފުނިތަކަށް ހިލޭ ބެހުމަށް ވަނީ ނިންމާފައެވެ.
