ދިވެހި ފިލްމީ ދާއިރާގެ މަޝްހޫރު ތަރި އަދި ޑައިރެކްޓަރ ނިމާލް ނިޔާވެއްޖެ

ދިވެހި ފިލްމީ ދާއިރާގެ މަޝްހޫރު ތަރި އަދި ޑައިރެކްޓަރ އަޙުމަދު ނިމާލް ނިޔާވެއްޖެ އެވެ.

މަޢުލޫމާތު ލިބިފައިވާ ގޮތުގައި އޭނާ ނިޔާވެފައި ވަނީ، މިއަދު ހެނދުނުގެ ވަޤުތެއްގައި އިންދިރާ ގާނދީ މެމޯރިއަލް ހޮސްޕިޓަލުގައި ފަރުވާދެމުން ދަނިކޮށެވެ.

ނިމާލް މިއަދު ނިޔާވެފައިވާއިރު، ދާދިފަހުން އޭނާއަށް ވަނީ ސްޓްރޯކެއް ވެސް ޖެހިފައެވެ. މަޢުލޫމާތު ލިބިފައިވާ ގޮތުގައި އޭނާއަށް ސްޓްރޯކެއް ޖެހުނީ މިދިޔަ ޑިސެމްބަރު މަހުގެ 31 ވަނަ ދުވަހުގެ ރޭ ސައިކަލު ދުއްވާފައި ދަނިކޮށެވެ. އެހެންކަމުން އިތުރު އަނިޔާތަކާއެކު، އޭނާގެ ހާލު އޭރު ސީރިއަސްކަމަށް ޢާއިލާއިން ވަނީ މައުލޫމާތު ދީފައެވެ.

ނިމާލްގެ ކަށުނަމާދު މިއަދު އަސުރު ނަމާދަށްފަހު ކުރުމަށް ވަނީ ހަމަޖެހިފައެވެ. ކަށުނަމާދު އޮންނާނީ މާލޭގައި ހުންނަ މަސްޖިދުއްތަޢާވުނި (އާސަހަރާ) މިސްކިތުގައެވެ.

ނިމާލްއަކީ ދިވެހި ފިލްމް އިންޑަސްޓްރީގައި 1984 ވަނަ އަހަރުން ފެށިގެން މަސައްކަތް ކުރަމުން އަންނަ ފަންނާނެކެވެ. އަދި މިހާރު ޢުމުރުން 62 އަހަރުވެފައިވާއިރު، ފިލްމު ޑައިރެކްޓުކުރުމުގެ އިތުރުން، ފާއިތުވި އަހަރު ނިކުތް ފިލްމުތަކުގައި ވެސް އޭނާ ވަނީ އެކްޓަރެއްގެ ގޮތުގައި ހަރަކާތްތެރިވެފައެވެ.

ނިމާލްއަކީ ޑައިރެކްޓް ކުރުމާއި އެކްޓަރެއްގެ އިތުރުން، ބައެއް ވާހަކަތައް ލިޔެ ސްކްރީންޕްލޭ ވެސް ލިޔެފައިވާ ފަރާތެއްކަން ފާހަގަކޮށްލެވެއެވެ.