މިސަރުކާރު ގެނެވުނީ ވަރަށް މަސައްކަތުން، ސަރުކާރު ކާމިޔާބު ސަރުކާރަކަށް ހަދަން ބޭނުން: ޢަބްދުއްރަޙީމް

މިސަރުކާރު ގެނެވުނީ ވަރަށް މަސައްކަތުން ކަމަށާއި ސަރުކާރު ކާމިޔާބު ސަރުކާރަކަށް ހަދަން ބޭނުންފުޅު ވާކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. 

ޢަބްދުއްރަޙީމް މިހެން ވިދާޅުވީ މިސަރުކާރަށް 52 އަހަރު ވުމާއި ގުޅިގެން ދައުލަތުގެ މީޑިއާ އަށް ދެއްވި ޚާއްސަ އިންޓަރވިއުގައި ވާހަކަފުޅު ދައްކަވަމުންނެވެ. 

މަޖިލީހުގެ ރައީސް އަދި ފޮނަދޫ ދާއިރާގެ މެމްބަރު ޢަބްދުރަޙީމް ވިދާޅުވީ ރާއްޖޭގެ ވެރިކަމުގެ ނިޒާމު އޮތް ގޮތުން ކާމިޔާބު ވެރިކަމެއް ކުރުމަށްޓަކައި ރައްޔިތުންގެ މަޖިލީހުން ވަރަށް މުހިންމު ދައުރެއް އަދާކުރަންޖެހޭކަމަށެވެ.

އަދި ރައްޔިތުންގެ މަޖިލީހަކީ ސަރުކާރަށް ޖެއްސުންކުރާ މަޖިލީހަކަށްވެއްޖެނަމަ އަދި މަޖިލީހުގެ ރިޔާސަތުގައި އިންނަ މީހަކީ އަމިއްލަ ގޮތްތައް ގެންގުޅޭ މީހަކަށްވެއްޖެނަމަ ސަރުކާރަށް ބައެއް ކަންކަމުގައި ވަރަށް އުނދަގޫވާނެކަމަށްވެސް ޢަބްދުއްރަޙީމް ވިދާޅުވިއެވެ. އޭނާ އިތުރަށް ވިދާޅުވީ ބޭނުންފުޅުވަނީ ގޮންޖެހުންތަކާއި ކުރިމަތިލައިގެން ކަންކަން ހާސިލްކުރެއްވުމަށްކަމަށެވެ.

އަދި މަޖިލީހުގެ ގޮނޑީގައި އިންނެވީ ފަޚުރަކަށް ނޫން ކަމަށާއި އެއީ ގޮންޖެހުންތަކާއި ކުރިމަތިލާން އިންނަވާ ތަނެއް ކަމަށެވެ. އަދި  ފާޑުކިޔުމަކީ އެމަނިކުފާނު އެއްވެސް ގޮތަކަށް ކަންބޮޑުވާކަމެއް ނޫން ކަމަށާއި އެމަނިކުފާނަކީ ފެށުނީއްސުރެން ފާޑު ކިޔުންތައް ކުރިމަތިވީ ބޭފުޅެއް ކަމަށާއި އެކަމުގެ  ނަތީޖާއަކީ މިއަދު ރައްޔިތުންގެ މަޖިލީހުގެ ގޮނޑީގައި އިންނެވުން ކަމަށް ޢަބްދުރަޙީމް ވިދާޅުވިއެވެ.

ހަފްތާ 52 ޕްރޮގްރާމުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން ޢަބްދުއްރަޙީމް ވިދާޅުވީ ފާއިތުވި އެއްއަހަރު ވަރަށް ބޮޑެތި ކާމިޔާބީތައް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ހާސިލުކުރެއްވިކަމަށެވެ. އެހެންނަމަވެސް ކޮންމެ ކާމިޔާބީއަކީ އަތްލެވޭ އެއްޗެއް ނޫން ކަމަށާއި، ބައެއް ކާމިޔާބީތަކަކީ ލޮލަށް ފެންނަ އެއްޗެއް ނޫންކަމަށެވެ.  ރައީސުލްޖުމްހޫރިއްޔާ ޑރ މުޢިއްޒު ވެވަޑައިގެންނެވި އެއް ވައުދަކީ ފައިސާ ޗާޕުކުރުން ހުއްޓާލުން ކަމަށާއި އެކަން މިހާރު ނިމުމަކަށް ގެންނެވިކަން މަޖިލީހުގެ ރައީސް ފާހަގަކުރެއްވިއެވެ.

 އަދި އެއީ އިޤްތިސާދީ ވިސްނުމަކުން ވިސްނާއިރު ވަރަށް ބޮޑު ކާމިޔާބީއެއްކަމަށްވެސް މަޖިލީހުގެ ރައީސް ވިދާޅުވިއެވެ.ދައުލަތަށް ލިބުނު އާމްދަނީން މެނޭޖްކުރައްވައިގެން މިއަދާ ހަމައަށް ރައީސް މުޢިއްޒު ވަޑައިގަތުމުން އެއީ ވަރަށް ބޮޑު ކާމީޔާބީއެއްގޮތުގައިވެސް މަޖިލީހުގެ ރައީސް ސިފަކުރެއްވިއެވެ.

ޢަބްދުއްރަޙީމް ވިދާޅުވީ އަމާންވެއްޓެއް ޤާއިމުކުރައްވާނެކަމަށް ރައީސް ޑރ މުޢިއްޒު ވައުދުވެވަޑައިގެންނެވިކަމަށާއި އެ ވައުދުވެސް އެމަނިކުފާނު ފުއްދެވި ކަމަށެވެ. މިހުރިހާ ކަމަކީ ފާއިތުވި އެއްއަހަރަށް ބަލާއިރު ސަރުކާރަށް ހާސިލްކުރެވުނު މުހިންމު ކާމިޔާބީތަކެއް ކަމަށް ވިދާޅުވިއެވެ.