ޕާކިސްތާނުން އަފްޣާނިސްތާނުގެ ބޮޑެތި ސިޓީތަކަށް ބޮން އެޅުމާ ގުޅިގެން މަޝްވަރާ ކުރުމަށް ތާލިބާނުން ތައްޔާރުކަމަށް ބުނެފި

ޕާކިސްތާނުގެ އަސްކަރިއްޔާއިން އަފްޣާނިސްތާނުގެ ބޮޑެތި ސިޓީތަކަށް ވަރުގަދަ ވައިގެ ހަމަލާތަކެއް ދިނުމާ ގުޅިގެން، ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ހައްލުކުރުމަށް މަޝްވަރާގެ މޭޒަށް އައުމަށް ތައްޔާރު ކަމަށް އަފްޣާނިސްތާނުގެ ތާލިބާން ސަރުކާރުން ބުނެފިއެވެ.

މި ހަމަލާތަކާ ގުޅިގެން ޕާކިސްތާނުގެ ޑިފެންސް މިނިސްޓަރު ޚަވާޖާ އާސިފް ވަނީ ދެ ގައުމުގެ ދެމެދުގައި އޮތީ "ހުޅުވިފައިވާ ހަނގުރާމައެއް" ކަމަށް އިއުލާން ކުރައްވާފައެވެ.

ޕާކިސްތާނުން ހަމަލާދީފައިވަނީ އަފްޣާނިސްތާނުގެ ވެރިރަށް ކާބުލް އާއި ތާލިބާން ލީޑަރުން ތިއްބަވާ ކަންދަހާރުގެ އިތުރުން ބައެއް އެހެން ރަށްތަކަށެވެ. މި ހަމަލާތަކުގައި ދެ ފަރާތުންވެސް ބޮޑެތި ގެއްލުންތަކެއް ލިބިފައިވާކަމަށް ރިޕޯޓްކޮށްފައިވެއެވެ. ޕާކިސްތާނުގެ ޑިފެންސް މިނިސްޓަރު އެކްސްގައި ކުރެއްވި ޕޯސްޓެއްގައި ވިދާޅުވީ، މިހާރު މިއޮތީ ދެ ގައުމުގެ ދެމެދުގައި ސީދާ ކުރިމަތިލުމެއް ފެށިފައި ކަމަށެވެ.

އަފްޣާން ސަރުކާރުގެ ތަރުޖަމާނު ޒަބީހުﷲ މުޖާހިދު ވިދާޅުވީ، އަފްޣާނިސްތާނުން އަބަދުވެސް ބޭނުންވަނީ މައްސަލަތައް މަޝްވަރާގެ މަތިން ހައްލުކުރަން ކަމަށެވެ. "އިސްލާމިކް އެމިރޭޓް އޮފް އަފްޣާނިސްތާނުން އަބަދުވެސް މަސައްކަތް ކުރަނީ ވާހަކަދައްކައިގެން ކަންކަން ނިންމަން، މިހާރުވެސް އަޅުގަނޑުމެން ބޭނުންވަނީ މަޝްވަރާގެ މޭޒަށް އަންނަން،" މުޖާހިދު ވިދާޅުވިއެވެ.

ހަމަލާތަކުގެ ފަސްފަހަތް:
މި ނުތަނަވަސްކަން ބޮޑުވެފައިވަނީ ޕާކިސްތާނުގެ ތާލިބާން ހަނގުރާމަވެރިންނަށް އަފްޣާނިސްތާނުން ހިމާޔަތްދޭކަމަށް ބުނެ ޕާކިސްތާނުން ކުރާ ތުހުމަތުތަކާ ގުޅިގެންނެވެ. ނަމަވެސް އަފްޣާނިސްތާނުން މިކަން ދޮގުކުރެއެވެ. ފާއިތުވި ބުރާސްފަތި ދުވަހުން ފެށިގެން ދެ ގައުމުގެ ބޯޑަރު ސަރަހައްދުގައި ދަނީ ބަދަލުކުރަމުންދާ ހަމަލާތަކުގައި ގިނަ އަދަދެއްގެ ބަޔަކު މަރުވެފައެވެ.

ޕާކިސްތާނުގެ އަސްކަރިއްޔާއިން ބުނާ ގޮތުގައި އެ ގައުމުގެ ހަމަލާތަކުގައި އަފްޣާން ސިފައިންނާއި ހަނގުރާމަވެރިންގެ ތެރެއިން 274 މީހުން މަރުވެފައިވެއެވެ. ނަމަވެސް މުޖާހިދު މި ވާހަކަތައް ދޮގުކުރައްވަމުން ވިދާޅުވީ ޕާކިސްތާނުގެ 55 ސިފައިން މަރުވެ، ބައެއް މީހުން ހައްޔަރުކޮށްފައިވާ ކަމަށެވެ. އަދި އަފްޣާނިސްތާނުގެ 13 ސިފައިންނާއި 19 އާންމުން މަރުވެފައިވާ ކަމަށްވެސް އޭނާ ވިދާޅުވިއެވެ.

މިއީ 2021 ވަނަ އަހަރު ތާލިބާނުން އަލުން ވެރިކަމަށް އައި ފަހުން، ޕާކިސްތާނުން އަފްޣާނިސްތާނުގެ ވެރިރަށަށާއި ތާލިބާނުންގެ ބާރުގަދަ ސަރަހައްދުތަކަށް ދިން އެންމެ ވަރުގަދަ ހަމަލާތަކެވެ. ދެ ގައުމުގެ ދެމެދުގައި އޮތް ގުޅުން މިހާރު ވަނީ ވަރަށް ބޮޑަށް ގޯސްވެފައެވެ.