އީރާނާ ދެކޮޅަށް ކުރާ ހަނގުރާމައިގައި ނޭޓޯއިން ބައިވެރިވުމުގެ އެއްވެސް ވިސްނުމެއް ނެތް: މާކް ރޫޓަ

އީރާނާ ދެކޮޅަށް އިސްރާއީލާއި އެމެރިކާއިން ކުރަމުންދާ އަސްކަރީ ހަރަކާތްތަކަށް ނޭޓޯގެ ސެކްރެޓަރީ ޖެނެރަލް މާކް ރޫޓަ ތައުރީފު ކުރައްވައިފިއެވެ. ނަމަވެސް، މެދުއިރުމަތީގައި ހިނގަމުންދާ މި ހަނގުރާމައިގެ ތެރެއަށް ނޭޓޯއިން ވަނުމުގެ އެއްވެސް ރޭވުމެއް ނެތްކަން އޭނާ ވަނީ ސާފުކޮށްދެއްވާފައެވެ.

ބްރަސަލްސްގައި ހުންނަވައިގެން ޖަރުމަނުގެ އޭ.އާރް.ޑީ ޓީވީއަށް ދެއްވި ބަސްދީގަތުމެއްގައި ރޫޓަ ވިދާޅުވީ، އީރާނުން ނިއުކްލިއަރ އަދި ބެލިސްޓިކް މިސައިލް އުފެއްދުމަށް ކުރާ މަސައްކަތްތައް ހުއްޓުވުމަށް އިސްރާއީލާ ގުޅިގެން އެމެރިކާއިން ކުރަމުންދާ މަސައްކަތްތަކަކީ "ވަރަށް މުހިންމު" ކަމެއް ކަމަށެވެ.

ނަމަވެސް، އިއްތިހާދެއްގެ ގޮތުގައި ނޭޓޯއިން މި ކުރިމަތިލުންތަކުގެ ތެރެއަށް ވަނުމުގެ އެއްވެސް ވިސްނުމެއް ނެތްކަން އޭނާ ފާހަގަކުރެއްވިއެވެ. "މި ކަމުގެ ތެރެއަށް ނޭޓޯ ވަނުމުގެ ނުވަތަ މީގެ ބައެއްގެ ގޮތުގައި ހިމެނުމުގެ އެއްވެސް ރޭވުމެއް މުތުލަގަށް ނެތް،" ރޫޓަ ވިދާޅުވިއެވެ.

އޭނާ އިތުރަށް ވިދާޅުވީ، ނޭޓޯއިން ސީދާ މިކަމުގައި ބައިވެރިނުވި ނަމަވެސް، އެމެރިކާއިން ކުރާ މަސައްކަތްތަކަށް އިއްތިހާދުގައި ހިމެނޭ ވަކިވަކި ގައުމުތަކުން އެހީތެރިކަން ފޯރުކޮށްދިނުމަކީ އެކަށީގެންވާ ކަމެއް ކަމަށެވެ.