އައްޑޫ މަނީ ލޯންޑަރިން މައްސަލަ: ހެކި ނެތިގެން ތުހުމަތުކުރެވޭ މީހުން ދޫކޮށްލަން ޕީޖީ ލަފާދީފި

މަސްތުވާތަކެތީގެ ވިޔަފާރިކޮށް މަނީ ލޯންޑަރ ކުރުމުގެ ތުހުމަތުގައި އައްޑޫ ސިޓީން ހައްޔަރުކުރި މީހުންގެ މައްޗަށް ދަޢުވާކުރެވޭ ވަރަށް ހެކި ލިބިފައި ނުވާތީ، އެ މީހުން ބަންދުން ދޫކޮށްލުމަށް ޕްރޮސިކިއުޓަރ ޖެނެރަލް (ޕީޖީ) އޮފީހުން ދިވެހި ފުލުހުންގެ ޚިދުމަތަށް ލަފާދީފިއެވެ.

ޕްރޮސިކިއުޓަރ ޖެނެރަލް އޮފީހުން ނެރުނު ނޫސް ބަޔާނެއްގައި ހާމަކޮށްފައިވާ ގޮތުގައި، ސ. ހިތަދޫ، ކޮންމުލި، ޢަލީ ނަދީމްއާއި އިތުރު ބަޔަކު ބައިވެރިގެން އައްޑޫ ސިޓީގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް، އެކަމުން ލިބޭ ފައިސާ ލޯންޑަރ ކުރާކަމަށް ތުހުމަތުކުރެވޭ މައްސަލައިގެ ތަޙުޤީޤު މުއްދަތު މިދިޔަ މާރިޗު މަހުގެ 2 ވީ ހޯމަ ދުވަހަށް ވަނީ ހަމަވެފައެވެ.

މި މައްސަލައިގައި ޢަލީ ނަދީމް ހިމެނޭހެން ޖުމްލަ 7 މީހެއްގެ މައްޗަށް ދެ ކުށެއްގެ ތުހުމަތު ކުރެވުނެވެ. އެއީ ޤާނޫނުލްޢުޤޫބާތުގެ ދަށުން ކުށް ކުރާ ޖަމާޢަތެއްގައި ބައިވެރިވުމުގެ ކުށާއި، މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ ދަށުން މަނީ ލޯންޑްރިންގެ ކުށެވެ. މި މައްސަލައިގައި ތުހުމަތު ކުރެވޭ ފަރާތްތަކަކީ:

ޢަލީ ނަދީމް، ކޮންމުލި، ސ. ހިތަދޫ
އިބްރާހީމް ސިރާޖް، ވެޔޮފެހެބުރުގެ، ސ. ހިތަދޫ
ޙަސަން އަލްފާފު، ދޮރުފޮތިމާގެ، ސ. ހިތަދޫ
އަމީން މުޙައްމަދު، ކެކުރިމާގެ، ސ. ހިތަދޫ
ސަލާމް ސަޢީދު، ލޮބްސްޓަމް، ސ. ހިތަދޫ
ޙާފިޘް ފައުޒީ، ފަލާޙް، ސ. ހިތަދޫ
ޒަޙްނާ އަޙްމަދު، ޢަންބަރީގެ، ދ. ހުޅުދެލި

ޕީޖީ އޮފީހުން ވިދާޅުވީ، މި މައްސަލައިގެ ތަޙުޤީޤު މުއްދަތު ޤާނޫނު ތަންދޭ އެންމެ ދިގު މުއްދަތަށް އިތުރުކޮށްދިން ނަމަވެސް، މުއްދަތު ހަމަވިއިރު ލިބިފައިވާ ހެއްކާއި ޤަރީނާއަށް ބަލާއިރު، ކުށް ސާބިތުކޮށްދެވޭ މިންވަރަށް ހެކި ހޯދިފައި ނުވާ ކަމަށެވެ. ޖިނާއީ އިޖުރާއަތުގެ ޤާނޫނުގައިވާ ގޮތުން، ކަނޑައެޅިފައިވާ މުއްދަތުގައި ދަޢުވާކުރެވޭ މިންވަރަށް ހެކި ނުލިބޭނަމަ އެ މީހަކު ބަންދުން ދޫކޮށްލަންޖެހެއެވެ.

އެހެންކަމުން، މި މައްސަލައިގައި ބަންދުގައި ތިބި މީހުން ދޫކޮށްލުމަށް ލަފާދިން ނަމަވެސް، އައު ހެކި ލިބިއްޖެ ޙާލަތެއްގައި އަލުން ދަޢުވާކުރުމަށް ހުށަހެޅުމުގެ ފުރުޞަތު ފުލުހުންނަށް އޮންނާނެ ކަމަށް ޕީޖީ އޮފީހުން ވިދާޅުވިއެވެ.

ފުލުހުން ހިންގި "އޮޕަރޭޝަން އަލިމަގު" ގެ ދަށުން މިދިޔަ ޑިސެންބަރު މަހު ހައްޔަރުކުރި މި މީހުންނަކީ މަސްތުވާތަކެތީގެ ބޮޑު ނެޓްވޯކެއް ހިންގާ ބައެއް ކަމަށް ފުލުހުން ކުރިން ތުހުމަތުކޮށްފައިވެއެވެ. ފުލުހުން ހާމަކޮށްފައިވާ ގޮތުގައި، މި ނެޓްވޯކްގެ އިސް ހަތަރު މީހެއްގެ އެކައުންޓްގައި ފާއިތުވި ފަސް އަހަރު ތެރޭގައި 19 މިލިޔަނަށްވުރެ ގިނަ ރުފިޔާ ދައުރުކޮށްފައިވެއެވެ