ވިޒިޓް މޯލްޑިވްސްގެ ރަސްމީ ޑިޖިޓަލް ވޮލެޓަކަށް ބީއެމްއެލްގެ "ސްވައިޕް" ހަމަޖައްސައިފި

ބޭންކް އޮފް މޯލްޑިވްސް (ބީއެމްއެލް) އިން ތައާރަފުކޮށްފައިވާ ޑިޖިޓަލް ވޮލެޓް "ސްވައިޕް" އަކީ ވިޒިޓް މޯލްޑިވްސްގެ ރަސްމީ ވޮލެޓުގެ ގޮތުގައި މިއަދު ހަމަޖައްސައިފިއެވެ.

ބީއެމްއެލްގެ ހެޑް އޮފީހުގައި ބޭއްވި ޚާއްޞަ ރަސްމިއްޔާތެއްގައި މިކަމާ ގުޅޭ ސްޓްރެޓިޖިކް އެއްބަސްވުމުގައި ވަނީ ސޮއިކޮށްފައެވެ. ބީއެމްއެލްގެ ފަރާތުން މި އެއްބަސްވުމުގައި ސޮއިކުރެއްވީ އެ ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފެވެ. ވިޒިޓް މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އެންޑް މެނޭޖިންގ ޑިރެކްޓަރ އިބްރާހީމް ޝިއުރީއެވެ.

މި އެއްބަސްވުމުގެ މައިގަނޑު މަޤްސަދަކީ އެންމެ ފަހުގެ ޓެކްނޮލަޖީ ބޭނުންކޮށްގެން ރާއްޖެ އަންނަ ފަތުރުވެރިންނަށް ފޯރުކޮށްދޭ ޚިދުމަތްތައް ހަރުދަނާކޮށް، އެފަރާތްތަކުގެ ތަޖުރިބާ އިތުރަށް ފުރިހަމަ ކުރުމެވެ.

ސްވައިޕަކީ ސައްތަ އިން ސައްތަ ދިވެހި އުފެއްދުމެކެވެ. މި ވޮލެޓް ފަރުމާކޮށްފައިވަނީ ރާއްޖޭގެ އިތުރުން ފައިސާގެ މުއާމަލާތް ހިންގުމުގައި ބޭނުންކުރާ ބައިނަލްއަޤުވާމީ މިންގަނޑުތަކަށް ފުރިހަމައަށް ފެތޭ ގޮތަށެވެ. މި ވޮލެޓް މެދުވެރިކޮށް ރާއްޖެއާއި ރާއްޖެއިން ބޭރުގެ މުއާމަލާތްތައް ކުރެވޭއިރު، ބީއެމްއެލް އެކައުންޓްތަކުގެ އިތުރުން ކޮންމެ ކްރެޑިޓް، ޑެބިޓް އަދި ޕްރިޕެއިޑް ކާޑަކުންވެސް ސްވައިޕް ވޮލެޓަށް ފައިސާ ޖަމާކުރެވޭނެއެވެ.

މިދިޔަ ޖަނަވަރީ މަހުން ފެށިގެން ސްވައިޕްގެ ޚިދުމަތްތައް ތަޖުރިބާ ކުރުމުގެ ފުރުސަތު ކަސްޓަމަރުންނަށް ވަނީ ހުޅުވާލާފައެވެ. އެގޮތުން އެކަކު އަނެކަކަށް ފައިސާ ފޮނުވުމާއި (P2P)، ކިއުއާރު ޕޭމަންޓް، ޕޭމަންޓް ލިންކް މެދުވެރިކޮށް ފައިސާ ހޯދުމުގެ އިތުރުން، އެކައުންޓުން ކުރާ ޚަރަދުތަކުގެ ތަފާސްހިސާބު ބަލާލުމުގެ ފަސޭހަ މި ވޮލެޓުން ލިބިގެންދެއެވެ.

މި އެއްބަސްވުމަކީ މިދިޔަ އަހަރު ބީއެމްއެލް އާއި ވިޒިޓް މޯލްޑިވްސްއާ ދެމެދު ގާއިމުކުރި ސްޓްރެޓިޖިކް ޕާޓްނަރޝިޕްގެ ދަށުން ކުރިއަށްދިޔަ މުހިންމު މަސައްކަތެކެވެ. ބޭންކުން ހާމަކުރި ގޮތުގައި، މި ޕާޓްނަރޝިޕްގެ ސަބަބުން ފަތުރުވެރިކަމުގެ ދާއިރާގައި ޑިޖިޓަލް ކުރިއެރުންތައް އަވަސްވެ، ބައިނަލްއަޤުވާމީ މައިދާނުގައި ރާއްޖޭގެ މަޤުބޫލުކަން އިތުރުވެގެންދާނެއެވެ.