ބޮޓޮކްސް ޖަހައިގެން މަކަރު ހެދިކަން ފަޅާއެރުމުން 40 ޖަމަލު ސައުދީގެ ރީތީގެ މުބާރާތުން ވަކިކޮށްފި

ސައޫދީ އަރަބިއްޔާގައި ބާއްވާ ދުނިޔޭގެ އެންމެ ބޮޑު ޖަމަލު ރީތީގެ މުބާރާތުގައި، މަކަރާއި ހީލަތުން ޖަމަލުތަކުގެ ސިފަ ބަދަލުކޮށްފައިވާތީ 40 އަށްވުރެ ގިނަ ޖަމަލު މުބާރާތުން ވަކިކޮށްފިއެވެ.

"ކިންގް އަބްދުލްއަޒީޒް ކެމަލް ފެސްޓިވަލް" ގެ ތެރެއިން ކުރިއަށްދާ މި މުބާރާތަކީ 66 މިލިއަން އެމެރިކާ ޑޮލަރުގެ ބޮޑު އިނާމެއް ހުށަހެޅިފައިވާ މުބާރާތެކެވެ. މި މުބާރާތުގައި ޖަމަލުގެ ރީތިކަން ވަޒަންކުރާ މައިގަނޑު ސިފަތަކުގެ ތެރޭގައި ދިގު ތުންފަތާއި، ބޮޑު ނޭފަތުގެ އިތުރުން ޖަމަލުގެ ގޮބުގެ ބައްޓަން ހިމެނެއެވެ.

ސައޫދީ ޕްރެސް އެޖެންސީ (އެސް.ޕީ.އޭ) އިން ރިޕޯޓްކޮށްފައިވާ ގޮތުގައި، ޖަމަލުތަކަށް ބަދަލު ގެނެސްފައިވާކަން ދެނެގަނެފައިވަނީ ކުރިން ބޭނުންނުކުރާ ފަދަ ޒަމާނީ ޓެކްނޮލޮޖީ ބޭނުންކޮށްގެންނެވެ. އެގޮތުން ހުރިހާ ޖަމަލެއް އެކްސް-ރޭ އަދި ތްރީ-ޑީ އަލްޓްރާސައުންޑް މެޝިންތަކުން ސްކޭންކޮށް، ޖެނެޓިކް އެނަލިސިސް ހަދާފައިވެއެވެ.

މި ތަހުލީލުތަކުން އެނގުނު ގޮތުގައި، ޖަމަލުތަކުގެ ތުންފަތާއި، ނޭފަތާއި، ދަތްދޮޅި ފަދަ ތަންތަނަށް ބޮޓޮކްސް ޖަހައިގެން މަސްތައް ރީލެކްސްކޮށްފައިވެއެވެ. އަދި ތުންފަތާއި ނޭފަތް ބޮޑުކުރުމަށް ކޮލަޖަން ފިލާސް ބޭނުންކުރުމުގެ އިތުރުން، މަސްތައް ވަރުގަދަކުރުމަށް ހޯރމޯން ދީފައިވާކަން ވެސް ވަނީ ފާހަގަކުރެވިފައެވެ. މީގެ އިތުރުން، ހަށިގަނޑުގެ ބައިތައް ދުޅަކޮށް ބޮޑުކޮށް ދެއްކުމަށްޓަކައި ލޭ ދައުރުވުން ހުއްޓުވާ ރަބަރު ބޭންޑް ފަދަ ތަކެތި ވެސް ބޭނުންކޮށްފައިވެއެވެ.

މި މައްސަލައިގައި ޖުމްލަ 43 ޖަމަލެއް މުބާރާތުން ވަކިކޮށްފައިވާއިރު، އޭގެ ތެރޭގައި ހަށިގަނޑުގެ ބައިތައް ދަމައިގެން ބޮޑުކޮށްފައިވާ 27 ޖަމަލަކާއި، އިންޖެކްޝަން ޖަހާފައިވާ 16 ޖަމަލެއް ހިމެނެއެވެ.

މުބާރާތް އިންތިޒާމުކުރާ "ކެމަލް ކްލަބް" އިން ބުނެފައިވަނީ ޖަމަލުތަކުގެ ރީތިކަން އިތުރުކުރުމަށް ކުރާ މިފަދަ ހުރިހާ މަކަރުވެރި އަމަލުތަކެއް ހުއްޓުވުމަށް އެ ފަރާތުން މަސައްކަތްކުރާނެ ކަމަށާއި، މިފަދަ ކަންކަން ކުރާ ފަރާތްތަކަށް ހަރުކަށި އަދަބު ދޭނެ ކަމަށެވެ.

ޖަނަވާރުންގެ ހައްގުތަކަށް މަސައްކަތްކުރާ ޖަމިއްޔާއެއް ކަމަށްވާ "ޕެޓާ"  އިން މިކަން ސިފަކޮށްފައިވަނީ ވަރަށް އިހާނެތި އަމަލެއްގެ ގޮތުގައެވެ. އެ ޖަމިއްޔާގެ ނައިބު ރައީސް ޖޭސަން ބޭކާ ވިދާޅުވީ، ރީތިވުމުގެ ނަމުގައި ޖަނަވާރުންނަށް މިފަދަ ތަދުވާ ކަންކަން ކުރުމަކީ އިންސާނިއްޔަތުކަމެއް ނެތް އަމަލެއް ކަމަށެވެ.

ސައޫދީ އަރަބިއްޔާގެ ވެރިރަށް ރިޔާޟާ 100 ކިލޯމީޓަރު ދުރުގައި ބާއްވާ މި ފެސްޓިވަލަކީ 40 ދުވަހުގެ މުއްދަތަށް ކުރިއަށްދާ ހަރަކާތެކެވެ. މިއަހަރުގެ ފެސްޓިވަލްގައި އެމެރިކާ، ރަޝިޔާ އަދި ފަރަންސޭސިވިލާތް ހިމެނޭހެން އެކި ގައުމުތަކުން 33،000 އެއްހާ ޖަމަލު ގެންގުޅޭ ފަރާތްތައް ބައިވެރިވެއެވެ. އަދި ކޮންމެ ދުވަހަކު ގާތްގަނޑަކަށް އެއްލައްކައެއްހާ ފަތުރުވެރިން މި ސަރަހައްދަށް ޒިޔާރަތްކުރާނެ ކަމަށް ލަފާކުރެވެއެވެ.