މެދުއިރުމަތީގެ ހަމަނުޖެހުންތަކާއެކު ތެލުގެ އަގު އުފުލުނަސް ރާއްޖެއިން ތެލަށް ނުޖެހޭނެ: ވަޒީރު ސަޢީދު

މެދުއިރުމަތީގައި އުފެދިފައިވާ ނުތަނަވަސްކަމާއި ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގުތަކަށް ބަދަލުތަކެއް އައި ނަމަވެސް، ރާއްޖޭގެ ތެލުގެ ސްޓޮކަށް ބުރޫނާރާނެ ކަމަށާއި ރާއްޖެއިން ތެލަށް ނުޖެހޭނެ ކަމުގެ ޔަގީންކަން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ދެއްވައިފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ސަޢީދު ވިދާޅުވީ، ބައިނަލްއަޤްވާމީ މާކެޓުތަކުގައި އިއްޔެ އެކަނިވެސް ތެލުގެ އަގު 25 އިންސައްތައާއި 30 އިންސައްތައާ ދެމެދުގެ މިންވަރަކަށް އުފުލިފައިވާ ކަމަށެވެ. ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މިފަދަ ހާލަތްތަކަށް ދުރާލާ ވިސްނައި، ދިވެހި ރައްޔިތުންނަށް ދަތިނުވާނެހެން ފިޔަވަޅުތައް އަޅަމުންދާ ކަމަށް ވަޒީރު ވިދާޅުވިއެވެ.

އިއްޔެ ރައީސް ފާހަގަކުރެއްވި ގޮތަށް އަޅުގަނޑުމެންނަށް އަދި އެއްވެސް ކަންބޮޑުވުމެއް ނެތް. ކުރުކޮށް ދަންނަވާ ނަމަ ތެލަކަށް ނުޖެހޭނެ، އިރާދަކުރެއްވިއްޔާ. އެލްޕީޖީ (ކައްކާ ގޭސް) ވެސް އަދި ތެޔޮ ވެސް ހިމަނައިގެން މި ދެންނެވީ،

ވަޒީރު ސަޢީދު 

ވަޒީރު އިތުރަށް ވިދާޅުވި ގޮތުގައި، ރާއްޖެއަށް އަންނަ ފަތުރުވެރިންނާއި ރާއްޖޭގެ އާބާދީ އިތުރުވަމުންދާތީ، ތެލާއި ކާބޯތަކެތީގެ ރައްކާތެރިކަން ކަށަވަރު ކުރުމަކީ ސަރުކާރުގެ ބޮޑު އިސްކަމެކެވެ. އެގޮތުން، ތެޔޮ ރައްކާކުރާނެ ކެޕޭސިޓީ އިތުރުކުރުމުގެ މަސައްކަތް ކުރަމުންދާ ކަމަށާއި، މުދާ ގެންނަން އިތުރު ރޫޓުތައް ބަލަމުންދާ ކަމަށްވެސް ވަޒީރު ވިދާޅުވިއެވެ.

މެދުއިރުމަތީގެ ހަމަނުޖެހުންތަކާ ގުޅިގެން ރާއްޖެއިން ވަނީ ދުރާލާ ތައްޔާރުވެފައެވެ. ވަޒީރު ވިދާޅުވި ގޮތުގައި މިހާރުވެސް ރާއްޖެއަށް ތެޔޮ ޝިޕްމަންޓެއް އަންނަމުންދާއިރު، އާންމު ބޭނުންތަކަށާއި މަތިންދާބޯޓުތަކަށް ބޭނުންވާ ތެލުގެ ސްޓޮކްގައިވެސް އެއްވެސް މައްސަލައެއް ނެތެވެ.

މި ހާލަތު ސަރުކާރުން ވަރަށް ގާތުން ބަލަމުންދާ ކަމަށާއި، އެސްޓީއޯ އާއި އިޤްތިޞާދީ ވުޒާރާގެ އިތުރުން މާލީ ވުޒާރާ ގުޅިގެން މަސައްކަތް ކުރަމުންދަނީ ބައިނަލްއަޤްވާމީ ލޮޅުންތަކުގެ ސަބަބުން ރައްޔިތުންނަށް ލިބޭ ތަކްލީފުތައް ވީހާވެސް ކުޑަކުރުމަށް ކަމަށް ވަޒީރު ސަޢީދު ފާހަގަކުރެއްވިއެވެ.