ކައުންސިލުތަކަށް އިދާރީ މުވައްޒަފުން ނުލިބުމުގެ މައްސަލަ ޙައްލުކުރަން އެބަ މަސައްކަތްކުރެވޭ: ވަޒީރު އާދަމް ޝަރީފް

ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ ހައްލުކުރުމުގެ މަސައްކަތް ކުރައްވަމުންދާކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު ''އެކްސް'' ގައި ކުރެއްވި ޕޯސްޓެއްގައި ވިދާޅުވީ، ފަތުރުވެރިކަމާއި އެނޫންވެސް އިޤުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އަންނަނީ އިތުރުވަމުން ކަމަށެވެ.

މި މައްސަލަ ހައްލު ކުރުމަށް ގުޅުންހުރި މުއައްސަސާތަކާއެކު މިދަނީ މަސައްކަތް ކުރަމުން.

ވަޒީރު ވިދާޅުވިއެވެ.

ރައްޔިތުންނަށް ލާމަރުކަޒީކޮށް ޚިދުމަތް ދިނުމަށް ކައުންސިލުތަކުގެ އިދާރާތަކުގެ ޢުމްރާނީ ހާލަތު ރަނގަޅުކުރަން 55 ކައުންސިލް އިދާރާ އިމާރާތްކުރުމުގެ ޢަމަލީ މަސައްކަތް ފަށާފައިވާއިރު، ކައުންސިލުތައް އިމާރާތްކުރުމާ ގުޅޭގޮތުން މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، 55 ކައުންސިލް އިދާރާ އިމާރާތްކުރުމުގެ މަޝްރޫޢު ނިމޭއިރު، ޚިދުމަތް ދިނުމަށް ބޭނުންވާ ހުރިހާ ކަމެއް ހުންނާނީ އިދާރާތަކުގައި ފުރިހަމަވެފައި ކަމަށެވެ.

މި އަހަރުގެ ތެރޭގައި އެ 55 ކައުންސިލް އިދާރާގެ މަސައްކަތް ނިމި، ރައްޔިތުންނަށް ޚިދުމަތް ދޭން ފެށޭނެ ކަމަށާއި ހަމައެއާއެކު، ސަރުކާރުން ހިންގާ ޕީ.އެސް.އައި.ޕީ.ގެ ދަށުން 6 ކައުންސިލް އިދާރާއެއްގެ މަސައްކަތް މިހާރު ނިންމާފައިވާކަން ރައީސްގެ ވާހަކަފުޅުގައި ފާހަގަކުރައްވާފައިވެއެވެ.

މީގެ އިތުރުން، ޗައިނާ ސަރުކާރުގެ ހިލޭ އެހީގައި އިމާރާތްކުރާ 50 ކައުންސިލް އިދާރާ ޕްރޮޖެކްޓްގެ ފީޒިބިލިޓީ ދިރާސާ ނިމިފައިވާއިރު މިހާރު ކުރިއަށް ދަނީ ކައުންސިލް އިދާރާ އަޅާނެ ބިން ހޯދުމާއި، އެނޫންވެސް އިދާރީ މަސައްކަތްތަކެވެ.