ތިލަމާލެ ބުރިޖުގެ މުޅި މަޝްރޫއުގެ 70 އިންސައްތަ މަސައްކަތް ނިމިއްޖެ

މާލެ ސަރަޙައްދުގައި ކުރިއަށްދާ އެންމެ ބޮޑު އެއް ޢުމްރާނީ ތަރައްޤީގެ މަޝްރޫޢު ކަމަށްވާ ތިލަމާލެ ބުރިޖުގެ މުޅި މަޝްރޫޢުގެ 70 އިންސައްތަ މަސައްކަތް ނިމިއްޖެއެވެ.

 ބްރިޖްގެ މަސައްކަތާ އެކުއެކީގައި، ހައިވޭތަކުގެ މަސައްކަތްތައްވެސް ބާރު ދުވެލީގައި ކުރިއަށްދާއިރު، މިހާރު މާލޭގެ ހުޅަނގު ފަރާތުން ބުރިޖުގެ ސިފަ ފެންނަން ވަނީ ފަށާފައެވެ.

މިހާރު ސައިޓުގައި ކުރިއަށްދާ މައިގަނޑު މަސައްކަތްތަކުގެ ތެރޭގައި ޑެކަށް ބޭނުންވާ ސެގްމަންޓްތައް ކާސްޓްކުރުމާއި ތަނބުތައް ގުޅާލުމަށް ސެގްމަންޓްތައް އިންސްޓޯލްކުރުން ހިމެނެއެވެ. ބްރިޖް ޑެކަށް ބޭނުންވާ 1222 ސެގްމަންޓްގެ ތެރެއިން މިހާތަނަށް 80 އިންސައްތަ ސެގްމަންޓް ކާސްޓްކޮށް ނިމިފައިވާއިރު، ތަނބުތައް ގުޅާލުމުގެ މަސައްކަތުގެ 46 އިންސައްތަ ސެގްމަންޓް ވަނީ އިންސްޓޯލްކޮށް ނިމިފައެވެ.

ޖުމްލަ 6.7 ކިލޯމީޓަރުގެ ދިގު މި ކަނެކްޓިވިޓީގެ ދަށުން މާލެ، ވިލިމާލެ، ގުޅިފަޅު އަދި ތިލަފުށި ގުޅާލާނެއެވެ. މި މަޝްރޫޢުގެ ދަށުން ރަށްރަށް ހުރަސްކުރާނީ ކޯޒްވޭ ތަކަކުންނެވެ. އެގޮތުން ވިލިމާލެ އަދި ގުޅިފަޅުގައި ކޯޒްވޭ ހެދުމުގެ މަސައްކަތް ކުރިއަށްދާއިރު، ގުޅިފަޅުގައި މިހާރު ކުރިއަށްދަނީ ތާރު އެޅުމުގެ ކުރިން ކުރާ ސަބް ބޭސްގެ މަސައްކަތެވެ. އަދި ތިލަފުށީގައި ގޮނޑުދޮށް ޙިމާޔަތްކުރުމަށް ރިވެޓްމަންޓް ޖެހުމާއި ކަލްވާރޓްސް ހަރުކުރުމުގެ މަސައްކަތް ދަނީ ކުރަމުންނެވެ.

މަޝްރޫޢުގެ ތާވަލާ ގުޅޭގޮތުން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވީ، މިއަހަރުގެ ނިޔަލަށް މާލެއިން ވިލިމާލެއަށް ބުރިޖު ގުޅާލެވޭނެ ކަމަށް އަންދާޒާކުރެވޭ ކަމަށެވެ. ވަޒީރު އިތުރަށް ފާހަގަކުރެއްވި ގޮތުގައި، ނިމިދިޔަ ސަރުކާރުން އެގްރިމަންޓަށް ގެނައި ބަދަލުތަކުގެ ސަބަބުން ކޮންޓްރެކްޓަރަށް ދަތިތަކެއް ހުރި ނަމަވެސް، މިހާރުގެ ސަރުކާރުން އިންޑިއާ ސަރުކާރާއި ކޮންޓްރެކްޓަރާއެކު މަޝްވަރާކޮށް މަސައްކަތް އަވަސްކުރުމަށް މަސައްކަތް ކުރަމުންދާ ކަމަށެވެ.

މުޅި މަޝްރޫޢު 2027 ވަނަ އަހަރުގެ ނިޔަލަށް ނިންމުމަށް ސަރުކާރުން އަމާޒު ހިފާފައިވާއިރު، މި މަޝްރޫޢަށް ޖުމްލަ 500 މިލިޔަން ޑޮލަރު (7 ބިލިޔަނަށްވުރެ ގިނަ ރުފިޔާ) ހޭދަވާނެއެވެ. މީގެ ތެރޭގައި ހިމެނެނީ އިންޑިއާ ސަރުކާރުން ދޭ 100 މިލިޔަން ޑޮލަރުގެ ގްރާންޓާއި 400 މިލިޔަން ޑޮލަރުގެ ލައިން އޮފް ކްރެޑިޓްގެ އިތުރުން ދިވެހި ސަރުކާރުން ކުރާ ޚަރަދުތަކެވެ.