ކާނާގެ ސަލާމަތްތެރިކަން ކަށަވަރުކޮށް މެދުކެނޑުމެއްނެތި އަސާސީ ކާނާ ލިބޭނެކަން ކަށަވަރުކުރުމަށް ސަރުކާރުން ފިޔަވަޅުތަކެއް އަޅައިފި: ވަޒީރު ސަޢީދު

ރާއްޖޭގެ ހުރިހާ ސަރަހައްދެއްގައި ދިރިއުޅޭ ރައްޔިތުންނަށް މެދުކެނޑުމެއް ނެތި އަސާސީ ކާނާގެ ބާވަަތްތައް ލިބެމުންދާކަން ކަށަވަރުކުރުމަށް ސަރުކާރުން ގިނަ ގުނަ ފިޔަވަޅުތަކެއް އަޅާފައިވާކަން ހާމަކޮށްފިއެވެ. މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސަޢީދު ވިދާޅުވީ، ވަޒީރުންގެ މަޖިލީހުގެ މަޝްވަރާގެ މަތިން އަސާސީ ކާނާގެ ބާވަތްތައް އަތްފޯރާ އަގެއްގައި ރައްޔިތުންނަށް ފޯރުކޮށްދިނުމުގެ މަސައްކަތް މިހާރު އެސްޓީއޯއާ ހަވާލުކުރެވިފައިވާ ކަމަށެވެ.

ވަޒީރު ސައީދު ވިދާޅުވި ގޮތުގައި، އެސްޓީއޯއިން މާލެއާއި ހުޅުމާލޭގެ އިތުރުން އަތޮޅުތެރޭގެ ބޮޑެތި އާބާދީތަކަށާއި ކުދި އާބާދީތަކަށް އެސްޓީއޯގެ އެޖެންޓުން މެދުވެރިކޮށް މުދާ ފޯރުކޮށްދިނުމުގެ މަސައްކަތް ވަނީ ފަށާފައެވެ. ސިޓީތަކުގައި މި މަސައްކަތް ސީދާ އެސްޓީއޯއިން ކުރަމުންދާއިރު، މީގެ ބޭނުމަކީ އެއްވެސް މެދުކެނޑުމެއް ނެތި އަސާސީ މުދާ ލިބޭނެ އިންތިޒާމު ހަމަޖެއްސުމެވެ.

މުދާ އުފުލުމާއި ރައްކާކުރުމުގެ ދާއިރާއިން ގެނެވުނު ބަދަލުތަކަށް އަލިއަޅުއްވާލައްވަމުން ވަޒީރު ވިދާޅުވީ، ކުޅުދުއްފުށީގަޔާއި އައްޑޫ ސިޓީގައި އިތުރު ޑިއުޓީއެއް ދައްކަން ނުޖެހޭ ގޮތަށް މުދާ ރައްކާކުރެވޭނެ އިންތިޒާމު އެމްޕީއެލް މެދުވެރިކޮށް ހަމަޖައްސާފައިވާ ކަމަށެވެ. "ކުޅުދުއްފުށީ ޕޯޓުގައި ޑިއުޓީ ދެއްކުމަކާ ނުލައި މުދާ ރައްކާކުރެވޭނެ އިންތިޒާމު އެމްޕީއެލްއިން ހަމަޖައްސާފަައިވާނެ. އަދި އައްޑޫ ހިތަދޫ ޕޯޓުގައިވެސް ކުޅުދުއްފުށީގައި ހަމަޖެއްސި އިންތިޒާމު ހަމަޖައްސާފައިވާނެ،" ސަޢީދު ވިދާޅުވިއެވެ.

މީގެ އިތުރުން، މޫސުމީ ބަދަލުތަކާއި އެހެނިހެން ގޮންޖެހުންތަކާ އެކުވެސް މުދާ ފޯރުކޮށްދިނުމަށްޓަކައި "އެންކާ" ގެ ނަމުގައި މުދާ އުފުލާނެ ހާއްސަ ކަނޑުގެ މަގުތަކެއް މިހާރު ވަނީ ކަނޑައަޅާފައެވެ. މި ރޫޓުތަކުގެ ސަބަބުން ރަށްރަށަށް ބޭނުންވާ މުދާ މެދުކެނޑުމެއް ނެތި ފޯރުކޮށްދެވޭނެކަން ކަށަވަރުވާނެ ކަމަށް ވަޒީރު ފާހަގަކުރެއްވިއެވެ.

ސަރުކާރުގެ އަމާޒަކީ އަސާސީ ކާނާގެ ގޮތުގައި ކަނޑައަޅާފައިވާ ބާވަތްތައް އެންމެ ފަސޭހައިން ލިބެންހުރި ގައުމުތަކުން ގެނެސް، ދާއިމީ ގޮތެއްގައި ހެޔޮ އަގުގައި ރައްޔިތުންނަށް ލިބޭނެ މަގު ފަހިކޮށްދިނުމެވެ. މި ފިޔަވަޅުތަކާއެކު ރާއްޖޭގެ ކާނާގެ ރައްކާތެރިކަން އިތުރަށް ވަރުގަދަވެގެންދާނެ ކަމަށް ސަރުކާރުން ގަބޫލުކުރެއެވެ.