ހޮސްޕިޓަލްތަކާއި ސްކޫލްތަކަށް ދިން ހަމަލާތަކާ ގުޅިގެން ބައިނަލްއަގުވާމީ ފިޔަވަޅު އެޅުމަށް އީރާނުން ގޮވާލައިފި

އިޒްރޭލާއި އެމެރިކާއިން އީރާނަށް ދެމުންދާ ވައިގެ ހަމަލާތަކުގައި އެ ގައުމުގެ ހޮސްޕިޓަލްތަކާއި ސްކޫލްތަކަށް ބޮޑެތި ގެއްލުންތަކެއް ލިބެމުންދާތީ، އެކަމާ ދެކޮޅަށް ބައިނަލްއަގުވާމީ މުޖުތަމައުން އެއްބައިވަންތަކަން އިސްކޮށް ފިޔަވަޅު އެޅުމަށް އީރާނުގެ ސަރުކާރުން ގޮވާލައިފިއެވެ.

 މި ހަމަލާތަކަކީ އާންމުން ދިރިއުޅޭ ސަރަހައްދުތަކަށް އަމާޒުކޮށްދޭ ނުރައްކާތެރި ހަމަލާތަކެއްގެ ގޮތުގައި އީރާނުން ވަނީ ސިފަކޮށްފައެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަގާއީ މިއަދު ވިދާޅުވީ، އިޒްރޭލާއި އެމެރިކާއިން ދަނީ އެއްވެސް ބެލުމެއް ނެތި އާންމުންގެ ގެދޮރާއި، ހޮސްޕިޓަލްތަކާއި، ސްކޫލްތަކުގެ އިތުރުން ރެޑް ކްރެސެންޓްގެ މަރުކަޒުތަކަށް ހަމަލާދެމުން ކަމަށެވެ. "މި އަމަލުތަކަކީ ބައިނަލްއަގުވާމީ މިންގަނޑުތަކާ ހިލާފަށް ގަސްތުގައި ހިންގާ ބޮޑެތި ޖަރީމާތަކެއް،" ސޯޝަލް މީޑިއާގައި ކުރެއްވި ޕޯސްޓެއްގައި އޭނާ ވިދާޅުވިއެވެ.

އީރާނުގެ ރެޑް ކްރެސެންޓް ސޮސައިޓީގެ ރައީސް ޕީރު ހުސައިން ކޮލިވަންޑް ވަނީ އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައި.ސީ.އާރު.ސީ) ގެ ރައީސަށް ސިޓީއެއް ފޮނުއްވައި، ކުޑަކުދިންނާއި ތައުލީމީ އަދި ސިއްހީ މަރުކަޒުތަކަށް ދޭ ހަމަލާތައް ކުށްވެރިކުރުމަށް އެދިވަޑައިގެންފައެވެ. ޖެނީވާ ކޮންވެންޝަނާ އެއްގޮތަށް މިފަދަ ހަމަލާތައް ހުއްޓުވުމަށް ވަގުތުން ފިޔަވަޅު އެޅުމަށް އޭނާ ބާރުއެޅުއްވިއެވެ. ކޮލިވަންޑް ފާހަގަކުރެއްވި ގޮތުގައި ގެއްލުން ލިބުނު އެއްވެސް މަރުކަޒަކީ އަސްކަރީ ބޭނުމަކަށް ބޭނުންކުރާ ތަންތަނެއް ނޫނެވެ.

ތެހެރާންގެ އުތުރުގައި ހުންނަ ގާންދީ ހޮސްޕިޓަލަށް ވަނީ ބޮޑެތި ގެއްލުންތަކެއް ލިބިފައެވެ. އީރާނުގެ މެޑިކަލް ކައުންސިލްގެ ރައީސް މުހައްމަދު ރައީސުޒާދާ ވިދާޅުވި ގޮތުގައި، ހޮސްޕިޓަލުގެ އައި.ވީ.އެފް ޑިޕާޓްމަންޓް ވަނީ އެއްކޮށް ސުންނާފަތިވެފައެވެ. މީގެ ސަބަބުން އެތަނުގައި ތިބި ތުއްތު ކުދިންނާއި ބަލިމީހުން ރައްކާތެރި ސަރަހައްދުތަކަށް ބަދަލުކުރަން ޖެހުނު މަންޒަރުތައް ދައްކުވައިދޭ ވީޑިއޯތައް ވަނީ އާންމުވެފައެވެ.

އައި.ސީ.އާރު.ސީ ގެ ރައީސާ މިރްޖަނާ ސްޕޮލްޖަރިކް ނެރުއްވި ބަޔާނެއްގައި ވިދާޅުވީ، ހަނގުރާމައިގެ ވަގުތުތަކުގައިވެސް އަމަލުކުރަންޖެހޭ ގަވާއިދުތަކަށް އިހުތިރާމް ކުރުމަކީ މަޖުބޫރު ކަމެއް ކަމަށެވެ. "ހޮސްޕިޓަލްތަކާއި، ގެދޮރާއި ސްކޫލްތައް ފަދަ އާންމު ހިދުމަތްދޭ ތަންތަނަށް ހަމަލާދީގެން ނުވާނެ. ސިއްހީ ހިދުމަތްތެރިންނަށް ރައްކާތެރިކަމާއެކު މަސައްކަތް ކުރުމުގެ ފުރުސަތު އޮންނަންވާނެ،" އޭނާ ވިދާޅުވިއެވެ.

އިޒްރޭލުން އީރާނުގެ ސްޓޭޓް ޓީވީގެ ޗެނަލް 2 ހުންނަ އިމާރާތަށާއި މުވާސަލާތީ އެންޓަނާތަކަށް އަމާޒުކޮށް ދިން ހަމަލާތަކުގެ ސަބަބުން ކައިރީގައި ހުރި ސިއްހީ މަރުކަޒުތަކަށްވެސް ވަނީ އަސަރުކޮށްފައެވެ. މި ހަމަލާތަކާ ގުޅިގެން އީރާނުގެ ގިނަ ހޮސްޕިޓަލްތަކެއް ހުސްކުރަން ޖެހިފައިވާއިރު، މިއީ އިންސާނީ ކަރާމާތަށް އޮތް ބޮޑު ނުރައްކަލެއްގެ ގޮތުގައި އީރާނުން ދަނީ ބުނަމުންނެވެ.