ފާއިތުވި ހަތަރު ދުވަހު އީރާނުން ފޮނުވާލި 1700 އަށްވުރެ ގިނަ މިސައިލާއި ޑްރޯން ގަލްފުގެ ގައުމުތަކުން ހުއްޓުވައިފި

ވޭތުވެދިޔަ ހަތަރު ދުވަހުގެ ތެރޭގައި އީރާނުން ފޮނުވާލި 1700 އަށްވުރެ ގިނަ މިސައިލާއި ޑްރޯން ހަމަލާތަކެއް ގަލްފުގެ ގައުމުތަކުން ކާމިޔާބުކަމާއެކު ހުއްޓުވާފައިވާ ކަމަށް އެ ގައުމުތަކުގެ ރަސްމީ އިދާރާތަކުން ހާމަކޮށްފިއެވެ.

 މި ހަމަލާތަކަކީ މިދިޔަ ހޮނިހިރު ދުވަހު އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައާ ގުޅިގެން ދެމުންދާ ހަމަލާތަކެކެވެ.

ގައުމުތަކަށް އަމާޒުވި ހަމަލާތަކުގެ ތަފްސީލު
ޤަތަރުގެ ދިފާއީ ވުޒާރާއިން ހާމަކުރި ގޮތުގައި، އެ ގައުމުން ވަނީ އީރާނުގެ ދެ ހަނގުރާމަމަތީ ބޯޓާއި، 3 ކްރޫޒް މިސައިލް އަދި 98 ބެލިސްޓިކް މިސައިލް ހުއްޓުވާފައެވެ. މީގެ އިތުރުން 24 ޑްރޯން ވައްޓާލާފައިވާ ކަމަށާއި، ދައުލަތުގެ އިސްތިގުލާލު ހިމާޔަތްކުރުމުގެ ފުރިހަމަ ގާބިލުކަން ގަތަރުގެ ސިފައިންގެ ކިބައިގައި ހުރި ކަމަށް އެ ވުޒާރާއިން ބުނެފައިވެއެވެ.

ސަޢުދީ ޢަރަބިއްޔާގެ ދިފާއީ ވުޒާރާގެ ތަރުޖަމާނު ލެފްޓިނަންޓް ޖެނެރަލް ތުރުކީ އަލް މާލިކީ ވިދާޅުވީ، ރިޔާޟް އަދި އަލް-ޚަރްޖް ސަރަހައްދުން 8 ޑްރޯން ހުއްޓުވާފައިވާ ކަމަށެވެ. އަދި ރިޔާޟްގައި ހުންނަ އެމެރިކާ އެމްބަސީއަށް ދެ ޑްރޯން ހަމަލާއެއް އަމާޒުވި ނަމަވެސް، އެ ތަކެތި ވަނީ ވައްޓާލާފައެވެ. މީގެ އިތުރުން ރައުސް ތަނޫރާ ތެޔޮ ސާފުކުރާ ކާރުޚާނާއަށް އަމާޒުވި ހަމަލާތަކުގެ ސަބަބުން ކުޑަ އަލިފާނުގެ ހާދިސާއެއް ހިނގި ނަމަވެސް، އެއްވެސް މީހަކަށް އަނިޔާއެއް ނުވެ ވަނީ ކޮންޓްރޯލް ކުރެވިފައެވެ.

އެމިރޭޓްސް، ކުވެއިތު އަދި ބަހްރޭނުގެ ހާލަތު
ޔޫއޭއީގެ ދިފާއީ ވުޒާރާއިން ބުނި ގޮތުގައި، އެ ގައުމަށް އަމާޒުކޮށް ފޮނުވާލި 174 ބެލިސްޓިކް މިސައިލްގެ ތެރެއިން 161 މިސައިލް ވަނީ ހުއްޓުވާފައެވެ. އަދި 689 ޑްރޯންގެ ތެރެއިން 645 ޑްރޯން ވައްޓާލާފައިވާއިރު، މި ހަމަލާތަކުގައި 3 މީހުން މަރުވެ 68 މީހަކަށް ކުދި އަނިޔާތައް ލިބިފައިވެއެވެ. ކުވެއިތުން 178 ބެލިސްޓިކް މިސައިލާއި 384 ޑްރޯން ހުއްޓުވާފައިވާއިރު، އެ ގައުމުގެ ސިފައިންގެ 27 މީހަކަށް ވަނީ އެކިވަރުގެ އަނިޔާ ލިބިފައެވެ.

ބަހްރޭނުގެ ދިފާއީ ބާރުތަކުން ހާމަކުރި ގޮތުގައި، މިދިޔަ ހޮނިހިރު ދުވަހުން ފެށިގެން އެ ގައުމުގެ އެއާ ޑިފެންސް ސިސްޓަމްތަކުން ވަނީ އީރާނުގެ 70 މިސައިލާއި 76 ޑްރޯން ވައްޓާލާފައެވެ. މި ހަމަލާތަކުގެ ސަބަބުން އާންމުންގެ މުދަލަށާއި އިންފްރާސްޓްރަކްޗާއަށް ބޮޑެތި ގެއްލުންތަކެއް ލިބިފައިވާ ކަމަށް ބަހްރޭނުން ބުނެއެވެ.

އީރާނުން މި ހަމަލާތައް ދެމުންދަނީ އެ ގައުމުގެ އެކި ސަރަހައްދުތަކަށް އެމެރިކާއާއި އިސްރާއީލުން ދެމުންދާ ހަމަލާތަކަށް ރައްދު ދިނުމުގެ ގޮތުން، އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށްގެން ކަމަށް އެ ގައުމުން ބުނެއެވެ.