ރައީސް ދެއްވީ މީޑީއާ ކޮންޓްރޯލް ބިލު ބޭރުކުރާނެ ކަމުގެ ޔަޤީންކަން

ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް އަމިއްލަ މެމްބަރަކު ރައްޔިތުންގެ މަޖިލީހަށް ހުށަހަޅުއްވާފައިވާ ބިލް، ސަރުކާރު ހިންގާ ޕާޓީ ޕީއެންސީން ބޭރުކޮށްލާނެ ކަމަށް ރައީސް ޑރ. މުހައްމަދު މުއިއްޒު  ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް މުއިއްޒު ވަނީ ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާނު އަބޫބަކުރު ހުށަހަޅުއްވާފައިވާ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އެއްކޮށްލުމުގެ ބިލާ ގުޅޭ ގޮތުން ވާހަކަފުޅު ދައްކަވާފައެވެ.

ރައީސް މުއިއްޒު ވިދާޅުވީ އެ ބިލުގައި ވަނީ އެ މަނިކުފާނު ގަބޫލުފުޅު ކުރައްވާ ސިޔާސަތެއް ނޫން ކަމަށާއި، މީޑިއާތައް ކޮންޓްރޯލް ކުރާ ހިތްޕުޅު ނުވާ ކަމަށެވެ. އޭގެ ބަދަލުގައި ބޭނުންފުޅުވަނީ މީޑިއާތަކަށް މިހާރަށް ވުރެ ބޮޑަށް މިނިވަންކަން ދޭން ކަމަށް ވެސް ވިދާޅުވިއެވެ.

އެގޮތަކަށް އަޅުގަނޑުމެންނެއް ނުކުރާނަން. އޭގެ ބަދަލުގައި މީޑިއާތައް ބާރުވެރިކުރުވަން މަސައްކަތް ކުރާނީ. މީޑިއާތައް ބާރުވެރި ކުރުވުމަށްޓަކައި ފުރަތަމަ ފަހަރަށް މި ފާސްކުރެވޭ ބަޖެޓުގައި އޮންނާނެ ދައުލަތުގެ ބަޖެޓުން މީޑިއާތަކަށް ފައިސާ ދޭން ހިމަނާފައި. ފުރަތަމަ ފަހަރަށް، ވައުދުވި ގޮތަށް

ރައީސް މުއިއްޒު ވިދާޅުވިއެވެ.

މީގެ އިތުރުން، މީޑިއާތަކަށް ހެޔޮ އަގުގައި އޮފީސް ހިންގާނެ ޖާގަ ދިނުމަށް ހުޅުމާލެއިން އިމާރާތެއް ހަމަޖައްސައި، ގަވައިދަށް ފެތޭ ހުރިހާ މީޑިއާތަކަށް އެސްޓީއޯއިން އަޅަން ފެށި ހޮޓަލުން އޮފީސް ޖާގަ ލިބޭނެ ކަމަށް ވެސް ރައީސް މުއިއްޒު ވިދާޅުވިއެވެ.

ރަސްމިއްޔާތަށް ފަހު ނޫސްވެރިންގެ ސުވާލުތަކަށް ޖަވާބު ދެއްވަމުން ރައީސް މުއިއްޒު ވިދާޅުވީ ވެރިކަން ކުރާ ޕާޓީގެ މެޖޯރިޓީ އޮތް މަޖިލީހުން އެ ބިލް ބޭރުކުރާނެ ކަމަށެވެ. އަދި އެ ބިލް ބަލައި ނުގަންނާނެ ކަމަށް ވެސް ވިދާޅުވިއެވެ.

ނަމަވެސް، ނޫސްވެރިން ވެސް އަމަލުކުރަންޖެހޭ އުސޫލެއް އެބައޮތް ކަމަށާއި، ތެދު ބަހުން ނޫސްވެރިކަން ކުރާ ނަމަ ކޮންމެ ކަމެއް ހާމަކުރިއަސް ވަރިހަމަ ކަމަށް ރައީސް މުއިއްޒު ވިދާޅުވިއެވެ.

މީޑިއާތަކުގެ ބޮޑު ކަންބޮޑުވުމެއް އޮތް މި ބިލުގައިވާ ގޮތުން، ޖުމްލަ ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މީހަކާއި މީޑިއާތަކުން އައްޔަންކުރާ ތިން މީހެކެވެ. އަދި އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

މި ބިލުގައި އިތުރަށް ހިމެނިފައިވާ ގޮތުން، މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަުން ޖޫރިމަނާ ކުރެވޭނެ ކަމަށާއި، ވަކިވަކި ނޫސްވެރިން 5،000 ރުފިޔާއާއި 10،000 ރުފިޔާއާ ުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބަޔާންކޮށްފައިވެއެވެ.