އިސްރާއީލާއި އެމެރިކާއިން ހަމަލާދޭނަމަ މެދުއިރުމަތީގެ އިގްތިސާދީ މަރުކަޒުތަކަށް ހަމަލާދޭނެކަމުގެ އިންޒާރު އީރާނުން ދީފި

އިސްރާއީލާއި އެމެރިކާއިން އީރާނަށް ދެމުންދާ ހަމަލާތައް ކުރިއަށްގެންދާނަމަ، މެދުއިރުމަތީގެ ހުރިހާ އިގްތިސާދީ މަރުކަޒުތަކަށް ހަމަލާދޭނެކަމުގެ ވަރުގަދަ އިންޒާރެއް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ދީފިއެވެ.

މި އިންޒާރު ދެއްވަމުން އައި.އާރު.ޖީ.ސީގެ ޖެނެރަލް އިބްރާހިމް ޖައްބާރީ ވިދާޅުވީ، ދުޝްމަނުން އީރާނުގެ މައިގަނޑު މަރުކަޒުތަކަށް ހަމަލާދޭން ނިންމައިފިނަމަ، އޭގެ ބަދަލުހިފުމުގެ ގޮތުން މުޅި ސަރަހައްދުގެ އިގްތިސާދީ ހަބްތަކަށް އީރާނުން ހަމަލާދޭނެ ކަމަށެވެ. އޭނާ އިތުރަށް ވިދާޅުވީ "އަހަރެމެން މި ބުނަނީ ދުޝްމަނުން އަހަރެމެންގެ މައި މަރުކަޒުތަކަށް ހަމަލާދީފިނަމަ، ސަރަހައްދުގެ ހުރިހާ އިގްތިސާދީ މަރުކަޒުތަކަކަށް އަހަރެމެން ހަމަލާދޭނަމެވެ."

މީގެ އިތުރުން، އީރާނުގެ ނޫސް އެޖެންސީ 'އިސްނާ' އިން ރިޕޯޓްކޮށްފައިވާ ގޮތުގައި، ޖެނެރަލް ޖައްބާރީ ވަނީ ހޮރްމޫޒް ކަނޑުއޮޅި ބަންދުކޮށްފައިވާކަން ފާހަގަކުރައްވާފައެވެ. އޭނާ ވިދާޅުވީ މިހާރުވެސް ތެލުގެ އަގު ފީފާއަކަށް 80 ޑޮލަރަށްވުރެ މަތީގައި ހުރިއިރު، ކުރިއަށް އޮތް ތަނުގައި މިއަގު 200 ޑޮލަރަށް އުފުލިގެންދާނެ ކަމަށެވެ.

ހޮރްމޫޒް ކަނޑުއޮޅިއަކީ ދުނިޔޭގެ އިގްތިސާދަށް ވަރަށް މުހިންމު ސަރަހައްދެކެވެ. ދުނިޔޭގައި ވިޔަފާރިކުރާ ތެލުގެ ގާތްގަނޑަކަށް ފަސްބައިކުޅަ އެއްބައި އަދި ގަތަރާއި ޔޫއޭއީން ބޭރުކުރާ ގުދުރަތީ ގޭހުގެ ބޮޑުބައެއް ދަތުރުކުރަނީ މި ކަނޑުއޮޅި މެދުވެރިކޮށެވެ. ތަފާސްހިސާބުތަކުން ދައްކާގޮތުގައި ދުނިޔޭގައި ދުވާލަކު ބޭނުންކުރާ ތެލުގެ 20 އިންސައްތަ ނުވަތަ ގާތްގަނޑަކަށް 20 މިލިއަން ފީފާ ތެޔޮ މި ހަނި ކަނޑުއޮޅިން ކޮންމެ ދުވަހަކު އުފުލައެވެ.

އީރާނުން މިފަދަ އިންޒާރެއް ދީފައިވަނީ އިސްރާއީލާއި އެމެރިކާއިން އެގައުމާ ދެކޮޅަށް ހިންގާ އަސްކަރީ ހަރަކާތްތައް ވަރުގަދަ ކުރަމުންދާ ދަނޑިވަޅެއްގައެވެ. މިއީ މުޅި މެދުއިރުމަތީގެ ހަމަޖެހުމަށާއި ދުނިޔޭގެ ހަކަތައިގެ ބާޒާރަށް އޮތް ބޮޑު ނުރައްކަލެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ.