ތެލެސީމިއާއަށް ހޭލުންތެރިކުރުމަށް އެޗްޑީސީ އާއި ތެލެސީމިއާ ސޮސައިޓީން އެއްބަސްވުމެއްގައި ސޮއިކޮށްފި

ހުޅުމާލޭގައި ދިރިއުޅޭ ރައްޔިތުން ތެލެސީމިއާއަށް ހޭލުންތެރިކުރުމުގެ ޕްރޮގުރާމުތައް ފުޅާދާއިރާއެއްގައި ކުރިއަށްގެންދިއުމަށްޓަކައި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް ތެލެސީމިއާ ސޮސައިޓީއާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރުމަށް އިއްޔެ އެޗްޑީސީގެ ހެޑް އޮފީހުގައި ބޭއްވި ޚާއްޞަ ރަސްމިއްޔާތެއްގައި، އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް (ރޓޑ) އަލީ ޒުހައިރުއެވެ. ތެލެސީމިއާ ސޮސައިޓީގެ ފަރާތުން ސޮއިކުރެއްވީ އެ ސޮސައިޓީގެ ޗެއާޕާސަން އިމާން މުހައްމަދު އެވެ.

އެއް އަހަރު ދުވަހުގެ މުއްދަތަށް ސޮއިކުރެވުނު މި އެއްބަސްވުމުގެ ދަށުން، ހުޅުމާލޭގެ ފޭސް 1 އަދި ފޭސް 2 ގައި ތެލެސީމިއާއަށް ހޭލުންތެރިކުރުމުގެ ގިނަ ސެޝަންތަކެއް ކުރިއަށްގެންދިއުމަށް ވަނީ ރޭވިފައެވެ. މި ޕްރޮގްރާމްތަކުގެ މައިގަނޑު ބޭނުމަކީ މުޖުތަމައުގެ ވީހާވެސް ގިނަ ބަޔަކަށް ތެލެސީމިއާއާ ގުޅޭ ސައްހަ މައުލޫމާތު ފޯރުކޮށްދިނުމެވެ.

މި މަސައްކަތުގެ އެންމެ ބޮޑު އެއް މަގްސަދަކީ ތެލެސީމިއާއަށް އާންމުން ހޭލުންތެރިކުރުވައި، ރާއްޖޭގައި ތެލެސީމިއާ ކުދިން އުފަންވާ ނިސްބަތް މަދުކުރުމަށް އެހީތެރިވުމެވެ. މީގެ އިތުރުން، ބަލީގެ ނުރައްކަލާއި، ބައްޔަށް ޓެސްޓުކުރުމުގެ މުހިންމުކަން އާންމުންނަށް ބުނެދިނުމަކީވެސް މި އެއްބަސްވުމުގެ ދަށުން ކުރިއަށްގެންދާނެ ކަންކަމެވެ.

އެޗްޑީސީން ބުނި ގޮތުގައި އެ ކުންފުނީގެ އަމާޒަކީ ކުރިއަށް އޮތް ތަނުގައިވެސް މުޖުތަމައުގެ ދުޅަހެޔޮކަމާއި، އިޖުތިމާއީ ފައިދާއަށް މިފަދަ ތަފާތު ގިނަ ޕްރޮގްރާމްތަކެއް ހިންގައި، އެކި ޖަމިއްޔާ ޖަމާއަތްތަކަށް އެއްބާރުލުން ދިނުމެވެ.