ދުނިޔެ

އިންޑިޔާގެ ހޮސްޕިޓަލެއްގައި  އަލިފާނުގެ ހާދިސާއެއް ހިނގާ 10 ތުއްތުކުދިން ނިޔާވެއްޖެ

އިންޑިޔާގެ ހޮސްޕިޓަލެއްގައި  އަލިފާނުގެ ހާދިސާއެއް ހިނގާ 10 ތުއްތުކުދިން ނިޔާވެއްޖެ

އަލިފާނުގެ ހާދިސާ ހިނގި ހޮސްޕިޓަލްގެ ބޭބީ ނަރސަރީ ފޯޓޯ:އިންޓަރނެޓް

އާމިނަތު ޔުމްނާ

އާމިނަތު ޔުމްނާ

18 ނޮވެމްބަރު 2024، 02:18

18 ނޮވެމްބަރު 2024، 02:18

އިންޑިޔާގެ އުއްތަރު ޕްރަދޭޝް ސްޓޭޓްގެ ޖާންސީ ސިޓީގައި ހުންނަ ހޮސްޕިޓަލެއްގެ ނިއޯނޭޓަލް އިންޓެންސިވް ކެއަރ ޔުނިޓެއްގައި ހިނގި އަލިފާނުގެ ހާދިސާއެއްގައި 10 ތުއްތުކުދިން ނިޔާވެ، 16 ކުދިން ޒަޚަމްވެއްޖެއެވެ. މި ހާދިސާ ހިނގީ ހުކުރު ދުވަހުގެ ރޭގަނޑުގެ ވަގުތެއްގައެވެ.

އޮފިޝަލުން ބުނާ ގޮތުގައި އަލިފާން ރޯވެފައިވަނީ 55 ތުއްތުކުދިން ފަރުވާ ހޯދަމުންދިޔަ ވޯޑެއްގައެވެ. އޭގެ ތެރެއިން 45 ކުދިން ސަލާމަތްކުރެވި، މިހާރު ދަނީ ފަރުވާ ދެމުންނެވެ. ލޯކަލް އޮފިޝަލެއް ކަމަށްވާ ބިމަލް ކުމާރު ދުބޭ މިކަން ކަށަވަރުކޮށްދެއްވިއެވެ.

އަލިފާން ރޯވި ސަބަބު އަދި ސާފުވެފައެއް ނުވެއެވެ. ހޮނިހިރު ދުވަހު ސްޓޭޓްގެ ޑެޕިއުޓީ ޗީފް މިނިސްޓަރ ބްރަޖޭޝް ޕަތާކް ވަނީ ހޮސްޕިޓަލަށް ޒިޔާރަތްކޮށް، ގެއްލުން ލިބުނު ޢާއިލާތަކާ ބައްދަލުކުރައްވާފައެވެ. އޭނާ ވަނީ ސަރުކާރުގެ އެހީތެރިކަން ފޯރުކޮށްދޭނެ ކަމަށާއި، މި ހާދިސާއާ ގުޅޭ ގޮތުން ފުރިހަމަ ތަޙްޤީޤެއް ކުރިއަށް ގެންދާނެ ކަމަށް ވިދާޅުވެފައެވެ.

ފަޔަރ ފައިޓަރުން އެތަނަށް ދިޔައިރު، ވޯޑު އަލިފާނުގެ ތެރެއަށް ވެއްޓި، ދުމުން ފުރިފައިވާ ކަމަށް ބުނެއެވެ. ނުރަސްކަލުން ސަލާމަތްކުރުމަށް ކުޑަދޮރުތައް ތަޅާލަން ޖެހުނެވެ. މަންޒަރު ލޮލުން ދުށް މީހުން ބުނާ ގޮތުގައި ސަލާމަތްކުރުމުގެ މަސައްކަތް ފެށުނީ އަލިފާން ރޯވިތާ 30 މިނެޓް ފަހުންނެވެ.

މި ހާދިސާއާ ގުޅިގެން ހޮސްޕިޓަލުގެ ސަލާމަތީ ފިޔަވަޅުތަކާ މެދު ސުވާލު އުފެދިފައިވެއެވެ. އިންޓެންސިވް ކެއަރ ޔުނިޓުގައި އަލިފާނުގެ އިންޒާރުދޭ ނިޒާމެއް ހަރުކޮށްފައި ހުރި ނަމަވެސް، އެ ނިޒާމު މަސައްކަތް ނުކުރާ ކަމަށް މައިންބަފައިންނާއި ހެކިން ވަނީ ބުނެފައެވެ. ހޮސްޕިޓަލުގެ މުވައްޒަފުން ޢަމަލުކުރަން ފެށީ ދުމާއި އަލިފާނުގެ ނިޝާންތައް ފެނުނު ފަހުންނެވެ.

އިންޑިޔާގައި އަލިފާނުގެ ހާދިސާތައް އާންމުކޮށް ހިނގާ ކަމަށް ބުނެވެއެވެ. މީގެ މައިގަނޑު ސަބަބުތަކުގެ ތެރޭގައި ޢިމާރާތްކުރުމުގެ ޤާނޫނުތަކާއި ސަލާމަތީ މިންގަނޑުތަކަށް ޢަމަލު ނުކުރުމާއި، އަލިފާން ނިއްވުމުގެ އާލާތްތައް އެކަށީގެންވާ ވަރަށް ނެތުން ހިމެނެއެވެ. މިދިޔަ މެއި މަހު ނިއު ދިއްލީގައި ހުންނަ ކުޑަކުދިންގެ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި މަދުވެގެން 6 ތުއްތުކުދިން ނިޔާވިއެވެ. އަދި މީގެ 3 އަހަރު ކުރިން މަހާރާޝްޓްރާ ސްޓޭޓްގެ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި 10 ތުއްތުކުދިން ނިޔާވިއެވެ.

މި ހާދިސާއާ ގުޅިގެން ސަރުކާރުން ވަނީ ތަޙްޤީޤެއް ފަށައި، ޒިންމާވާންޖެހޭ ފަރާތްތަކާ މެދު ހަރުކަށި ފިޔަވަޅު އަޅާނެ ކަމަށް ބުނެފައެވެ. އަދި ގެއްލުން ލިބުނު ޢާއިލާތަކަށް ސަރުކާރުގެ އެހީތެރިކަން ފޯރުކޮށްދޭނެ ކަމަށް ވެސް ވަނީ ޔަޤީންކަން ދީފައެވެ.

މި ހާދިސާއިން އިންޑިޔާގެ ޞިއްޙީ ދާއިރާގައި ހުރި ސަލާމަތީ މައްސަލަތަކަށް އަލިއަޅުވާލައި، ކުރިމަގުގައި މިފަދަ ހާދިސާތައް ހުއްޓުވުމަށް އިތުރު ފިޔަވަޅުތަކެއް އަޅަން ޖެހޭކަން ފާހަގަކުރެވިފައިވެއެވެ. ޚާއްޞަކޮށް ނާޒުކު ޙާލަތުގައި ތިބޭ ނުރަސްކަލުންނާއި ބަލިމީހުންގިމީހުންގެ ސަލާމަތާއި ރައްކާތެރިކަމަށް އިތުރު ސަމާލުކަމެއް ދޭންޖެހޭ ކަމަށް ގިނަ ފަރާތްތަކުން ވަނީ ފާހަގަކޮށްފައެވެ.
                    


                    

މި ލިޔުން ކިޔާލުމުން

Ads by MSS