ދުނިޔެ ބަދަލުވަމުންދާ ހާލަތަށް ބަލައި، ރާއްޖޭގެ އިންތިޚާބީ ނިޒާމަށްވެސް ހެޔޮ ބަދަލުތަކެއް ގެންނަންޖެހޭ: ފުއާދު ތަޢުފީޤް

ދުނިޔެ ބަދަލުވަމުންދާ ހާލަތަށް ބަލައި، ރާއްޖޭގެ އިންތިޚާބީ ނިޒާމަށްވެސް ހެޔޮ ބަދަލުތަކެއް ގެންނަންޖެހޭ ކަމަށް އިލެކްޝަންސް ކޮމިޝަންސްއަށް ގިނަ ދުވަހު ޚިދުމަތްކުރެއްވި އަދި އެކޮމިޝަންގެ ކުރީގެ ރައީސްގެ މަޤާމް އަދާކުރެއްވި ފުއާދު ތައުފީޤް ވިދާޅުވެއްޖެއެވެ.

'ފަރުދުން މީޑިއާއަށް" ދެއްވި ޙާއްސަ ބަސްދީގަތުމެއްގައި ފުއާދު ވިދާޅުވީ، ދުނިޔެ ބަދަލުވަމުންދާ ހާލަތަށް ބަލައި، ރާއްޖޭގެ އިންތިޚާބީ ނިޒާމަށްވެސް ހެޔޮ ބަދަލުތަކެއް ގެންނަންޖެހޭ ކަމަށެވެ. ޚާއްޞަކޮށް، ރިޔާސީ އިންތިޚާބަށްފަހު ކުޑަދުވަސްކޮޅެއްގެ ތެރޭގައި މަޖިލިސް އިންތިޚާބު ބޭއްވުމުގެ ބަދަލުގައި، ދެ އިންތިޚާބު އެއްކޮށްލުމަކީ ސިޔާސީ ޕާޓީތަކަށާއި ކެންޑިޑޭޓުންނަށްވެސް މަސައްކަތްލުއިވެ، އުފެއްދުންތެރި ކަންކަމަށް ވަގުތު ހުސްކުރަން ލިބޭނެ ފުރުޞަތެއްގެ ގޮތުގައި ފާހަގަކުރެއްވިއެވެ.

އަޅުގަނޑުމެންގެ ތަޖުރިބާއަށް ބަލާއިރު، ދެ އިންތިޚާބު އެއްދުވަހެއްގައި ބޭއްވުމުން ދައުލަތުން ކުރަންޖެހޭ ހޭދަ ގާތްގަނޑަކަށް ދެބައިކުޅަ އެއްބަޔަށް ކުޑަވެގެންދާނެ. އަދި އިލެކްޝަންސް ކޮމިޝަނާއި، ފުލުހުންނާއި، ސިފައިން މިކަމަށްޓަކައި ވަކިވަކިން ކުރަންޖެހޭ ބުރަ މަސައްކަތްތައް އެއްދުވަހަކުން ނިންމާލެވޭނެ،

ފުއާދު .

ފުއާދު އިތުރަށް ވިދާޅުވީ، މީގެ 17 އަހަރު ކުރިން ރާއްޖޭގެ ހާލަތު އޮތްގޮތާއި މިހާރުގެ ހާލަތު ވަރަށް ތަފާތު ކަމަށެވެ. އައު ގާނޫނުއަސާސީގެ ދަށުން ވޭތުވެދިޔަ 17 އަހަރުގެ ތެރޭގައި ފަސް ރައީސުން ފެނިފައިވާއިރު، ރާއްޖޭގެ ރައްޔިތުންގެ ވިސްނުމަށާއި އުސޫލުތަކަށް ބޮޑެތި ބަދަލުތަކެއް އައިސްފައިވާކަން ފާހަގަކުރެއްވިއެވެ. އެހެންކަމުން، ގާނޫނުއަސާސީއަށް އިސްލާހެއް ގެނެސް، އިންތިޚާބުތައް އެއްކޮށްލުމަކީ ރާއްޖޭގެ އިގްތިސާދަށާއި ހަމަޖެހުމަށް ލިބޭނެ ބޮޑު ކުރިއެރުމެއް ކަމަށް ވިދާޅުވިއެވެ.

ދުނިޔޭގެ އެހެން ގައުމުތަކުގެ މިސާލު ދައްކަވަމުން ފުއާދު ވިދާޅުވީ، އެމެރިކާ، ފިލިޕީންސް، އާޖެންޓީނާ އަދި ބްރެޒިލް ފަދަ ރިޔާސީ ނިޒާމު އޮންނަ ބޮޑެތި ގައުމުތަކުގައިވެސް ރިޔާސީ އިންތިޚާބާއި މަޖިލިސް އިންތިޚާބު ބާއްވަނީ އެއްކޮށް ކަމަށެވެ. އަދި ރާއްޖޭގައި މިހާރުވެސް ލޯކަލް ކައުންސިލް އިންތިޚާބުތަކުގައި ތިން ހަތަރު އިންތިޚާބެއް އެއްދުވަހެއްގައި ބާއްވަމުންދާތީ، މިއީ އިންތިޒާމީ ގޮތުން ކުރެވޭނެ ކަމެއްކަން ކަށަވަރުކޮށްދެއްވިއެވެ.

ރާއްޖޭގައި ބާއްވާ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމަކީ އޭގެ ސަބަބުން ދައުލަތުގެ ޚަރަދުތައް ކުޑަވެ، ރައްޔިތުންނަށް އެތައް ފަސޭހަތަކެއް ލިބިގެންދާނެ ކަމެއް ކަމަށް ފުއާދު ތައުފީޤު ވިދާޅުވިއެވެ.

"ދެދުވަހު ވޯޓުލާން ނުޖެހި، އެއްދުވަހަކުން މިކަން ނިންމާލެވުމުން ވޯޓުލާ މީހުންގެ އަދަދުވެސް އިތުރުވާނެ. ސްކޫލްތަކާއި އެހެނިހެން ވަސީލަތްތައް ބޭނުންކުރުމުގައިވެސް ލުއިތަކެއް ލިބޭނެ. މިއީ ރައްޔިތުންނަށް އެންމެ ފައިދާހުރި އަދި ދައުލަތަށް އެންމެ ލުއި ގޮތް،" ގިނަ އަހަރުތަކެއްގެ ތަޖުރިބާ ހުރި ފުއާދު ވިދާޅުވިއެވެ.

ފުއާދު ތައުފީޤު މި ވާހަކަތައް ދައްކަވާފައިވަނީ އިންތިޚާބީ ނިޒާމަށް ބަދަލުތަކެއް ގެނައުމާ ގުޅޭގޮތުން ގައުމީ ފެންވަރުގައި މަޝްވަރާތައް ކުރެވެމުންދާ ދަނޑިވަޅެއްގައެވެ. ފުއާދް ވިދާޅުވީ މި ހިޔާލަކީ ރައްޔިތުންނަށް ހެޔޮނިޔަތުގައި، އިޚްލާޞްތެރިކަމާއެކު ހުށަހަޅާ ކަމެއް ކަމަށެވެ.