ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން އެސްޓީއޯއިން ތެލުގެ އަގަށް ބަދަލު ގެނެސްފި

ދުނިޔޭގެ ބާޒާރުގައި ތެލުގެ އަގު އުފެލެމުންދިއުމާ ގުޅިގެން، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ރާއްޖޭގައި ވިއްކާ ތެލުގެ އަގަށް ބަދަލު ގެނެސްފިއެވެ.

އެސްޓީއޯގެ ދަށުން ހިންގާ ފިއުލް ސަޕްލައި މޯލްޑިވްސް (އެފްއެސްއެމް) އިން ޕެޓްރޯލް އަދި ޑީސަލް ވިއްކާނެ އައު އަގުތައް އެ ކުންފުނިން މިހާރު ވަނީ އާންމުކޮށްފައެވެ. އެސްޓީއޯއިން ތެލުގެ އަގަށް މި ބަދަލު ގެނެސްފައިވަނީ، މެދުރިއިރުމަތީގައި ހިންގަމުންދާ ހަނގުރާމައާއި ގުޅިގެން ދުނިޔޭގެ ބާޒާރުގައި ތެލުގެ އަގު ބޮޑުތަނުން އުފުލިފައިވާ ދަނޑިވަޅެއްގައެވެ.

އެސްޓީއޯއިން އާންމުކޮށްފައިވާ އައު އަގުތަކަށް ބަލާއިރު، މިއަދުން ފެށިގެން ޕެޓްރޯލް ލީޓަރެއް ވިއްކާނީ 16.01 ރުފިޔާއަށެވެ. މީގެ ކުރިން ޕެޓްރޯލް ލީޓަރެއް 13.50 ރުފިޔާއަށް ވިއްކަމުން ދިޔައިރު، މިއީ 2.51 ރުފިޔާގެ އިތުރުވުމެކެވެ. އަދި ޑީސަލް ލީޓަރެއްގެ އަގު ވަނީ 13.92 ރުފިޔާއިން 17.54 ރުފިޔާއަށް އުފުލިފައެވެ. މިއީ ޑީސަލް ލީޓަރަކުން 3.62 ރުފިޔާގެ އިތުރުވުމެއް ކަމަށް އެސްޓީއޯއިން މައުލޫމާތު ދެއެވެ.

ދުނިޔޭގެ ބާޒާރުގައި ތެލުގެ އަގު އުފެލެމުންދިޔަ ނަމަވެސް، ސަރުކާރުން ވަނީ ދިވެހި ރައްޔިތުންނަށް ދަތިކަމެއް ނެތި ތެލާއި ގޭސް ލިބޭނެ ކަމުގެ ޔަގީންކަން ދެއްވާފައެވެ. މިދިޔަ އަންގާރަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިގްތިސާދީ ވަޒީރު މުހައްމަދު ސައީދު ވިދާޅުވީ، ދުނިޔޭގެ ބާޒާރުގައި ތެލުގެ އަގު %25 އާއި %30 އާ ދެމެދުގެ މިންވަރަކަށް އުފުލިފައިވާ ކަމަށެވެ. އަދި ބާޒާރުގައި ތަކެތީގެ އަގަށް އަންނަ ބަދަލުތަކަށް ރިއާޔަތްކޮށް، ސަރުކާރުން އަޅަންޖެހޭ ފިޔަވަޅުތައް އަޅަމުންދާނެ ކަމަށް ވަޒީރު ވިދާޅުވިއެވެ.

މީގެ އިތުރުން، ރާއްޖޭގައި ތެޔޮ ރައްކާކުރާނެ ކެޕޭސިޓީ އިތުރުކުރުމަށް ސަރުކާރުން މަސައްކަތް ކުރަމުންދާކަން ވަޒީރު ފާހަގަކުރެއްވިއެވެ. ރާއްޖެ އަންނަ ފަތުރުވެރިންނާއި ރާއްޖޭގެ އާބާދީ އިތުރުވަމުންދާތީ، އެ ހުރިހާ އެންމެންނަށް ބޭނުންވާ ތެލާއި ކާބޯތަކެތީގެ ރައްކާތެރިކަން (ފުޑް އެންޑް އެނާޖީ ސެކިއުރިޓީ) ކަށަވަރު ކުރުމަކީ ރައީސް ޑރ. މުހައްމަދު މުއިއްޒުގެ ސަރުކާރުން އިސްކަންދޭ މުހިންމު ސިޔާސަތެއް ކަމަށްވެސް ވަޒީރު ސައީދު ވިދާޅުވިއެވެ.