އުލިގަމު ޔޮޓް މެރީނާ ތަރައްގީކޮށްދޭނެ ބަޔަކު ހޯދުމަށް ހުޅުވާލައިފި

ހއ. އުލިގަމުގައި ގާއިމްކުރުމަށް ހަމަޖެހިފައިވާ ޔޮޓް މެރީނާ ތަރައްގީކޮށްދޭނެ ފަރާތެއް ހޯދުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އިޢުލާންކޮށްފިއެވެ.

އުލިގަމުގައި ޔޮޓް މެރީނާއެއް ތަރައްގީކުރުމަށްޓަކައި އެމްޕީއެލްއާއި އުލިގަމު ކައުންސިލާ ދެމެދު އެއްބަސްވުމެއްގައި ސޮއިކޮށްފައިވަނީ 2024 ވަނަ އަހަރުގެ އޮގަސްޓު މަހުގެ 1 ވަނަ ދުވަހުއެވެ. މި މަޝްރޫޢަކީ އުލިގަމުގެ އިޤްތިޞާދީ ކުރިއެރުމަށް ފަރުމާކުރެވިފައިވާ މުހިންމު މަޝްރޫޢެކެވެ.

ހއ. އުލިގަމަކީ ރާއްޖެއަށް އަންނަ ގިނަ އަދަދެއްގެ ޔޮޓްތައް ބަނދަރުކުރާ ރަށެކެވެ. ވަކިން ޚާއްޞަކޮށް، ކޮންމެ އަހަރެއްގެވެސް ފަތުރުވެރިކަމުގެ ޕީކް ސީޒަންގައި ގިނަ އަދަދެއްގެ ޔޮޓްތައް އެ ރަށަށް ބަނދަރުކޮށް، ގިނަ އަދަދެއްގެ ފަތުރުވެރިން ރަށަށް ފައިބައެވެ. ނަމަވެސް، އެ ފަތުރުވެރިންނަށް އެކަށީގެންވާ ޚިދުމަތްތައް ދޭނެ ވަސީލަތްތައް ރަށުގައި ގާއިމްވެފައި ނެތުމަކީ މިހާތަނަށް ކުރިމަތިވެފައިވާ އެންމެ ބޮޑު އެއް ގޮންޖެހުމެވެ.

އެމްޕީއެލްއިން ވިދާޅުވި ގޮތުގައި، މި މަޝްރޫޢުގެ ދަށުން އުލިގަމު ޔޮޓް މެރީނާ ޑިޒައިންކުރުމާއި އިމާރާތްކޮށްދޭނެ ފަރާތެއް ހޯދުމަށް ވަނީ ހުޅުވާލާފައެވެ. މި މަސައްކަތަށް ޝައުގުވެރިވާ ފަރާތްތަކުން އަންދާސީ ހިސާބު ހުށަހެޅުމުގެ ސުންގަޑިއަކީ އަންނަ ހޯމަ ދުވަހުގެ މެންދުރު ފަހު 1:00 އެވެ.

މި މެރީނާ ތަރައްޤީކުރުމަށް ހަމަޖެހިފައިވަނީ އެކަމަށްޓަކައި ކަނޑައެޅިފައިވާ ޚާއްޞަ ސަރަހައްދެއްގައެވެ. އެމްޕީއެލްއިން މަޢުލޫމާތު ދެއްވާ ގޮތުގައި، މޫދުގައި އަޅާ ފްލޯޓިން ޕްލެޓްފޯމްގައި 3 މީޓަރުގެ ފުޅާމިން ހުންނާނެއެވެ. އަދި މި ސަރަހައްދަށް 12 މީޓަރާއި 15 މީޓަރާ ދެމެދުގެ ދިގުމިން ހުންނަ އުޅަނދުފަހަރަށް ކައިރިކުރެވޭނެއެވެ.

މި މަޝްރޫޢާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީގެކުރިން އުލިގަމަށް ކުރެއްވި ދަތުރުފުޅެއްގައި ވިދާޅުވެފައިވަނީ، އުލިގަމުގައި ތަރައްގީކުރާ ޔޮޓް މެރީނާގެ މަސައްކަތް ވަރަށް އަވަހަށް ފެށިގެންދާނެ ކަމަށެވެ. އަދި އުލިގަމަށް ޚާއްޞަ އިޤްތިޞާދީ މި މަސައްކަތަކީ ދާއިމީ ގޮތެއްގައި ފުޅާވާނެ ގޮތަށް ކުރިއަށް ގެންދެވޭނެ މަޝްރޫޢަކަށް ހެދުމަކީ ސަރުކާރުގެ އަމާޒެއް ކަމަށްވެސް ރައީސް ވަނީ ވިދާޅުވެފައެވެ.