ބޮޑީ ސްކޭނަރުގެ ސަބަބުން ޖަލުން އަންނަ ސްކޭމް ކޯލްތައް މަދުވެގެންދާނެކަމުގެ ޔަޤީންކަން ވަޒީރު އިޙްސާން ދެއްވައިފި

ބޮޑީ ސްކޭނަރުގެ ސަބަބުން މާފުށީ ޖަލުން ކުރަމުން އައި ސްކޭމް ކޯލްތައް މަދުވެގެންދާނެ ކަމުގެ ޔަޤީންކަން ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ދެއްވައިފިއެވެ.

ވަޒީރު އިޙްސާން މި ޔަޤީންކަން ދެއްވާފައިވަނި، ރައީސުލްޖުމްހޫރިއްޔާގެ އޮފީހުގައި މިއަދު ހެނދުނު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ވަނީ، ޖަލުގައި ގައިދުވެފައި ތިބޭ ގައިދީން ފޯނު ބޭނުންކޮށްގެން ހިންގާ އެކިކަހަލަ ސްކޭމްތަކަށް އިޝާރާތްކުރައްވާ މި މައްސަލަ ހައްލު ކުރުމަށްޓަކައި ގިނަ މަސައްކަތްތަކެއް ކުރައްވާކަން ފާހަގަކުރައްވާފައެވެ. އެގޮތުން، އެއް މަސައްކަތަކީ ސެންޓްރަލް ޕްރިޒަން ކޮމްޕްލެކެސް އެއް ހަދާ ބައިނަލްއަޤްވާމީ ހަމަތަކަށް ފެތޭ ގޮތަށް އެތަނުގެ ސަލާމަތާއި ރައްކާތެރިކަމާއި އަދި ޖަލުގެ ކަންކަން ތަރުތީބު ކުރުމުގެ މަސައްކަތްތައް ކުރިއަށްގެންދިޔުންކަމަށް ވަޒީރު ވިދާޅުވިއެވެ.

ދެވަނަ ކަމަކަށް އަޅުގަނޑުމެން ކުރަމުންމިދަނީ އެ އިންފްރާސްޓްރަކްޗަރ ނިމެންދެންވެސް މިވަގުތު ޖަލުތަކުގައި ހުރި ސެކިއުރިޓީ ބްރީޗްތައް ހައްލުކޮށް އެކަންކަމަށް ގެނެވޭނެ ޒަމާނީ ގޮތްތައް ހޯދަމުން މިދަނީ. އެގޮތުން މި މަހުގެ ވާނީ ބޮޑީ ސްކޭނަރެއް އިންސްޓޯލްކޮށް މާފުށީ ޖަލަށް ވަދެ ނިކުމެ ހަދާ ގައިދީންނާއި ބައްދަލު ކުރަންދާ ޢާއިލާ މީހުންނާއި އަދި ޖަލު ބަލަހައްޓާ ފަރާތްތައްވެސް ހަށިގަނޑުގެ ކޮންމެ ތަނެއްގައި އެއްޗެއް ފޮރުވައިގެން ވެއްދިޔަސް މިހާރު ފެންނާނެ.

ވަޒީރު ވިދާޅުވިއެވެ.

މީގެ އިތުރުން ވަޒީރު ވިދާޅުވީ، އަދުގެ ސަރުކާރުން ވެރިކަމާ ހަވާލުވިއިރު އެންމެ ބޮޑު ގޮންޖެހުމަކަށްވެފައި އޮތް ކަމަކީ ޖަލުތަކުގައި ގައިދުކުރާނެ ޖާގަ ނެތުން ކަމަށެވެ. އަދި ކުރިން ރަނގަޅަށް ހިނގަހިނގާ ހުރި މާލޭ ޖަލާއި، ކަސްޓޯޑިއަލް ފެސިލިޓީ، ނިމުނު ސަރުކާރުން ބަންދުކޮށްފައިވާކަން ފާހަގަކުރައްވާ ވަޒީރު ވިދާޅުވީ 100 މީހުންގެ ޖާގައިގެ ޖަލެއްވެސް ކުރީ ސަރުކާރުން ތަޅާލާފައިވާ ކަމަށެވެ. 

އެކީ ޖުމްލަ ގާތްގަނޑަކަށް 450 މީހުން ގައިދުކުރުމުގެ ޖާގަ ކަރެކްޝަންސްގެ އަދި ކަސްޓޯޑިއަލް އިންފްރާސްޓްރަކްޗަރގެ ތެރެއިން ވަނީ ދުއްވާލާފަ. މި ގެއްލުނު ޖާގަތަކުގައި ތިބި ގައިދިން އޭރު ވަނީ ދޫކޮށްލާފަ. މި މީހުންގެ ތެރެއިން އަނބުރާ ޖަލަށް ގެންނަން ޖެހޭ މީހުން ނުގެނެވިގެން އުޅޭ މައިގަނޑު ސަބަބަކީވެސް މި ދެންނެވި އިންފްރާސްޓްރަކްޗަރ ނެތުން. 

ވަޒީރު ވިދާޅުވިއެވެ.

ނަމަވެސް މިހާރު 400 އެއްހާ ޖާގަ އިތުރުކޮށްފައިވާ ކަމަށާއި، އޭރު 100 މީހުންގެ ގޮޅިއެއް ހެދުމަށް 39 މިލިޔަން ރުފިޔާ ހޭދަ ކުރިކަން ވަޒީރު ފާހަގަކުރެއްވިއެވެ. އަދި މިދިޔަ 4 މަހު ކުރި ބުރަ މަސައްކަތުން 100 މީހުންގެ ޖާގަ ހުޅުމާލޭގައި ހެދިފައިވާއިރު، މިކަން ކުރެވިފައިވަނީ 5 މިލިޔަންގެ ބަޖެޓަކުންކަމަށް ވަޒީރު ވިދާޅުވިއެވެ. އަދި މޯލްޑިވްސް ކަރެކްޝަނަލް ސަރވިސް އިން ކުރިން ޚިދުމަތް ދެމުން އައީ އެކިއެކި މަރުކަޒުތައް މެދުވެރިކޮށް ކަމަށާއި މިހާރު ވަން ސްޓޮޕް ސެންޓަރެއް ހެދި ކަރެކްޝަންސްގެ ފްރަންޓް އޮފީސް މެދުވެރިކޮށް އެއްތަނަކުން ޚިދުމަތް ލިބޭނެ ކަމަށް ވަޒީރު ވިދާޅުވިއެވެ.

މި ނިޒާމުގެ ތެރެއިން ޤައިދީންނާއި ބަންދުމީހުންގެ މެޑިކަލް އަދި ޕަރސަނަލް ފައިލްތައް ޑިޖިޓަލައިޒް ކުރެވި، މިހާރު މަސައްކަތްތަކަށް ހޭދަވާ ވަގުތު ކުޑަކުރެވިގެން ދާނެކަމަށް ވަޒީރު ވިދާޅުވިއެވެ.