ރަމަޟާންމަހުގެ ފަހުގެ ދިހައިގެ ދުވަސްތަކުގައިވެސް އާންމުންނާ ވިޔަފާރިތަކަށް ދެމުންގެންދާ ޚިދުމަތް މެދުނުކެނޑި ލިބޭނެ: އިޤްތިސާދީ ވުޒާރާ

ރަމަޟާންމަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވީ ނަމަވެސް، އިޤްތިސާދީ ތަރައްޤީއާއި ވިޔަފާރިއާބެހޭ ވުޒާރާއިން އާންމުންނާއި ވިޔަފާރިތަކަށް ދެމުންގެންދާ ޚިދުމަތްތައް މެދުނުކެނޑި ލިބޭނެ އިންތިޒާމު ހަމަޖައްސާފައިވާކަން އެ ވުޒާރާއިން ހާމަކޮށްފިއެވެ.

އެ ވުޒާރާއިން ވިދާޅުވި ގޮތުގައި، ވިޔަފާރިއާބެހޭ ޚިދުމަތްތަކަށް އެދި ވަންގަވް (oneGov) އަދި ބިޒްނަސް ޕޯޓަލް މެދުވެރިކޮށް ހުށަހަޅާ އެޕްލިކޭޝަންތައް ބަންދު ދުވަސްތަކުގައިވެސް ޕްރޮސެސް ކުރަމުންދާނެއެވެ. މިގޮތުން ހުކުރު އަދި ހޮނިހިރު ފިޔަވައި ކޮންމެ ދުވަހެއްގެ ހެނދުނު 9:30 އިން 11:30 އަށް އެޕްލިކޭޝަންތައް ޕްރޮސެސް ކުރުމުގެ މަސައްކަތް ކުރިއަށްދާނެއެވެ.

ޚިދުމަތްތަކަށް އެދޭ މިންވަރަށް ބަލައި، ޕްރޮސެސިން ގަޑިތަކަށް ބަދަލު އައުމަކީ އެކަށީގެންވާ ކަމެއްކަމަށްވެސް އިޤްތިސާދީ ވުޒާރާއިން ފާހަގަކުރެއެވެ. އެ ވުޒާރާގެ ވިޔަފާރިއާބެހޭ ޚިދުމަތްތަކަށް އެދެވޭނީ ހަމައެކަނި ވަންގަވް ނުވަތަ ބިޒްނަސް ޕޯޓަލް މެދުވެރިކޮށް ކަމަށްވެސް އެ ވުޒާރާއިން ވިދާޅުވެއެވެ.

މީގެއިތުރުން، ފޮރިން އިންވެސްޓްމަންޓާ ގުޅުންހުރި ޚިދުމަތްތަކަށްވެސް ވަނީ ޚާއްޞަ އިންތިޒާމުތަކެއް ހަމަޖައްސާފައެވެ. އެގޮތުން ފޮރިން އިންވެސްޓްމަންޓް އެޕްލިކޭޝަން ފޯމު ހުށަހެޅުމަށް އީމެއިލް ބޭނުންކުރުމަށާއި، އިތުރު މަޢުލޫމާތު ހޯދުމަށް ނުވަތަ ހުށަހަޅާފައިވާ އެޕްލިކޭޝަނެއްގެ މައުލޫމާތު ސާފުކުރުމަށް 3333181 ނުވަތަ 3333182 ނަންބަރު ފޯނާ ގުޅުއްވުމަށް އެ ވުޒާރާއިން އިލްތިމާސްކުރެއެވެ.

މި ފޯނު ނަންބަރުތަކުން މަޢުލޫމާތު ދިނުމުގެ ޚިދުމަތްވެސް ލިބޭނީ ހުކުރު އަދި ހޮނިހިރު ފިޔަވައި ކޮންމެ ދުވަހެއްގެ ހެނދުނު 9:30 އިން 11:30 އަށެވެ. މި އިންތިޒާމަކީ ރަމަޟާންމަހުގެ ފަހު ދިހައިގެ ބަންދު ދުވަސްތަކުގައިވެސް ވިޔަފާރިވެރިންނަށާއި އާންމުންނަށް ދަތިނުވެ ޚިދުމަތްތައް ފޯރުކޮށްދިނުމަށް އެޅި ފިޔަވަޅެކެވެ.