މިއަހަރު 113،382 ގޭބިސީއަކަށް ރޯދަ ހަދިޔާ ދޫކޮށްފި

މިއަހަރުގެ ރަމަޟާން މަހާ ދިމާކޮށް ސަރުކާރުން ރައްޔިތުންނަށް ދިނުމަށް ނިންމާފައިވާ ރޯދަ ހަދިޔާ، ރާއްޖޭގެ 113،382 ގޭބިސީއަކަށް ދޫކޮށް ނިންމާފައިވާކަމަށް ސަރުކާރުން ހާމަކުރައްވައިފިއެވެ. މި ހަދިޔާގެ ގޮތުގައި ކޮންމެ ގޭބިސީއަކަށް ދޫކޮށްފައިވަނީ 48 ދަޅު ހިމެނޭ މަސްދަޅު ކޭހެކެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވީ، މިދިޔަ ޖެނުއަރީ މަހުގެ 24 ވަނަ ދުވަހުން ފެށިގެން މާލެ ސަރަހައްދުގައި ރޯދަ ހަދިޔާ ބެހުމުގެ މަސައްކަތް ފަށާފައިވާއިރު، ބުދަ ދުވަހުގެ ރެއާ ހަމައަށް ހުރިހާ ގޭބިސީއަކަށް ހަދިޔާ ދޫކޮށް ނިމިފައިވާ ކަމަށެވެ.

ތަފާސްހިސާބުތަކަށް ބަލާއިރު، މާލެ ސަރަހައްދުގައި މިއަހަރު 55،667 ގޭބިސީއަކަށް މަސްދަޅު ކޭސް ދޫކޮށްފައިވެއެވެ. އަދި އަތޮޅުތަކުގެ ގޭބިސީތަކަށް ބެހުމަށް 57،715 މަސްދަޅު ކޭސް ވަނީ ފޮނުވާފައެވެ. ވަޒީރު ފާހަގަކުރެއްވި ގޮތުގައި މިދިޔަ އަހަރާ އަޅާބަލާއިރު އަތޮޅުތަކުގެ ގޭބިސީތަކުގެ އަދަދު މަދުވި ނަމަވެސް، މާލެ ސަރަހައްދުގައި ރޯދަ ހަދިޔާ ދޫކުރި ގޭބިސީތަކުގެ އަދަދު ވަނީ އިތުރުވެފައެވެ.

މާލެ ސަރަހައްދުގައި ގޭބިސީތައް ކަނޑައަޅާފައިވަނީ ސްޓެލްކޯގައި ރަޖިސްޓްރީކޮށްފައިވާ ޑޮމެސްޓިކް މީޓަރުތަކަށް ބަލައިގެންނެވެ. އަދި އަތޮޅުތަކުގައި ބަލާފައިވަނީ ކައުންސިލްތަކުން ފޯރުކޮށްދީފައިވާ އެންމެ ފަހުގެ ރަޖިސްޓްރީތަކަށެވެ. ވަޒީރު ވިދާޅުވީ "ގޭބިސީތަކަށް މަސްދަޅު ކޭސް ބެހުމުގައި ލިސްޓުތަކުގެ ސައްޚަކަން ކަށަވަރުކޮށްފައިވާނެ" ކަމަށެވެ.

މިދިޔަ އަހަރު މާލެ ސަރަހައްދުގެ 50،525 ގޭބިސީއަށް ހަދިޔާ ދޫކޮށްފައިވާއިރު، މިއަހަރު ވަނީ 5،142 ގޭބިސީ އިތުރުވެފައެވެ. އަތޮޅުތަކުން ގޭބިސީތަކުގެ އަދަދު މަދުވީ ގިނަ ބަޔަކު މާލެއަށް ހިޖުރަކުރުމުގެ ސަބަބުން ކަމަށް ލަފާކުރެވޭ ކަމަށްވެސް ވަޒީރު ވިދާޅުވިއެވެ.

ސަރުކާރުން ރޯދަ ހަދިޔާ ދޫކުރުމުގެ ޕްރޮގްރާމް ހިންގާތާ މިއީ ތިންވަނަ އަހަރެވެ. މިއަހަރުވެސް ކޮންމެ ދިވެހި އާއިލާއަކަށް ދޫކޮށްފައިވަނީ ރާއްޖޭގައި އުފައްދާފައިވާ ކޮލިޓީ ރަނގަޅު މަސްދަޅު ކޭހެކެވެ.