އޮކްޓޫބަރު މަހު ބޭސްފަރުވާއަށް ޒަކާތު ހައުސް އިން 5 ލައްކައަށްވުރެ ގިނަ ރުފިޔާ ޚަރަދުކޮށްފި

މޯލްޑިވްސް ޒަކާތު ހައުސްއިން މިދިޔަ އޮކްޓޫބަރު މަހު ފަޤީރުންނާއި މިސްކީނުންގެ ބޭސްފަރުވާއަށް 5 ލައްކައަށްވުރެ ގިނަ ރުފިޔާ ޚަރަދުކޮށްފިއެވެ. މިކަން ހާމަވެފައިވަނީ ޒަކާތު ހައުސްއިން އާންމުކޮށްފައިވާ ތަފާސްހިސާބުތަކުންނެވެ.

މި ތަފާސްހިސާބުތަކުން ދައްކާގޮތުގައި އޮކްޓޫބަރު މަހު ޒަކާތު ފަންޑުން ޖުމުލަ 529،702 ރުފިޔާ ޚަރަދުކޮށްފައިވެއެވެ. މީގެ ތެރެއިން އެންމެ ބޮޑު ޚަރަދެއް ކޮށްފައިވަނީ ކެންސަރަށް ފަރުވާ ހޯދާ މީހުންނަށެވެ. އެގޮތުން ކެންސަރަށް ފަރުވާކުރުމަށް 348،037 ރުފިޔާ ޚަރަދުކޮށްފައިވެއެވެ.

ޒަކާތު ފަންޑުން އެހީ ދީފައިވާ މައިގަނޑު 5 ދާއިރާގެ ތެރޭގައި ކެންސަރު ބައްޔަށް ފަރުވާ ކުރުމުގެ އިތުރުން، ހިތުގެ އޮޕަރޭޝަން ކުރުމާއި، ކިޑްނީ ބަލިތަކާއި، ސިކުނޑީގެ އޮޕަރޭޝަންތަކުގެ އިތުރުން ޓްރާންސްޕްލާންޓް ހެދުން ހިމެނެއެވެ. މީގެ އިތުރުން އެހެނިހެން ބޭނުންތަކަށްވެސް ޒަކާތު ފަންޑުން އެހީ ދީފައިވެއެވެ.

އޮކްޓޫބަރު މަހު ޖުމުލަ 124 މީހަކަށް ޒަކާތު ފަންޑުން އެހީތެރިކަން ފޯރުކޮށްދީފައިވާއިރު، އެމަހުގެ ތެރޭގައި އެހީގެ ގޮތުގައި ދިނުމަށް ނިންމާފައިވަނީ ޖުމުލަ 992،594 ރުފިޔާއެވެ.

މޯލްޑިވްސް ޒަކާތު ހައުސްއަކީ މިއަހަރުގެ ޖެނުއަރީ މަހުގެ ތެރޭގައި ރައީސުލްޖުމްހޫރިއްޔާ އުފައްދަވައި އިފްތިތާޙް ކުރައްވާފައިވާ އިދާރާއެކެވެ. މީގެ ކުރިން ޒަކާތާ ގުޅޭ މަސައްކަތްތައް ކުރަމުން އައީ އިސްލާމީ ކަންތައްތަކާ ބެހޭ ވުޒާރާއިންނެވެ.