ކޮމިޝަނަރ އޮފް ޕޮލިސްގެ މަގާމަށް ކުރިމަތިލުމުގެ ފުރުސަތު ހުޅުވާލައިފި

ކޮމިޝަނަރ އޮފް ޕޮލިސްގެ މަގާމަށް ކުރިމަތިލުމުގެ ފުރުސަތު، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން މިއަދު ހުޅުވާލައިފިއެވެ.

ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން ކުރި އިޢުލާނެއްގައި ބުނެފައިވަނީ، ފުލުހުންގެ އެންމެ އިސްވެރިޔާގެ މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ ފުލުހުންގެ ޚިދުމަތުގެ އެސިސްޓެންޓް ކޮމިޝަނާ އޮފް ޕޮލިސްގެ ރޭންކުން ފެށިގެން މަތީ ރޭންކުތަކުގައި މިވަގުތު ތިއްބެވި އޮފިސަރުންނަށް ކަމަށެވެ.

މި މަގާމަށް ކުރިމަތިލުމަށް އެދޭ ފަރާތްތަކުން މި މަހުގެ 23 ވާ ބުރާސްފަތި ދުވަހުގެ މެންދުރުފަހު 14:00 ގެ ކުރިން އެ ވުޒާރާއަށް ހުށަހަޅަންޖެހެއެވެ. ޕޮލިސް ކޮމިޝަނަރުގެ މަގާމަކީ ފުލުހުންގެ ގާނޫނުގެ ދަށުން، ވަޒީރުގެ ލަފާގެ މަތިން ރައީސުލްޖުމްހޫރިއްޔާ އައްޔަންކުރައްވާ މަގާމެކެވެ.

މި މަގާމު ހުސްވެފައިވަނީ ކުރިން އެ މަގާމުގައި ހުންނެވި އިސްމާއިލް ނަވީން ފުލުހުންގެ ޚިދުމަތުން ރިޓަޔަކުރެއްވުމާ ގުޅިގެންނެވެ. ނަވީން ރިޓަޔަކުރެއްވުމާ ގުޅިގެން، މިވަގުތު ފުލުހުންގެ އިދާރާ ހިންގެވުމުގެ މަސްއޫލިއްޔަތު ވަގުތީ ގޮތުން ހަވާލުކުރައްވާފައިވަނީ ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއާއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އަންނަނީ ފުލުހުންގެ މުއައްސަސާ އިތުރަށް ހަރުދަނާކޮށް، ގާނޫނީ އޮނިގަނޑުގެ ތެރެއިން މިފަދަ އިސް މަގާމުތަކަށް ބޭފުޅުން އައްޔަންކުރުމުގެ މަސައްކަތް ކުރަމުންނެވެ.