އައިޓީބީ ބާލިން 2025 ހޯސްޓްކުރާ ގައުމަކަށް ރާއްޖެ ހަމަޖައްސައިފި

ދުނިޔޭގެ އެންމެ ބޮޑު ފަތުރުވެރިކަމުގެ މައުރަޒު ކަމަށްވާ އައިޓީބީ ބާލިން އަންނަ އަހަރު ހޯސްޓުކުރާ ގައުމަކަށް ރާއްޖެ ހަމަޖައްސައި، އެކަމުގެ ރަސްމީ އެއްބަސްވުމުގައި މިއަދު ސޮއިކޮށްފިއެވެ.

މި މުހިންމު އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ ޖަރުމަނުވިލާތުގެ ބާލިންގައި ކުރިއަށްދާ އައިޓީބީ މައުރަޒުގެ ރާއްޖޭގެ ސްޓޭންޑުގައެވެ. މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (ވިޒިޓް މޯލްޑިވްސް) ގެ މެނޭޖިންގ ޑިރެކްޓަރ އިބްރާހީމް ޝިއުރީއެވެ. މެސޭ ބާލިންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މާރިއޯ ޓާބިއަސްއެވެ.

އަންނަ އަހަރުގެ އައިޓީބީ ހޯސްޓް ކަންޓްރީގެ ގޮތުގައި ރާއްޖެ ހަމަޖެހުމާ ގުޅިގެން ޕީއެސްއެމް ނިއުސްއަށް ދެއްވި ހާއްސަ އިންޓަރވިއުއެއްގައި ޝިއުރީ ވިދާޅުވީ، މިއީ ރާއްޖޭގެ ފަތުރުވެރިކަމުގެ ސިނާއަތަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި މިއީ ދުނިޔޭގެ އެހެން ގައުމުތަކާ ވާދަކޮށްގެން ރާއްޖެއަށް ލިބުނު ފުރުސަތެއްކަން އޭނާ ފާހަގަކުރެއްވިއެވެ.

އައިޓީބީ ބާލިންގެ ހޯސްޓް ކަންޓްރީގެ ގޮތުގައި ރާއްޖެ ހަމަޖެހުމަކީ ދުނިޔޭގެ އެކި ކަންކޮޅުތަކުން މި މައުރަޒަށް ޒިޔާރަތްކުރާ އެތައް ހާސް ފަރާތްތަކެއްގެ ސަމާލުކަން ރާއްޖެއަށް ހުއްޓި، ރާއްޖޭގެ ބްރޭންޑް އިތުރަށް ވަރުގަދަވެގެންދާނެ ކަމެއް، ޝިއުރީ 

ޝިއުރީ އިތުރަށް ވިދާޅުވީ، ހޯސްޓް ކަންޓްރީގެ ގޮތުގައި ރާއްޖެ ހަމަޖެހުމުން، މައުރަޒު ހުޅުވުމުގެ ރަސްމިއްޔާތާއި މައުރަޒުގެ އެކި ހަރަކާތްތަކުގައި ރާއްޖެއަށް ހާއްސަ އިސްކަމެއް ދެވޭނެ ކަމަށެވެ. މީގެ ސަބަބުން ޖަރުމަނު މާކެޓާއި ޔޫރަޕްގެ އެހެން ގައުމުތަކުން ރާއްޖެއަށް އަންނަ ފަތުރުވެރިންގެ އަދަދު އިތުރުވެ، ދުނިޔޭގެ އެންމެ މަގުބޫލު މަންޒިލްގެ ގޮތުގައި ރާއްޖެ ދެމިއޮތުމަށް ބޮޑު އެހީތެރިކަމެއް ލިބޭނެއެވެ.

ރާއްޖެއިން އެންމެ ފަހުން އައިޓީބީ ބާލިން ހޯސްޓްކޮށްފައިވަނީ މީގެ 10 އަހަރު ކުރިން، 2016 ވަނަ އަހަރުއެވެ. އެ އަހަރުގެ ހުޅުވުމުގެ ރަސްމިއްޔާތަކީ މިހާތަނަށް ބޭއްވުނު އެންމެ ކުލަގަދަ އެއް ރަސްމިއްޔާތުކަން މެސޭ ބާލިންއިން ފާހަގަކުރާ ކަމަށްވެސް ޝިއުރީ ވިދާޅުވިއެވެ.