ޕީއެސްއައިޕީގެ ދަށުން ޢިމާރާތްކުރާ 6 ކައުންސިލެއްގެ މަސައްކަތް ނިމިއްޖެ: ވަޒީރު އާދަމް ޝަރީފް

ޕީއެސްއައިޕީގެ ދަށުން ޢިމާރާތްކުރާ 6 ރަށެއްގެ ކައުންސިލު އިދާރާގެ މަސައްކަތް ނިމިފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި، ޢާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ނޫސްވެރިންނަށް މަޢުލޫމާތު ދެއްވުމަށް، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައެއި ވާހަކަފުޅު ދައްކަވަމުންނެވެ.

މި ބައްދަލުވުމުގައި ވަޒީރު ފާހަގަކުރެއްވި ގޮތުގައި، މަސައްކަތްތައް ނިމިފައިވާ ކައުންސިލު އިދާރާތަކަކީ ތ. ކިބިނދޫ، ށ. ނޫމަރާ، ލ. ކަލައިދޫ، މ. ރަތްމަންދޫ އަދި މ. ވޭވަށުގެ އިތުރުން އަދި އދ. ހަންޏާމީދޫ އެވެ. ހަމަ އެއާއެކު، 5 ރަށެއްގެ މަސައްކަތް މިހާރު ވެސް ހިނގަމުންދާކަމަށް ވަޒީރު ފާހަގަކުރައްވާފައިވާއިރު، އެއީ ފ. ބިލެތްދޫ، ހއ. ހޯރަފުށީ، އދ. ދިއްދޫ އަދި ގދ. ހޯޑެއްދޫގެ އިތުރުން ހދ. ކުރިނބީއެވެ.

މީގެ އިތުރުން، ކ. ދިއްފުށި ކައުންސިލް އަދި ނ. މިލަދޫ ކައުންސިލް އިމާރާތުގެ ނުނިމި ހުރި މަސައްކަތް ނިންމުމަށްޓަކައި، މި މަސް ހުސްވުމުގެ ކުރިން އެމްޓީސީސީއާ ހަވާލުކުރެވޭނެކަމަށް ވަޒީރު ވިދާޅުވިއެވެ.